ରାଜ୍ୟରେ ସକ୍ରିୟ ହେଉଛନ୍ତି ମାଓବାଦୀ ! ରାୟଗଡାରେ ପୋଡ଼ାଜଳା ପରେ ନୂଆପଡାରୁ ଠାବ ହେଲା ମାଓକ୍ୟାମ୍ପ

ନୂଆପଡା: ପୁଣି ମାତିଲେ ମାଓବାଦୀ । ଦକ୍ଷିଣ ଓଡ଼ିଶାରେ ପୁଣି ସକ୍ରିୟ ହେଉଛନ୍ତି ମାଓବାଦୀ । ରାୟଗଡାରେ ଲାଲବାହିନୀର ତାଣ୍ଡବ ପରେ ନୂଆପଡାରେ ଠାବ ହୋଇଛି ମାଓ କ୍ୟାମ୍ପ । ନୂଆପଡ଼ା ଜିଲ୍ଲା ସିନାପାଲି ଥାନା ଝୋଲାପଡା ଗାଁ ନିକଟ ଜଙ୍ଗଲରୁ ମାଓ କ୍ୟାମ୍ପ ଠାବ ହୋଇଛି । ଏଠାରୁ ବିପୁଳ ପରିମାଣର ମାଓ ସାମଗ୍ରୀ ଜବତ ହୋଇଥିବା ସୂଚନା ମିଳିଛି ।

ନୂଆପଡା ଏସପି  ରାଘେବେନ୍ଦ୍ର ଗୁଣ୍ଡାଲା ରେଡ୍ଡୀ  ସୂଚନା ଦେଇ କହିଛନ୍ତି,  ବିଶେଷ ସୂତ୍ରରୁ ଖବର ପାଇ ନୂଆପଡା SP ଙ୍କ ନିର୍ଦ୍ଧେଶକ୍ରମେ ଗତ ୨୯ ତାରିଖ ଦିନ SOG, DVF ଓ CRPF ସିନାପାଲି ଓ ବୋଡେ଼ନ ଅଞ୍ଚଳରେ ମିଲିତ କୁମ୍ବିଂ ଅପରେସନ ଜାରି ରଖିଥିଲା । ଖବର ପାଇ ସିନାପାଲି ଝୋଲାପଡା ଜଙ୍ଗଲରେ ମାଓବାଦୀମାନେ କ୍ୟାମ୍ପ କରି ରହୁଥିବା ସୂଚନା ପାଇ ଅପରେସନକୁ ଆହୁରି ବ୍ୟାପକ କରାଯାଇଥିଲା ।

ଏହି ଖବର ମାଓବାଦୀମାନେ ଜାଣିବା ପରେ ଉକ୍ତ ସ୍ଥାନରୁ ଛତ୍ରଭଙ୍ଗ ଦେଇଥିଲେ । ଉକ୍ତ ସ୍ଥାନରୁ ବିଭିନ୍ନ ପ୍ରକାର ମାଓ ସାମଗ୍ରୀ ଜବତ ହୋଇଥିବା ବେଳେ ବର୍ତ୍ତମାନ ମଧ୍ୟ ସର୍ଚ୍ଚ ଅପରେସନ ଜାରି ରହିଥିବା କହିଛନ୍ତି ଏସପି । ଜବତ ସାମଗ୍ରୀ ମାନଙ୍କ ମଧ୍ୟରେ ରହିଛି ହ୍ୟାଣ୍ଡ ଗ୍ରେନେଡ, ରେଡ଼ିଓ, ସୋଲଡିଂ ମେସିନ, ବ୍ୟାଟେରୀ, ମାଓ ପୋଷାକ, ମାଓ ପୁସ୍ତିକା ଏବଂ ଖାଦ୍ୟପେୟ  ।

ବର୍ତ୍ତମାନ ମାଓବାଦୀ ଛତ୍ରଭଙ୍ଗ ଦେଇଥିବା ବେଳେ SOG, DVF ଓ CRPF ପକ୍ଷରୁ ସର୍ଚ୍ଚ ଅପରେସନ ଜାରି ରହିଥିବା ଏକ ସାମ୍ବାଦିକ ସମ୍ମିଳନୀ ଜରିଆରେ ସୂଚନା ଦେଇଛନ୍ତି ନୂଆପଡା SP ।

ସୂଚନାଥାଉ କି, ରାୟଗଡ଼ା ଜିଲ୍ଲା ମୁନିଗୁଡ଼ା ଥାନା ଦେଓକୁପୁଲି ଛକ ନିକଟରେ   ୯ଟି ମେସିନ ଜାଳି ଦେଇଛନ୍ତି ମାଓବାଦୀ ।  ଗତକାଲି ରାତିରେ ୧୦ରୁ ଅଧିକ ମାଓବାଦୀ ଆସି ଏହି ଭଳି କାଣ୍ଡ ଭିଆଇଛନ୍ତି । କ୍ରସର କର୍ମଚାରୀଙ୍କ ଠାରୁ ମୋବାଇଲ ଛଡ଼ାଇ ନବା ସହ କ୍ରସରରେ ଥିବା ଦୁଇଟି ପ୍ରୋକଲିନ, ୫ଟି ହାଇୱା ଓ ୨ଟି ଲୋଡର ସମେତ ମୋଟ ୯ଟି ମେସିନରେ ନିଆଁ ଲଗାଇ ପୋଡ଼ି ଦେଇଛନ୍ତି ସଶସ୍ତ୍ର ମାଓବାଦୀ । ଏହାପରେ ବାଂଶଧାରା ଘୁମୁସୁର ନାଗାବଳୀ ଡ଼ିଭିଜନ ପକ୍ଷରୁ ମାଓ ପୋଷ୍ଟର ଲଗାଯାଇଥିବା ଦେଖାଯାଇଛି ।