ହାଙ୍ଗଝୋଉ: ଚଳିତ ଏସିଆନ ଗେମ୍ସରେ ଗୁରୁବାର ଭାରତର ପ୍ରଦର୍ଶନ ମିଶ୍ରିତ ରହିଛି । ଶୁଟିଂ, ଉଶୁ ଓ ଅଶ୍ୱଚାଳନାରେ ଭାରତକୁ ପଦକ ମିଳିଥିବା ବେଳେ ଫୁଟବଲରେ ନିରାଶ ହେବାକୁ ପଡିଛି । ୫ମ ଦିନ ଶେଷ ସୁଦ୍ଧା ଭାରତ ୨୫ ପଦକ ହାସଲ କରି ୫ମ ସ୍ଥାନରେ ରହିଛି । ୧୦ ମିଟର ଏୟାର ପିସ୍ତଲ ଟିମ ଇଭେଂଟରେ ଭାରତର ସରବଜିତ ସିଂ, ଅର୍ଜୁନ ସିଂ ଓ ଶିବା ନରୱାଲ ୧୭୩୪ ସ୍କୋର ସହ ସ୍ୱର୍ଣ୍ଣ ପଦକ ଜିତିଥିଲେ । ଉଶୁରେ ରୋଶିବିନା ଦେବୀ ୬୦ କିଗ୍ରା ୱେଟ କାଟାଗୋରୀରେ ରୌପ୍ୟ ପଦକରେ ସନ୍ତୁଷ୍ଟ ହୋଇଛନ୍ତି । ସେହିପରି ଅଶ୍ୱଚାଳନାରେ ଇସେଜର ବ୍ୟକ୍ତିଗତ ଇଭେଂଟରେ ଅନୁଷ ଅଗରବଲ୍ଲା ବ୍ରୋଞ୍ଜ ପଦକ ହାସଲ କରିଥିଲେ ।
ଟେନିସରେ ଭାରତର ପୁରୁଷ ଡବଲ୍ସ ଓ ମିକ୍ସଡ ଡବଲ୍ସରେ ୨ଟି ପଦକ ନିଶ୍ଚିତ ହୋଇଛି । ଫୁଟବଲରେ ଭାରତୀୟ ଖେଳାଳିମାନେ ନିରାଶ କରିଛନ୍ତି । ପ୍ରି କ୍ୱାର୍ଟରରେ ଭାରତ ୨-୦ ଗୋଲରେ ସାଉଦି ଆରବ ନିକଟରୁ ପରାଜିତ ହୋଇଛି । ପୁରୁଷ ହକିର ଗ୍ରୁପ ପର୍ଯ୍ୟାୟ ମୁକାବିଲାରେ ଭାରତ ୪-୨ ଗୋଲରେ ଜାପାନକୁ ପରାସ୍ତ କରିଛି । ସନ୍ତରଣରେ ଭାରତୀୟ ପୁରୁଷ ଟିମ ୬ଷ୍ଠ ସ୍ଥାନରେ ଅଭିଯାନ ଶେଷ କରିଛି ।
Comments are closed.