ରଙ୍ଗ ଓ ରୂପକୁ ନେଇ ମନ୍ତବ୍ୟ ଦେଇ ଫସିଗଲେ ପିଟ୍ରୋଡା, କଂଗ୍ରେସର ଓଭରସିଜ ପଦରୁ ଦେଲେ ଇସ୍ତଫା

ନୂଆଦିଲ୍ଲୀ: ଶେଷରେ କଂଗ୍ରେସ ନେତା ସାମ୍ ପିଟ୍ରୋଡା ଇଣ୍ଡିଆନ୍ ଓଭରସିଜ୍ କଂଗ୍ରେସର ଅଧ୍ୟକ୍ଷ ପଦରୁ ଇସ୍ତଫା ଦେଇଛନ୍ତି । ଦଳ ମଧ୍ୟ ଏହି ଇସ୍ତଫାକୁ ଗ୍ରହଣ କରିଛି। କଂଗ୍ରେସ ନେତା ଜୟରାମ ରମେଶ ଏକ୍ସରେ ସାମଙ୍କ ଇସ୍ତଫା ବାବଦରେ ସୂଚନା ଦେଇଛନ୍ତି।

ପୂର୍ବରେ ଭାରତୀୟମାନେ ଚୀନ୍ ଭଳି ଦେଖାଯାଉଥିବା ବେଳେ ଦକ୍ଷିଣରେ ଥିବା ଭାରତୀୟମାନେ ଆଫ୍ରିକୀୟ ଭଳି ଦେଖାଯାଉଛନ୍ତି ବୋଲି ବିବାଦୀୟ ମନ୍ତବ୍ୟ ଦେଇଥିବାରୁ ପିଟ୍ରୋଡା ସମାଲୋଚନାର ଶିକାର ହୋଇଛନ୍ତି।

ଆମେ ଭାରତ ଭଳି ଏକ ବିବିଧ ଦେଶକୁ ଏକାଠି କରିପାରିବା- ଯେଉଁଠାରେ ପୂର୍ବର ଲୋକମାନେ ଚୀନ୍ ପରି ଦେଖାଯାଆନ୍ତି, ପଶ୍ଚିମର ଲୋକମାନେ ଆରବ ପରି ଦେଖାଯାଆନ୍ତି, ଉତ୍ତରର ଲୋକମାନେ ହୁଏତ ଗୋରା ଦେଖାଯାଆନ୍ତି ଏବଂ ଦକ୍ଷିଣର ଲୋକମାନେ ଆଫ୍ରିକୀୟ ପରି ଦେଖାଯାଆନ୍ତି । ଏହାଦ୍ୱାରା କୌଣସି ଫରକ ପଡେ ନାହିଁ। ଆମେ ସମସ୍ତେ ଭାଇ ଭଉଣୀ ବୋଲି ପିଟ୍ରୋଡା ଏକ ଇଂରାଜୀ ଗଣମାଧ୍ୟମରୁ ସାକ୍ଷାତକାରରେ କହିଛନ୍ତି। ପିଟ୍ରୋଡାଙ୍କ ମନ୍ତବ୍ୟକୁ କଂଗ୍ରେସର ଅନେକ ନେତା କୌଣସି ମନ୍ତବ୍ୟ ନଦେଇ ନିଜକୁ ଦୂରେଇ ରଖିଛନ୍ତି।

ଭାରତର ବିବିଧତାକୁ ବର୍ଣ୍ଣନା କରିବା ପାଇଁ ସାମ ଏକ ପୋଡକାଷ୍ଟରେ ଯେଉଁ କଥା କହିଛନ୍ତି ତାହା ଅତ୍ୟନ୍ତ ଦୁର୍ଭାଗ୍ୟଜନକ ଏବଂ ଗ୍ରହଣୀୟ ନୁହେଁ। କଂଗ୍ରେସ ଏହାକୁ ଗ୍ରହଣ କରୁନାହିଁ ବୋଲି ଜୟରାମ ରମେଶ ଏକ୍ସରେ ଏକ ପୋଷ୍ଟରେ କହିଛନ୍ତି। ପିଟ୍ରୋଡାଙ୍କ ମନ୍ତବ୍ୟକୁ ନେଇ ବିଜେପି କଂଗ୍ରେସକୁ ସମାଲୋଚନା କରିବା ସହ ଏହାକୁ ଜାତିବାଦୀ ଓ ବିଭାଜନକାରୀ ବୋଲି କହିଛି।

ଏହା ପୂର୍ବରୁ ସାମ୍ ପିଟ୍ରୋଡା ଭାରତରେ ଆମେରିକା ଶୈଳୀର ଉତ୍ତରାଧିକାରୀ ଟିକସ ବାବଦରେ କହି ବିବାଦୀୟ ହୋଇଥିଲେ।ଆମେରିକାରେ ଉତ୍ତରାଧିକାର ଟିକସ ଲାଗୁ ହୋଇଛି। ଯଦି କାହା ପାଖରେ ୧୦୦ ନିୟୁତ ଆମେରିକୀୟ ଡଲାର ସମ୍ପତ୍ତି ଅଛି ଏବଂ ଯେତେବେଳେ ସେ ମୃତ୍ୟୁବରଣ କରନ୍ତି, ତେବେ ସେ କେବଳ ୪୫ ପ୍ରତିଶତ ତାଙ୍କ ପିଲାମାନଙ୍କୁ ହସ୍ତାନ୍ତର କରିପାରିବେ ଏବଂ ୫୫% ସରକାରଙ୍କ ପାଖକୁ ଯାଆନ୍ତି । ଏଥିରେ କୁହାଯାଇଛି ଯେ ତୁମେ ତୁମ ପିଢ଼ିରେ ଧନ ରୋଜଗାର କରିଛ ଏବଂ ତୁମେ ବର୍ତ୍ତମାନ ଚାଲିଯାଉଛ, ତୁମେ ତୁମର ସମ୍ପତ୍ତି କୁ ଜନସାଧାରଣଙ୍କ ପାଇଁ ଛାଡିବା ଉଚିତ୍, ଏସବୁ ନୁହେଁ, ଏହାର ଅଧା, ଯାହା ମୋ ପାଇଁ ଠିକ୍ ଲାଗୁଛି,” ପିଟ୍ରୋଡା କହିଥିଲେ।

ପରେ ସେ ସ୍ପଷ୍ଟ କରିଥିଲେ ଯେ ତାଙ୍କ ବୟାନକୁ ବିଭ୍ରାନ୍ତ କରାଯାଇଛି ଏବଂ ଲୋକସଭା ନିର୍ବାଚନ ପାଇଁ କଂଗ୍ରେସ କିମ୍ବା ଦଳର ଇସ୍ତାହାର ସହିତ ଏହାର କୌଣସି ସମ୍ପର୍କ ନାହିଁ।