ସାରା ଦୁନିଆକୁ ପାକିସ୍ତାନର କଳାକାରନାମା କହିଲା ଭାରତ, ଟେନସେନରେ ପଡ଼ିଗଲା ପାକିସ୍ତାନ

“ଏହି ଆକ୍ରମଣ କେବଳ ଭାରତ ବିରୁଦ୍ଧରେ ନୁହେଁ, ବରଂ ବିଶ୍ୱ ଶାନ୍ତି ଓ ସୁରକ୍ଷା ବିରୁଦ୍ଧରେ ଏକ ଆକ୍ରମଣ। ପାକିସ୍ତାନକୁ ଏହା ପାଇଁ ଉତ୍ତରଦାୟିତ୍ୱ କରାଯିବ ବୋଲି ବୈଦେଶିକ ମନ୍ତ୍ରାଳୟ କହିଛି ।

ପହଲଗାମ ଆକ୍ରମଣ ପରେ ଭାରତ ପାକିସ୍ତାନ ବିରୁଦ୍ଧରେ ଏକାଧିକ କଠୋର ପଦକ୍ଷେପ ଗ୍ରହଣ କରିଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ଅନୁଷ୍ଠିତ ମନ୍ତ୍ରୀପରିଷଦ ସୁରକ୍ଷା କମିଟି (ସିସିଏସ) ବୈଠକ ପରେ ଭାରତ ୧୯୬୦ର ସିନ୍ଧୁ ଜଳ ଚୁକ୍ତିକୁ ନିଲମ୍ବନ କରିଛି। ଏହା ସହିତ, ଭାରତ ଓ୍ୱାଘା-ଅଟାରୀ ସୀମା ବନ୍ଦ କରିଛି, ପାକିସ୍ତାନୀ ନାଗରିକଙ୍କ ସମସ୍ତ ଭିସା ରଦ୍ଦ କରିଛି ଏବଂ ପାକିସ୍ତାନୀ ରାଜନୈତିକ କର୍ମଚାରୀମାନଙ୍କୁ ‘ପର୍ସୋନା ନନ ଗ୍ରାଟା’ ଘୋଷଣା କରିଛି। ଏହି ପଦକ୍ଷେପଗୁଡ଼ିକ ପାକିସ୍ତାନ ଉପରେ କୂଟନୈତିକ ଓ ଅର୍ଥନୈତିକ ଚାପ ବୃଦ୍ଧି କରିବାକୁ ଲକ୍ଷ୍ୟ ରଖିଛି।

ଭାରତର ଏହି କୂଟନୈତିକ ପଦକ୍ଷେପକୁ ଅନେକ ବିଶ୍ୱ ନେତାଙ୍କ ସମର୍ଥନ ମିଳିଛି। ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ପ୍ରଧାନମନ୍ତ୍ରୀ ମୋଦୀଙ୍କ ସହ କଥାବାର୍ତ୍ତା କରି ଏହି ଆକ୍ରମଣର ଅପରାଧୀମାନଙ୍କୁ ନ୍ୟାୟର କାଠଗଡାକୁ ଆଣିବା ପାଇଁ ପୂର୍ଣ୍ଣ ସମର୍ଥନ ପ୍ରକାଶ କରିଛନ୍ତି। ଏହା ସହିତ, ୟୁରୋପୀୟ ସଂଘ, ଜାପାନ, କତାର ଏବଂ ଅନ୍ୟାନ୍ୟ ଦେଶମାନେ ମଧ୍ୟ ଏହି ଆକ୍ରମଣର ତୀବ୍ର ନିନ୍ଦା କରିଛନ୍ତି। ପାକିସ୍ତାନର ଘନିଷ୍ଠ ସହଯୋଗୀ ଚୀନକୁ ମଧ୍ୟ ଏହି ବୈଠକରେ ଅନ୍ତର୍ଭୁକ୍ତ କରାଯାଇଥିଲା, ଯାହା ଭାରତର ବିସ୍ତୃତ ସମର୍ଥନ ଜୁଟାଇବାରେ ସଫଳତାକୁ ସୂଚାଇଛି।

ପାକିସ୍ତାନ ଏହି ଅଭିଯୋଗଗୁଡ଼ିକୁ ଖାରଜ କରିଛି ଏବଂ ଦାବି କରିଛି ଯେ ଏହାର ଆକ୍ରମଣ ସହ କୌଣସି ସମ୍ପର୍କ ନାହିଁ। ପାକିସ୍ତାନୀ ବୈଦେଶିକ ମନ୍ତ୍ରାଳୟ ପର୍ଯ୍ୟଟକଙ୍କ ମୃତ୍ୟୁ ପାଇଁ “ଚିନ୍ତା” ପ୍ରକାଶ କରିଛି ଏବଂ ଆହତମାନଙ୍କ ଶୀଘ୍ର ଆରୋଗ୍ୟ କାମନା କରିଛି। କିନ୍ତୁ, ଭାରତର ପଦକ୍ଷେପର ଜବାବରେ ପାକିସ୍ତାନ ୧୯୭୨ର ଶିମଲା ଚୁକ୍ତିକୁ ନିଲମ୍ବନ କରିଛି, ଭାରତୀୟ ବିମାନଗୁଡ଼ିକ ପାଇଁ ନିଜ ଆକାଶ ପଥ ବନ୍ଦ କରିଛି ଏବଂ ବାଘା ସୀମା ବନ୍ଦ କରିଛି। ପାକିସ୍ତାନ ଏହାକୁ ଭାରତର “ଆକ୍ରମଣାତ୍ମକ ନୀତି”ର ଜବାବ ବୋଲି କହିଛି।

ପହଲଗାମ ଆକ୍ରମଣ ଓ ଏହା ପରେ ଦୁଇ ଦେଶ ମଧ୍ୟରେ ବୃଦ୍ଧି ପାଉଥିବା ବିବାଦ ଆଞ୍ଚଳିକ ସ୍ଥିରତା ଉପରେ ପ୍ରଶ୍ନ ଉଠାଇଛି। ବିଶେଷଜ୍ଞମାନେ ମତ ଦେଇଛନ୍ତି ଯେ ଭାରତର ଏହି କୂଟନୈତିକ ରଣନୀତି ପାକିସ୍ତାନକୁ ଅନ୍ତର୍ଜାତୀୟ ମଞ୍ଚରେ ଅଲଗା କରିବାରେ ସଫଳ ହୋଇପାରେ, କିନ୍ତୁ ଏହା ଦୁଇ ଦେଶ ମଧ୍ୟରେ ବିବାଦକୁ ଆହୁରି ବୃଦ୍ଧି କରିପାରେ। ଭାରତର ପ୍ରଧାନମନ୍ତ୍ରୀ ସ୍ପଷ୍ଟ କରିଛି ଯେ ଆତଙ୍କବାଦୀମାନେ ପୃଥିବୀର ଯେକୌଣସି ପ୍ରାନ୍ତରେ ଥିଲେ ମଧ୍ୟ ଖୋଜି ବାହାର କରିବ ଆଉ କଳ୍ପନା ବାହାରେ ଦଣ୍ଡିତ କରିବ ।