ପାଟନା: ଚଳିତ ବର୍ଷ ବିହାରରେ ବିଧାନସଭା ନିର୍ବାଚନ ଅନୁଷ୍ଠିତ ହେବାକୁ ଯାଉଛି । ଏହା ପୂର୍ବରୁ, ଭୋଟର ତାଲିକାର ଏକ ସମ୍ପୂର୍ଣ୍ଣ ସଂଶୋଧନ (ଏସଆଇଆର) ଏବଂ ଯାଞ୍ଚ କରାଯାଉଛି । ଏହି ଦ୍ୱାର-ଦ୍ୱାର ସଂଶୋଧନ ଅଭିଯାନ ସମୟରେ, ବିହାର ଭୋଟ ଲିଷ୍ଟରେ ନେପାଳ, ବାଂଲାଦେଶ ଏବଂ ମିଆଁମାରର ଲୋକଙ୍କୁ ବହୁ ସଂଖ୍ୟାରେ ଥିବା ତଥ୍ୟ ମିଳିଛି । ଏନେଇ ଅଧିକାରୀମାନେ ସୂଚନାରେ କହିଛନ୍ତି, ଯେ ଅଗଷ୍ଟ ୧ ପରେ ଏପରି ଲୋକଙ୍କର ଉପଯୁକ୍ତ ତଦନ୍ତ ପରେ, ସେପ୍ଟେମ୍ବର ୩୦ରେ ପ୍ରକାଶିତ ହେବାକୁ ଥିବା ଚୂଡ଼ାନ୍ତ ଭୋଟର ତାଲିକାରେ ଅବୈଧ ପ୍ରବାସୀମାନଙ୍କ ନାମ ଅନ୍ତର୍ଭୁକ୍ତ କରାଯିବ ନାହିଁ ।
ଗ୍ରାଉଣ୍ଡ ରିପୋର୍ଟକୁ ଉଦ୍ଧୃତ କରି, ନିର୍ବାଚନ କମିଶନ ଅଧିକାରୀମାନେ କହିଛନ୍ତି ଯେ ବୁଥ୍-ସ୍ତରୀୟ ଅଧିକାରୀ (BLO)ମାନେ ଦ୍ୱାର-ଦ୍ୱାର ପରିଦର୍ଶନ ସମୟରେ ନେପାଳ, ବାଂଲାଦେଶ ଏବଂ ମିଆଁମାରର ଲୋକଙ୍କୁ ବହୁ ସଂଖ୍ୟାରେ ପାଇଛନ୍ତି। ନିର୍ବାଚନ କମିଶନ ଶେଷରେ ବିଦେଶୀ ଅବୈଧ ପ୍ରବାସୀମାନଙ୍କୁ ସେମାନଙ୍କ ଜନ୍ମସ୍ଥାନ ଯାଞ୍ଚ କରି ହଟାଇବା ପାଇଁ ସାରା ଭାରତରେ ଭୋଟର ତାଲିକାର ଏକ ସ୍ୱତନ୍ତ୍ର ସମ୍ପୂର୍ଣ୍ଣ ସଂଶୋଧନ କରିବେ ।
ଚଳିତ ବର୍ଷ ବିହାରରେ ନିର୍ବାଚନ ହେବାକୁ ଥିବା ବେଳେ ଆସାମ, କେରଳ, ପଣ୍ଡିଚେରୀ, ତାମିଲନାଡୁ ଏବଂ ପଶ୍ଚିମବଙ୍ଗ ସମେତ ଅନ୍ୟ ପାଞ୍ଚଟି ରାଜ୍ୟରେ ବିଧାନସଭା ନିର୍ବାଚନ ୨୦୨୬ରେ ଅନୁଷ୍ଠିତ ହେବାକୁ ଯାଉଛି । ଯାହାକୁ ନେଇ ବିହାରରେ ଏସଆଇଆର ପ୍ରକ୍ରିୟା ଗତ ଜୁନ ୨୪ ରେ ଆରମ୍ଭ ହୋଇଥିଲା ଏବଂ ଗଣନା ଫର୍ମ ଦାଖଲ କରିବାର ଶେଷ ତାରିଖ ୨୫ ଜୁଲାଇ ରହିଛି ।
ତେବେ ଏହି ପ୍ରକ୍ରିୟାରେ ବୁଥ୍ ସ୍ତରୀୟ ଅଧିକାରୀ (BLO)ମାନେ ଘର ଘର ବୁଲି ଗଣନା ଏବଂ ସର୍ଭେ କରୁଛନ୍ତି। ଯେଉଁ ଭୋଟରଙ୍କ ନାମ ୧ ଜାନୁଆରୀ, ୨୦୦୩ ରେ ଭୋଟର ତାଲିକାରେ ଅନ୍ତର୍ଭୁକ୍ତ ହୋଇଥିଲା, ସେମାନଙ୍କୁ କେବଳ ଗଣନା ଫର୍ମ ପୂରଣ କରି ଦାଖଲ କରିବାକୁ ପଡିବ । ଯେଉଁମାନଙ୍କର ନାମ ୨୦୦୩ ପରେ ଯୋଡା ଯାଇଛି କିମ୍ବା ଯେଉଁମାନେ ପ୍ରଥମ ଥର ପାଇଁ ଭୋଟର ହେଉଛନ୍ତି, ସେମାନଙ୍କୁ ନାଗରିକତା ଏବଂ ବୟସ ପ୍ରମାଣ କରିବା ପାଇଁ ଡକ୍ୟୁମେଣ୍ଟ ଦାଖଲ କରିବାକୁ ପଡିବ। ଭୋଟରମାନେ ୧ ସେପ୍ଟେମ୍ବର, ୨୦୨୫ ପର୍ଯ୍ୟନ୍ତ ସେମାନଙ୍କର ଡକ୍ୟୁମେଣ୍ଟ ଦାଖଲ କରିପାରିବେ।
ତେବେ କହିରଖୁଛୁ, ବିହାର ବିଧାନସଭାର ବର୍ତ୍ତମାନର କାର୍ଯ୍ୟକାଳ ୨୨ ନଭେମ୍ବର, ୨୦୨୫ରେ ଶେଷ ହେଉଛି। ଭାରତୀୟ ନିର୍ବାଚନ କମିଶନ (ECI) ଦ୍ୱାରା ଏହି ତାରିଖ ପୂର୍ବରୁ ନିର୍ବାଚନ ପ୍ରକ୍ରିୟା ସମାପ୍ତ କରିବାକୁ ପଡିବ। ନିର୍ବାଚନ ଅକ୍ଟୋବର କିମ୍ବା ନଭେମ୍ବର ୨୦୨୫ରେ ହେବାର ସମ୍ଭାବନା ଅଛି। ନିର୍ବାଚନ ଦୁଇ କିମ୍ବା ତିନୋଟି ପର୍ଯ୍ୟାୟରେ ସମାପ୍ତ ହୋଇପାରେ। ଏପର୍ଯ୍ୟନ୍ତ ନିର୍ବାଚନ କମିଶନ ଆନୁଷ୍ଠାନିକ ଭାବରେ ତାରିଖ ଘୋଷଣା କରିନାହାଁନ୍ତି। ଆଶା କରାଯାଉଛି ଯେ ଦୀପାବଳି ଏବଂ ଛଟ୍ ଭଳି ପର୍ବକୁ ଧ୍ୟାନରେ ରଖି ତାରିଖ ସ୍ଥିର କରାଯିବ।
Comments are closed.