ନୂଆଦିଲ୍ଲୀ: ରାଜଧାନୀ ଦିଲ୍ଲୀରୁ ଗୋଆ ଅଭିମୁଖେ ଯାତ୍ରା କରୁଥିବା ବିମାନରେ ଜଣେ ମହିଳା ତାଙ୍କ ସହ-ଯାତ୍ରୀଙ୍କ ଉପରେ ଯୌନ ନିର୍ଯାତନା ଅଭିଯୋଗ କରିଛନ୍ତି । ଏହି ମାମଲାରେ ପୋଲିସ ୨୩ ବର୍ଷ ବୟସ୍କ ଯୁବକଙ୍କୁ ଗିରଫ କରିଛି। ବୁଧବାର ଅଧିକାରୀମାନେ ଏହି ଘଟଣା ସମ୍ପର୍କରେ ସୂଚନା ଦେଇଛନ୍ତି । ପୋଲିସର ସୂଚନାନୁସାରେ, ମଙ୍ଗଳବାର ସକାଳ ୧୧ ଟାରୁ ୧ଟା୨୦ ମଧ୍ୟରେ ଏୟାର ଇଣ୍ଡିଆ ବିମାନରେ ଏହି ଘଟଣା ଘଟିଛି ।
ଦିଲ୍ଲୀର ବାସିନ୍ଦା ୨୮ ବର୍ଷୀୟ ପୀଡିତା ପୋଲିସ ନିକଟରେ ଅଭିଯୋଗ କରିଛନ୍ତି ଯେ ଗୋଆକୁ ଯାଉଥିବା ଏୟାର ଇଣ୍ଡିଆ ବିମାନରେ ତାଙ୍କ ପାଖରେ ବସିଥିବା ବ୍ୟକ୍ତି ତାଙ୍କ ଉପରେ କମ୍ବଳ ଘୋଡାଇ ଦେଇଥିଲେ ଏବଂ ପରେ ଆପତ୍ତିଜନକ କାର୍ଯ୍ୟ ଆରମ୍ଭ କରିଥିଲେ । ଏଫଆଇଆର୍ ଅନୁଯାୟୀ, ବିମାନରେ ଅଭିଯୁକ୍ତ ଜଣକ ଜାଣିଶୁଣି କମ୍ବଳକୁ ପୀଡିତାଙ୍କ ଆଡକୁ ଖୋଲା ରଖିଥିଲେ ।
ସୂଚନାନୁସାରେ, ଯେତେବେଳେ ବିମାନଟି ଗୋଆର ଦକ୍ଷିଣରେ ଥିବା ଡାବୋଲିମ୍ ର ଅନ୍ତର୍ଜାତୀୟ ବିମାନବନ୍ଦରରେ ଅବତରଣ କରିଥିଲା, ସେତେବେଳେ ମହିଳା ଅଭିଯୁକ୍ତ ସହ-ଯାତ୍ରୀଙ୍କ ବିରୋଧରେ ପୋଲିସ ନିକଟରେ ଅଭିଯୋଗ କରିଥିଲେ । ଏହା ପରେ ପୋଲିସ ଏହି ମାମଲାରେ କାର୍ଯ୍ୟାନୁଷ୍ଠାନ ଗ୍ରହଣ କରି ଅଭିଯୁକ୍ତକୁ ଗିରଫ କରିଥିଲା । ତେବେ ଗିରଫ ଅଭିଯୁକ୍ତ ଯୁବକ ଜଣକ ହରିୟାଣାର ପାନିପତ ଜିଲ୍ଲାର ବାସିନ୍ଦା ବୋଲି ଜଣାପଡିଛି ।