ଲକ୍ଷ୍ନୌ: ଲକ୍ଷ୍ନୌର ଜଣେ ବ୍ୟକ୍ତି ସେରମ୍ ଇନଷ୍ଟିଚ୍ୟୁଟ୍ ଅଫ୍ ଇଣ୍ଡିଆର ସିଇଓ ଆଦର ପୁନାୱାଲା ଏବଂ ଅନ୍ୟମାନଙ୍କ ବିରୋଧରେ ଅଭିଯୋଗ କରିଛନ୍ତି ଯେ କୋଭିଶିଲ୍ଡ ଡୋଜ ନେବା ସତ୍ତ୍ବେ ବି ତାଙ୍କର ଆଣ୍ଟିବଡି ବିକଶିତ ହୋଇନାହିଁ।
ଲକ୍ଷ୍ନୌର ଆଶିଆନା ପୋଲିସ ଷ୍ଟେସନରେ ଆଦର ପୁନାୱାଲାଙ୍କ ନାଁରେ ଏହି ଅଭିଯୋଗ ହୋଇଛି। ଅଭିଯୋଗରେ ନାମିତ ଅନ୍ୟମାନେ ହେଉଛନ୍ତି ଡିସିଜିଏ ନିର୍ଦ୍ଦେଶକ, ସ୍ୱାସ୍ଥ୍ୟ ମନ୍ତ୍ରଣାଳୟର ଯୁଗ୍ମ ସଚିବ ଲଭ୍ ଅଗ୍ରୱାଲ, ଆଇସିଏମଆର ନିର୍ଦ୍ଦେଶକ ବଳରାମ ଭାର୍ଗଭ, ଜାତୀୟ ସ୍ୱାସ୍ଥ୍ୟ ମିଶନ ନିର୍ଦ୍ଦେଶକ ଅପର୍ଣ୍ଣା ଉପାଧ୍ୟାୟ।
ଅଭିଯୋଗକାରୀ ପ୍ରତାପ ଚନ୍ଦ୍ର ଅଭିଯୋଗରେ କହିଛନ୍ତି ଯେ ସେ ଏପ୍ରିଲ୍ ୮ ରେ କୋଭିଶିଲ୍ଡର ପ୍ରଥମ ଡୋଜ ଗ୍ରହଣ କରିଥିଲେ। ସେ କହିଛନ୍ତି ଯେ ତାଙ୍କୁ ୨୮ ଦିନ ପରେ ଦ୍ୱିତୀୟ ଡୋଜ ମିଳିବ କିନ୍ତୁ ଉକ୍ତ ଦିନରେ ତାଙ୍କୁ କୁହାଯାଇଥିଲା ଯେ ଦ୍ୱିତୀୟ ଡୋଜର ତାରିଖ ଛଅ ସପ୍ତାହ ବୃଦ୍ଧି କରାଯାଇଥିଲା। ପରେ, ସରକାର ଦୁଇ ଡୋଜ ମଧ୍ୟରେ ସମୟ ବ୍ୟବଧାନକୁ ୧୨ ସପ୍ତାହ ପର୍ଯ୍ୟନ୍ତ ବୃଦ୍ଧି କରିଥିଲେ।
ଅଭିଯୋଗକାରୀ କହିଛନ୍ତି ଯେ ପ୍ରଥମ ଡୋଜ ପାଇବା ପରେ ସେ ଭଲ ଅନୁଭବ କରୁନାହାଁନ୍ତି। ଗଣମାଧ୍ୟମରେ ଆଇସିଏମଆର ମହାନିର୍ଦ୍ଦେଶକ ବଳରାମ ଭାର୍ଗଭଙ୍କ ଉଦ୍ଦେଶ୍ୟରେ ସେ କହିଛନ୍ତି ଯେ କୋଭିଶିଲ୍ଡର ପ୍ରଥମ ଡୋଜ ପରେ ଶରୀରରେ ଭଲ ସ୍ତରର ଆଣ୍ଟିବଡି ଉତ୍ପନ୍ନ ହୋଇଥାଏ କିନ୍ତୁ ତାହା ଏପର୍ଯ୍ୟନ୍ତ ହୋଇନାହିଁ।
ପୋଲିସ ଅଭିଯୋଗକୁ ପଞ୍ଜୀକୃତ କରିଛି। ତେବେ ଏହି ମାମଲାରେ କୌଣସି ଏଫଆଇଆର ଦାଖଲ କରାଯାଇ ନାହିଁ। ଏହି ଘଟଣାର ସମ୍ବେଦନଶୀଳତାକୁ ଦୃଷ୍ଟିରେ ରଖି କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରିବା ପୂର୍ବରୁ ସେମାନେ ବରିଷ୍ଠ ଅଧିକାରୀଙ୍କୁ ସୂଚନା ଦେଇଛନ୍ତି ବୋଲି ପୋଲିସ କହିଛି।
ଏହି ସମୟରେ, ଅଭିଯୋଗକାରୀ ତାଙ୍କ ଅଭିଯୋଗରେ ଉଲ୍ଲେଖ କରାଯାଇଥିବା ଲୋକଙ୍କ ବିରୋଧରେ ଯଦି ଏଫ୍ଆଇଆର୍ ପଞ୍ଜୀକୃତ ନହୁଏ ତେବେ କୋର୍ଟ ସ୍ଥାନାନ୍ତର କରିବାକୁ ଧମକ ଦେଇଛନ୍ତି।
Comments are closed.