ମୁମ୍ବାଇ: ଟେନିସ୍ ସେନସେସନ ସାନିଆ ମିର୍ଜାଙ୍କ ଭଉଣୀ ଆନମ ମିର୍ଜା ପୂର୍ବତନ ଭାରତୀୟ କ୍ରିକେଟ କ୍ୟାପଟେନ ମହମ୍ମଦ ଆଜହାରୁଦ୍ଦିନଙ୍କ ପୁଅ ଆସଦକୁ ଆସନ୍ତା ଡ଼ିସେମ୍ବରରେ ବିବାହ କରିବାକୁ ଯାଉଛନ୍ତି ।
ଏହି ବିବାହ ସମ୍ପର୍କରେ ସାନିଆ ନିକଟରେ ସ୍ପଷ୍ଟ କରିବା ସହିତ ଆସନ୍ତା ଡ଼ିସେମ୍ବର ମାସରେ ଶୁଭ ପରିଣୟ ଅନୁଷ୍ଠିତ ହେବ ବୋଲି ସୂଚନା ଦେଇଛନ୍ତି ।
“ଆସନ୍ତା ଡ଼ିସେମ୍ବର ମାସରେ ମୋ ସାନ ଭଉଣୀ ଆନମର ବିବାହ ଅନୁଷ୍ଠିତ ହେବାକୁ ଯାଉଛି । ଏବେ ଏବେ ଆମେ ତା’ସହିତ ପ୍ୟାରିସ୍ ଟ୍ରିପରୁ ଫେରୁଛୁ । ଏନେଇ ଆମେ ବେଶ୍ ଖୁସି ଅନୁଭବ କରୁଛୁ,” ବୋଲି ଟାଇମ୍ସ ଅଫ ଇଣ୍ଡିଆରେ ସାନିଆ ସୋମବାର ଦିନ ସୂଚନା ପ୍ରଦାନ କରିଛନ୍ତି ।
“ଜଣେ ସୁନ୍ଦର ଯୁବକଙ୍କୁ ଆମ ଆନମ ବିବାହ କରିବାକୁ ଯାଉଛି । ଆନମ ପୂର୍ବତନ ଭାରତୀୟ କ୍ରିକେଟର ମହମ୍ମଦ ଆଜାହରୁଦ୍ଦିନଙ୍କ ପୁଅ ଆସଦକୁ ବିବାହ କରିବାକୁ ଯାଉଛନ୍ତି । ପ୍ରକୃତରେ ମୁଁ ଓ ଆମ ପରିବାର ଏଥିରେ ବହୁତ ଖୁସି ।” ଟାଇମ୍ସ ଅଫ ଇଣ୍ଡିଆ ଖବର କାଗଜକୁ ସାକ୍ଷାତକାର ଦେଇ ସୋମବାର ଦିନ ଏହା କହିଛନ୍ତି ଟେନିସ୍ ଷ୍ଟାର୍ ସାନିଆ ମିର୍ଜା ।
ଫେଶନ୍ ଷ୍ଟାଇଲିଷ୍ଟ୍ ଆନମ୍ ସେପ୍ଟେମ୍ବରରେ ନିଜ ଇନଷ୍ଟାଗ୍ରାମ ପେଜରେ ଗୋଟିଏ ଫଟୋ ସେୟାର୍ କରି ଲେଖିଥିଲେ, “ବିବାହ କରିବାକୁ ଯାଉଛି” । ଚାରିପଟରେ ରଙ୍ଗିନ୍ ବେଲୁନ ଲଗାଇ ଷ୍ଟାଇଲିସ୍ ଲୁକ୍ସରେ ଆନମ ସୋସିଆଲ୍ ମିଡ଼ିଆରେ ସେୟାର୍ କରିବା ପରେ ଏହାକୁ ନେଇ ସେତେବେଳେ ବେଶ୍ ଚର୍ଚ୍ଚା ମଧ୍ୟ ହୋଇଥିଲା ।
Comments are closed.