ମୁମ୍ବାଇ: ରିଲିଜ ହେଲା କେନ୍ଦ୍ରମନ୍ତ୍ରୀ ନୀତିନ ଗଡକରୀଙ୍କ ଉପରେ ନିର୍ମିତ ବାୟୋପିକ ଫିଲ୍ମ ‘ଗଡକରୀ’। ଦେଶର ‘ହାଇୱେମ୍ୟାନ’ ଭାବରେ ଜଣାଶୁଣା ନେତା ନିତିନ ଗଡକରୀଙ୍କ ଜୀବନର ଗୁରୁତ୍ୱପୂର୍ଣ୍ଣ ଦିଗଗୁଡିକ ଏହି ଚଳଚ୍ଚିତ୍ରରେ ଦର୍ଶାଯାଇଛି । ଏହି ଫିଲ୍ମରେ ଗଡକରୀଙ୍କ ଭୂମିକାରେ ଅଭିନୟ କରିଛନ୍ତି ରାହୁଲ ଚୋପ୍ରା । ଏହି ଚଳଚ୍ଚିତ୍ରର କାହାଣୀ ଏବଂ ନିର୍ଦ୍ଦେଶନା ଦେଇଛନ୍ତି ଅନୁରାଗ ରାଜନ ଭୂସାରୀ।
ତେବେ ବଲିଉଡରେ ବାୟୋପିକ୍ ପରମ୍ପରା ନୂଆ ନୁହେଁ, ଏହା ପୂର୍ବରୁ ମଧ୍ୟ ଅନେକ ରାଜନେତାଙ୍କ ଉପରେ ଫିଲ୍ମ ନିର୍ମାଣ କରାଯାଇଛି । ଏହି କ୍ରମରେ ଆଜି କେନ୍ଦ୍ର ସଡକ ଏବଂ ପରିବହନ ମନ୍ତ୍ରୀ ନିତିନ ଗଡକରୀଙ୍କ ଜୀବନୀ ଉପରେ ଆଧାରିତ ଫିଲ୍ମଟି ମଧ୍ୟ ୭୦ ଏମଏମ ପରଦାରେ ମୁକ୍ତିଲାଭ କରିଛି ।
ଏହି ଫିଲ୍ମରେ ଗଡକରୀଙ୍କ ସଂଘର୍ଷ ଯାତ୍ରା ଦେଖାଯାଇଛି । କେନ୍ଦ୍ର ମନ୍ତ୍ରୀ ଗଡକରୀ କିପରି ଏହି ରାଜନୈତିକ ଉଚ୍ଚତାରେ ପହଞ୍ଚିଛନ୍ତି ଏବଂ ତାଙ୍କ ଜୀବନର ପ୍ରମୁଖ ମାଇଲଖୁଣ୍ଟଗୁଡିକ କ’ଣ? ଏହି ସବୁକୁ ଫିଲ୍ମରେ ଦର୍ଶାଯାଇଛି । ଫିଲ୍ମରେ ଗଡକରୀଙ୍କ ପତ୍ନୀ କାଞ୍ଚନ ଗଡକରୀଙ୍କ ଭୂମିକାରେ ଅଭିନୟ କରିଛନ୍ତି ଐଶ୍ୱର୍ଯ୍ୟା ଡୋର୍ଲେ । ତେବେ ଫିଲ୍ମଟି ଦର୍ଶକଙ୍କ ମନକୁ ବେଶ ଛୁଇଁବ ବୋଲି ଆଶାରହିଛି ।
ସୂଚନାଯୋଗ୍ୟଯେ, ଏହାପୂର୍ବରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ, ପୂର୍ବତନ ପ୍ରଧାନମନ୍ତ୍ରୀ ଡକ୍ଟର ମନମୋହନ ସିଂ, ଶିବସେନା ମୁଖ୍ୟ ବାଲା ସାହେବ ଠାକରେ, ତାମିଲନାଡୁର ପୂର୍ବତନ ମୁଖ୍ୟମନ୍ତ୍ରୀ ଜୟଲଳିତାଙ୍କ ଜୀବନରେ ମଧ୍ୟ ଚଳଚ୍ଚିତ୍ର ନିର୍ମାଣ କରାଯାଇଛି ।
Comments are closed.