ଭାରତରେ ଟେସଲାର ପ୍ରଥମ ଚାର୍ଜିଂ ଷ୍ଟେସନ୍ ଆସନ୍ତା ସପ୍ତାହରେ ଖୋଲିବ; ପ୍ରାରମ୍ଭିକ ମୂଲ୍ୟ ରହିଛି…

ନୂଆଦିଲ୍ଲୀ: ଆମେରିକୀୟ ଇଲେକଟ୍ରିକ କାର ନିର୍ମାତା ଟେସଲା ଶୁକ୍ରବାର ଏକ ବଡ ଘୋଷଣା କରିଛି । ଟେସଲା ଆସନ୍ତା ସପ୍ତାହରେ ଭାରତରେ ଏହାର ପ୍ରଥମ ଚାର୍ଜିଂ ଷ୍ଟେସନ୍ ଲଞ୍ଚ କରିବ। ଏହି ପ୍ରଥମ ଚାର୍ଜିଂ ଷ୍ଟେସନ୍ ମୁମ୍ବାଇରେ ସ୍ଥାପନ କରାଯିବ, ଯାହା ଭାରତରେ ଟେସଲାର ଆନୁଷ୍ଠାନିକ ପ୍ରବେଶକୁ ଦର୍ଶାଉଛି ।

କମ୍ପାନୀ କହିଛି ଯେ ମୁମ୍ବାଇରେ ଖୋଲିବାକୁ ଥିବା ଏହି ଚାର୍ଜିଂ ଷ୍ଟେସନରେ ଚାରୋଟି V4 ସୁପରଚାର୍ଜିଂ ଷ୍ଟଲ୍ (DC ଚାର୍ଜିଂ) ଏବଂ ଚାରୋଟି ଡେଷ୍ଟିନେସନ୍ ଚାର୍ଜିଂ ଷ୍ଟଲ୍ (AC ଚାର୍ଜିଂ) ରହିବ। ସୁପରଚାର୍ଜିଂ ଷ୍ଟଲ୍ ଗୁଡ଼ିକ 250 kW ର ସର୍ବାଧିକ ଚାର୍ଜିଂ ଗତି ପ୍ରଦାନ କରେ ଏବଂ ଏହାର ପ୍ରାରମ୍ଭିକ ମୂଲ୍ୟ ₹ ୨୪ ପ୍ରତି kW ଅଟେ। ଡେଷ୍ଟିନେସନ୍ ଚାର୍ଜରଗୁଡ଼ିକ ୧୪ ଟଙ୍କା kWhରେ ୧୧kW ପ୍ରଦାନ କରିବ ।

ଟେସଲା ଏହା ମଧ୍ୟ ସୂଚନା ଦେଇଛି ଯେ ମୁମ୍ବାଇରେ ଖୋଲିବାକୁ ଥିବା ଏହି ଷ୍ଟେସନଟି କମ୍ପାନୀ ଦ୍ୱାରା ଘୋଷଣା କରାଯାଇଥିବା ଆଠଟି ସୁପରଚାର୍ଜିଂ ସାଇଟ ମଧ୍ୟରୁ ପ୍ରଥମ।

ଟେସଲା ଯାନବାହନ ପାଇଁ ଦେଶ ମଧ୍ୟରେ ଯାତ୍ରାକୁ ସହଜ ଏବଂ ସୁଗମ କରିବା ପାଇଁ କମ୍ପାନୀ ସାରା ଦେଶରେ ଏପରି ଚାର୍ଜିଂ ଷ୍ଟେସନ ସ୍ଥାପନ କରିବାକୁ ଯୋଜନା କରୁଛି।

ଗତ ମାସରେ, ଟେସଲା ଭାରତରେ ନିଜର ଲୋକପ୍ରିୟ ଇଲେକ୍ଟ୍ରିକ୍ SUV ମଡେଲ୍ Y ଲଞ୍ଚ କରିଥିଲା। ଏହାର ପ୍ରାରମ୍ଭିକ ମୂଲ୍ୟ ପ୍ରାୟ ୬୦ଲକ୍ଷ ଟଙ୍କା ମଧ୍ୟରେ ରଖାଯାଇଛି। କମ୍ପାନୀ ମୁମ୍ବାଇର ବାନ୍ଦ୍ରା-କୁର୍ଲା କମ୍ପ୍ଲେକ୍ସର ମେକର ମ୍ୟାକ୍ସିଟି ବାଣିଜ୍ୟିକ କମ୍ପ୍ଲେକ୍ସରେ ଏହାର ପ୍ରଥମ ଏକ୍ସପରିଏନ୍ସ ସେଣ୍ଟର ମଧ୍ୟ ଖୋଲିଛି।

କମ୍ପାନୀ ଅନୁଯାୟୀ, ଟେସଲାର ମଡେଲ Y ଏକ ସୁପରଚାର୍ଜରରୁ ମାତ୍ର ୧୫ ମିନିଟରେ ପ୍ରାୟ ୨୬୭ କିଲୋମିଟର ପର୍ଯ୍ୟନ୍ତ ରେଞ୍ଜ ଯୋଡ଼ିପାରିବ । ଏହି ଦୂରତା ମୁମ୍ବାଇର ଛତ୍ରପତି ଶିବାଜୀ ମହାରାଜ ଅନ୍ତର୍ଜାତୀୟ ବିମାନବନ୍ଦର ଏବଂ ଗେଟୱେ ଅଫ୍ ଇଣ୍ଡିଆ ମଧ୍ୟରେ ପାଞ୍ଚଥର ଯାତ୍ରା ସହ ସମାନ।

ଟେସଲା ଏହା ମଧ୍ୟ କହିଛି ଯେ ଏକ ନୂତନ ଟେସଲା ଗାଡ଼ି କିଣିବା ଉପରେ, ଗ୍ରାହକଙ୍କୁ ଏକ ମାଗଣା ୱାଲ୍ କନେକ୍ଟର ମଧ୍ୟ ଦିଆଯିବ, ଯାହା ଗ୍ରାହକଙ୍କ ଘରେ ଲଗାଯିବ। ଏହା ଗାଡ଼ି ମାଲିକମାନଙ୍କୁ ଘରେ ଚାର୍ଜ କରିବାର ସୁବିଧା ପ୍ରଦାନ କରିବ।