ମୁମ୍ବାଇ: ଚଳିତ ରଣଜୀ ସିଜନରେ ଓଡିଶାର ନୈରାଶ୍ୟଜନକ ପ୍ରଦର୍ଶନ ଜାରୀ ରହିଛି । ଏଠାରେ ଅନୁଷ୍ଠିତ ମୁକାବିଲାରେ ଓଡିଶା ଇନିଂସ ୧୦୩ ରନରେ ମୁମ୍ବାଇ ନିକଟରୁ ପରାଜିତ ହୋଇଛି । ପ୍ରଥମେ ବ୍ୟାଟିଂ କରି ମୁମ୍ବାଇ ୪ ୱିକେଟ ବିନିମୟରେ ୬୦୨ ରନର ବିଶାଳ ସ୍କୋର କରିଥିଲା । ଜବାବରେ ଓଡିଶା ସନ୍ଦୀପ ପଟ୍ଟନାୟକଙ୍କ ଶତକ ସହାୟତାରେ ୨୮୫ ରନ କରି ଅଲଆଉଟ ହୋଇଯାଇଥିଲା । ଫଲୋଅନ ପରେ ଓଡିଶା ବ୍ୟାଟ୍ସମ୍ୟାନଙ୍କଠାରୁ ଭଲ ଇନିଂସ ଆଶା କରାଯାଉଥିଲେ ମଧ୍ୟ ସେଭଳି କିଛି ଦେଖିବାକୁ ମିଳି ନ ଥିଲା । ଦଳ ୨୧୪ ରନ କରି ଅଲଆଉଟ ହୋଇ ଯାଇଥିଲା । ଆଶୀର୍ବାଦ ସ୍ୱାଇଁ ୫୧,ସନ୍ଦୀପ ୩୯ ଓ କାର୍ତିକ ବିଶ୍ୱାଳ ୪୫ ରନ କରିଥିଲେ । ସମସ୍ତ ସିନିୟର ଖେଳାଳି ଖରାପ ବ୍ୟାଟିଂ ପ୍ରଦର୍ଶନ କରିଥିଲେ ।
ଶାମ୍ସ ମୂଲାନୀ ପ୍ରଥମ ଇନିଂସରେ ୬ଟି ଏବଂ ଦ୍ୱିତୀୟ ଇନିଂସରେ ୫ଟି ୱିକେଟ ଅକ୍ତିଆର କରିଥିଲେ । ପ୍ରଭାବୀ ବୋଲିଂ ପ୍ରଦର୍ଶନ ପାଇଁ ମୁଲାନୀଙ୍କୁ ପ୍ଲେୟାର ଅଫ ଦି ମ୍ୟାଚ ବିବେଚନା କରାଯାଇଥିଲା । ମୁମ୍ବାଇ ଏହି ବିଜୟ ସହ ୭ ପଂଏଟ ହାସଲ କରି ନେଇଛି । ବରୋଦା ୩ ମ୍ୟାଚରେ ୧୯ ପଂଏଟ ସହ ଶୀର୍ଷ ସ୍ଥାନରେ ରହିଥିବା ବେଳେ ଜମ୍ମୁ ଏବଂ କଶ୍ମୀର ୪ ମ୍ୟାଚରୁ ୧୭ ଓ ମୁମ୍ବାଇ ୪ ମ୍ୟାଚରୁ ୧୬ ପଂଏଟ ହାସଲ କରି ଦ୍ୱିତୀୟ ଏବଂ ତୃତୀୟ ସ୍ଥାନରେ ରହିଛନ୍ତି । ଓଡିଶା ୪ ମ୍ୟାଚରୁ ୪ ପଂଏଟ ପାଇ ୭ମ ସ୍ଥାନରେ ରହିଛି ।
Comments are closed.