ଭୁବନେଶ୍ୱର : ରାଜ୍ୟରେ ବିଭିନ୍ନ ବନଖଣ୍ଡ ଅଞ୍ଚଳରେ ବନ୍ୟଜନ୍ତୁଙ୍କ ସୁରକ୍ଷା, ପ୍ରାଣଘାତୀ ବୋମା ଏବଂ ପଶୁ ଶିକାରୀଙ୍କ ଜନ୍ତା (ଫାସ)ର ସନ୍ଧାନ କରିବାକୁ ପ୍ରଶିକ୍ଷଣପ୍ରାପ୍ତ କୁକୁର ପାଇଁ ଟେଣ୍ଡର ଆହ୍ବାନ କରିଛି ବନ ବିଭାଗ। ରାଜ୍ୟରେ ପ୍ରଥମଥର ପାଇଁ ବନବିଭାଗ ପକ୍ଷରୁ ଡଗ୍ ସ୍କ୍ବାଡର ବ୍ୟବସ୍ଥା କରାଯାଉଛି। ପ୍ରଥମ ପର୍ଯ୍ୟାୟରେ ୫ଟି ଡିଭିଜନରେ ୧୦ଟି ଡଗ୍ ସ୍କ୍ବାଡ଼ ରଖାଯିବାକୁ ବ୍ୟବସ୍ଥା କରାଯାଇଛି।
ହିନ୍ଦୋଳ ଏବଂ ଆଠଗଡ଼ ଅଞ୍ଚଳରେ ବୋମା ଦ୍ବାରା ହାତୀଙ୍କୁ ହତ୍ୟା କରାଯାଉଛି। ବଢ଼ୁଥିବା ବନ୍ୟଜନ୍ତୁ ଅପରାଧ ରୋକିବାକୁ ପଦକ୍ଷେପ ନିଆଯାଉଛି। ସେଥିପାଇଁ ବନବିଭାଗ ପକ୍ଷରୁ ଡଗ୍ ସ୍କ୍ବାଡ଼ର ବ୍ୟବସ୍ଥା କରାଯାଉଛି। ୫ଟି ଡିଭିଜନର ଡିଏଫ୍ଓଙ୍କୁ ପତ୍ର ମାଧ୍ୟମରେ ଅବଗତ କରାଯାଇଛି। ବନ ବିଭାଗ ପକ୍ଷରୁ ପ୍ରଶିକ୍ଷଣ ପ୍ରାପ୍ତ ୧୨ ମାସରୁ ୧୮ ମାସ ବୟସର କୁକୁର ଡଗ୍ ସ୍କ୍ବାଡରେ ସାମିଲ କରିବାକୁ ସ୍ଥିର କରିଛି। ଏହାସହିତ କେସିଆ ଦ୍ବାରା ପଞ୍ଜିକୃତ ହୋଇଥିବେ।
ବନ ବିଭାଗ ପକ୍ଷରୁ ପ୍ରଥମ ପର୍ଯ୍ୟାୟରେ ଶିମିଳିପାଳ, ସାତକୋଶିଆ, ଡେବ୍ରିଗଡ଼, ହିନ୍ଦୋଳ(ଢ଼େଙ୍କାନାଳ) ଏବଂ ଆଠଗଡ଼ ୫ଟି ଡିଭିଜନରେ ଦୁଇଟି ଲେଖାଏଁ ମୋଟ୍ ୧୦ଟି ସନ୍ଧାନୀ କୁକୁର ମୁତୟନ କରିବାକୁ ଯୋଜନା କରିଛି। ଏହି ସନ୍ଧାନୀ କୁକୁର ଜଙ୍ଗଲରେ ପଇଁତରା ମାରିବା ସହିତ ଶିକାର ପାଇଁ ବଛାଯାଇଥିବା ଜନ୍ତାର ସନ୍ଧାନ କରିବ। ଏହାସହିତ ହାତୀଙ୍କୁ ଆକ୍ରମଣ କରିବାକୁ ପକାଯାଉଥିବା ବିଭିନ୍ନ ଫଳ ଆକୃତିର ବୋମାକୁ ଏହି କୁକୁର ଜଗିବେ। ଏହି ଡଗ୍ ସ୍କ୍ବାଡ ଦ୍ବାରା ବନ ବିଭାଗ ଜଙ୍ଗଲ ଏବଂ ପଶୁପକ୍ଷୀଙ୍କ ସୁରକ୍ଷାରେ ସଫଳ ହେବ ବୋଲି ଆଶା ରଖିଛି।
Comments are closed.