ନୂଆଦିଲ୍ଲୀ: ଜାନୁଆରୀ ୧୬ ଏବଂ ୧୭ ରେ ନୂଆଦିଲ୍ଲୀରେ ବିଜେପିର ଦୁଇ ଦିନିଆ ଜାତୀୟ କାର୍ଯ୍ୟକାରିଣୀ ବୈଠକ ବସିବ। ବିଜେପିର ଏହି ବୈଠକରେ ଚଳିତ ବର୍ଷ ନଅଟି ରାଜ୍ୟରେ ହେବାକୁ ଥିବା ବିଧାନସଭା ନିର୍ବାଚନ ଉପରେ ରଣନୀତି ପ୍ରସ୍ତୁତ କରାଯିବ। ଏହି ବୈଠକରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ନିର୍ବାଚନରେ କିପରି ବିରୋଧୀଙ୍କୁ ସାମ୍ନା କରାଯିବ ଏବଂ ନିର୍ବାଚନରେ ସଫଳତା ପାଇଁ କି କି ଉପାୟ ଅବଲମ୍ବନ କରାଯିବ ସେ ନେଇ ଦଳୀୟ ନେତାଙ୍କୁ ଗୁରୁମନ୍ତ୍ର ଦେବେ।
ବିଜେପି ରାଷ୍ଟ୍ରୀୟ ସଭାପତି ଜେପି ନଡ୍ଡାଙ୍କ କାର୍ଯ୍ୟକାଳ ଏହି ବୈଠକରେ ବର୍ଦ୍ଧିତ କରାଯାଇପାରେ। ଏହି ବୈଠକରେ ବିଜେପିର ସାଧାରଣ ସମ୍ପାଦକ, ରାଜ୍ୟ ସଭାପତି, ରାଜ୍ୟ ସାଧାରଣ ସମ୍ପାଦକ, ରାଷ୍ଟ୍ରୀୟ ଉପାଧ୍ୟକ୍ଷ, ଦଳର ସଚିବ ଏବଂ ଜାତୀୟ ମୁଖପାତ୍ରଙ୍କ ସମେତ ସମସ୍ତ ବିଜେପି କାର୍ଯ୍ୟାଳୟର ଅଧିକାରୀମାନେ ଯୋଗଦେବେ। ଏହି ବୈଠକର ସବୁଠାରୁ ବଡ ଆକର୍ଷଣ ହେଉଛି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଉଦବୋଧନ, ଯେଉଁଥିରେ ପ୍ରଧାନମନ୍ତ୍ରୀ ମୋଦୀ ନିର୍ବାଚନରେ ସଫଳତା ପାଇଁ ଗୁରୁମନ୍ତ୍ର କହିବେ।
ଚଳିତ ବର୍ଷ ତ୍ରିପୁରା, ନାଗାଲାଣ୍ଡ, ମେଘାଳୟ, କର୍ଣ୍ଣାଟକ, ମିଜୋରାମ, ଛତିଶଗଡ, ରାଜସ୍ଥାନ, ମଧ୍ୟପ୍ରଦେଶ ଏବଂ ତେଲେଙ୍ଗାନାରେ ବିଧାନସଭା ନିର୍ବାଚନ ଅନୁଷ୍ଠିତ ହେବ।
ଏଥି ସହିତ ଦଳ ରାଜନୈତିକ ସଫଳତାକୁ ଦର୍ଶାଇ ଏକ ସଂକଳ୍ପ ଉପସ୍ଥାପନ କରିବାର ସମ୍ଭାବନା ରହିଛି। ଗତ କିଛି ମାସ ମଧ୍ୟରେ ଲୋକଙ୍କ କଲ୍ୟାଣ ପାଇଁ ସରକାର କ’ଣ କରିଛନ୍ତି ତାହା କୁହାଯାଉଛି। ଏହି ବୈଠକରେ ସଂଗଠନ, ଏହାର କାର୍ଯ୍ୟ ଏବଂ ଅଗ୍ରଗତି ଉପରେ ବିସ୍ତୃତ ଆଲୋଚନା କରାଯିବ। ଏହି ବୈଠକ ପାଇଁ ରାଜ୍ୟମାନଙ୍କୁ ମଧ୍ୟ ରିପୋର୍ଟ କାର୍ଡ ଆଣିବାକୁ ପଡିବ। ଯଦି ନଡ୍ଡାଙ୍କ କାର୍ଯ୍ୟକାଳ ବୃଦ୍ଧି ହେବ ତାହେଲେ ସେ ସଭାପତି ଭାବେ ଜେପି ନଡ୍ଡା ଜାତୀୟ କାର୍ଯ୍ୟାଳୟରେ ସମ୍ବୋଧନ କରିବେ। ଏହା ପୂର୍ବରୁ ଜୁଲାଇ ୨୦୨୨ ରେ ହାଇଦ୍ରାବାଦରେ ବିଜେପିର ଶେଷ ଜାତୀୟ କାର୍ଯ୍ୟନିର୍ବାହୀ ବୈଠକ ଅନୁଷ୍ଠିତ ହୋଇଥିଲା।
Comments are closed.