ନୂଆଦିଲ୍ଲୀ: ଆଇପିଏଲ ୨୦୨୫ ମେଗା ନିଲାମରେ ବିହାରର ୧୪ ବର୍ଷୀୟ ବୈଭବ ସୂର୍ଯ୍ୟବଂଶୀଙ୍କୁ ସାମିଲ କରାଯାଇଛି । ୧୯ ବର୍ଷରୁ କମ ଏହି ଭାରତୀୟ କ୍ରିକେଟରଙ୍କ ବେସ ପ୍ରାଇସ ୩୦ ଲକ୍ଷ ରଖାଯାଇଛି । ନିକଟରେ ଆଇପିଏଲ ୧୫୭୪ ଖେଳାଳିଙ୍କ ମଧ୍ୟରୁ ନିଲାମ ପାଇଁ ୫୭୪ଜଣଙ୍କ ଶର୍ଟଲିଷ୍ଟ କରିଛି । ଏଥିରେ ୩୬୬ ଭାରତୀୟ ଓ ୨୦୮ ବିଦେଶୀ ଖେଳାଳିଙ୍କ ନାମ ରହିଛି । ବୈଭବ ଇତି ମଧ୍ୟରେ ରଣଜୀ ଟ୍ରଫି, ହେମନ୍ତ ଟ୍ରଫି, କୁଚବେହାର ଟ୍ରଫି ଓ ଭିନୁ ମଙ୍କଡ ଟ୍ରଫିରେ ପ୍ରଭାବୀ ପ୍ରଦର୍ଶନ କରି ଦୃଷ୍ଟି ଆକର୍ଷଣ କରିଛନ୍ତି । ସେ ୧୯ ବର୍ଷୀୟ ଭାରତୀୟ ଟିମର ସଦସ୍ୟ ମଧ୍ୟ ରହିଛନ୍ତି । ଏ ପର୍ଯ୍ୟନ୍ତ ବୈଭବ ବିଭିନ୍ନ ଟୁର୍ଣ୍ଣାମେଂଟରେ ୪୯ ଶତକ ହାସଲ କରିଛନ୍ତି ।
୫ ବର୍ଷ ବୟସରୁ ବୈଭବ କ୍ରିକେଟ ଖେଳିବା ଆରମ୍ଭ କରିଥିଲେ । ଗତ ସିଜନରେ ସେ ବିହାର ପକ୍ଷରୁ ରଣଜୀ ଟ୍ରଫି ପଦାର୍ପଣ କରିଥିଲେ । ମାତ୍ର ୧୨ ବର୍ଷ ବୟସରେ ପ୍ରଥମଶ୍ରେଣୀ କ୍ରିକେଟ ଖେଳି ସେ ଚର୍ଚ୍ଚାକୁ ଆସିଥିଲେ । ସେହି ବର୍ଷ ୧୯ ବର୍ଷରୁ କମ ରଣଧୀର ବର୍ମା ଦିନିକିଆ କ୍ରିକେଟରେ ସେ ପ୍ରଥମ ଖେଳାଳି ଭାବେ ତ୍ରିଶତକ ହାସଲ କରିଥିଲେ । ୧୯ ବର୍ଷରୁ କମ ଟେଷ୍ଟରେ ସେ ପ୍ରଥମ ଭାରତୀୟ ଭାବେ ଅଷ୍ଟ୍ରେଲିଆ ବିପକ୍ଷ ମ୍ୟାଚରେ ଆକର୍ଷଣୀୟ ଶତକ ମଧ୍ୟ ହାସଲ କରିଥିଲେ । ମାତ୍ର ୫୮ ବଲରେ ୧୪ ଚୌକା ଓ ୪ ଛକା ସହାୟତାରେ ସେ ଶତକ ପୂର୍ଣ୍ଣ କରିଥିଲେ ।