ଆମେରିକା ସଂସଦର ବାଚସ୍ପତିଙ୍କ ପହଲଗାମ ଆକ୍ରମଣକୁ ନିନ୍ଦା ; କହିଲେ- ଆତଙ୍କବାଦ ବିରୋଧରେ ଆମେ ଭାରତ ସହ ଅଛୁ

ନୂଆଦିଲ୍ଲୀ: ପହଲଗାମ ଆତଙ୍କବାଦୀ ଆକ୍ରମଣକୁ ନିରନ୍ତର ନିନ୍ଦା କରାଯାଉଛି। ଏବେ ଆମେରିକା ସଂସଦର ବାଚସ୍ପତି ମାଇକ୍ ଜନସନ୍ ମଧ୍ୟ ପହଲଗାମ ଆକ୍ରମଣକୁ ଭୁଲ ବୋଲି କହିଛନ୍ତି। ସେ କହିଛନ୍ତି ଯେ, ଆତଙ୍କବାଦ ବିରୋଧରେ ଲଢ଼େଇରେ ଆମେରିକା ଭାରତକୁ ପୂର୍ଣ୍ଣ ସମର୍ଥନ କରିବ। ସେ ଭାରତକୁ ଅନେକ କ୍ଷେତ୍ରରେ ନିଜର ଗୁରୁତ୍ବପୂର୍ଣ୍ଣ ସାଥି ବୋଲି କହିଛନ୍ତି । ମାଇକ ଜନସନ ଭାରତ-ଆମେରିକା ବାଣିଜ୍ୟ ଚୁକ୍ତି ବିଷୟରେ ମଧ୍ୟ କହିଥିଲେ।

କ୍ୟାପିଟାଲ ହିଲରେ ଏକ କଂଗ୍ରେସର ବ୍ରିଫିଂ ସମୟରେ ମାଇକ ଜନସନ କହିଥିଲେ ଯେ, ଭାରତରେ ଯାହା ଘଟୁଛି ତାହା ପ୍ରତି ଆମର ବହୁତ ସହାନୁଭୂତି ଅଛି। ଆମେ ଆମର ସହଯୋଗୀମାନଙ୍କ ସହିତ ଅଛୁ। ମୁଁ ଭାବୁଛି ଦୁଇ ଦେଶ ମଧ୍ୟରେ ବାଣିଜ୍ୟ ଆଲୋଚନା ଭଲ ଭାବରେ ସଫଳ ହେବ। ଭାରତକୁ ଆତଙ୍କବାଦ ବିରୋଧରେ ଠିଆ ହେବାକୁ ପଡିବ। ଆମେ ଆମେରିକାରେ ଭାରତର ପ୍ରୟାସକୁ ସମର୍ଥନ କରିବା ପାଇଁ ସମସ୍ତ ପ୍ରକାରର ପ୍ରୟାସ କରିବୁ।

ସେ କହିଥିଲେ ଯେ, ଭାରତ ଏବଂ ଆମେରିକା ମଧ୍ୟରେ ସମ୍ପର୍କ ନିରନ୍ତର ବିକଶିତ ହେଉଛି। ଟ୍ରମ୍ପ ପ୍ରଶାସନ ମଧ୍ୟ ଏହି ସମ୍ପର୍କର ଗୁରୁତ୍ୱକୁ ବୁଝୁଛି। ସେ ଆତଙ୍କବାଦର ବିପଦର ଗୁରୁତ୍ୱକୁ ମଧ୍ୟ ବୁଝନ୍ତି। ତେଣୁ ଯଦି ଆତଙ୍କବାଦ ବୃଦ୍ଧି ପାଏ, ତେବେ ଟ୍ରମ୍ପ ପ୍ରଶାସନ ଏହାର ମୁକାବିଲା ପାଇଁ ଅଧିକ ଉର୍ଜା, ସମ୍ବଳ ଏବଂ ସମୟ ଉତ୍ସର୍ଗ କରିବ।

ଆମେରିକା ବାଚସ୍ପତିଙ୍କ ପୂର୍ବରୁ ଆମେରିକୀୟ ଗୁଇନ୍ଦା ସଂସ୍ଥାର ଚିଫ୍ ତୁଲସୀ ଗଓ୍ବାର୍ଡ, ଏଫବିଆଇ ନିର୍ଦ୍ଦେଶକ କାଶ ପଟେଲ୍ ମଧ୍ୟ ଆତଙ୍କବାଦ ବିରୋଧରେ ଭାରତକୁ ସମର୍ଥନ ଦେବେ ବୋଲି ଘୋଷଣା କରିସାରିଛନ୍ତି ।

୨୨ ଏପ୍ରିଲରେ ଜମ୍ମୁ-କାଶ୍ମୀରର ପହଲଗାମରେ ଆତଙ୍କବାଦୀମାନେ ୨୬ ଜଣ ନିରୀହ ପର୍ଯ୍ୟଟକଙ୍କୁ ଗୁଳି କରି ହତ୍ୟା କରିଥିଲେ। ଏହି ଘଟଣା ପରଠାରୁ ଭାରତ ଏବଂ ପାକିସ୍ତାନ ମଧ୍ୟରେ ଉତ୍ତେଜନା ବଢିବାରେ ଲାଗିଛି।