ପୃଥିବୀରୁ ୭୦୦ ମିଲିୟନ ଆଲୋକ ବର୍ଷ ଦୂର… ଦୁଇ ଗ୍ୟାଲେକ୍ସି ଗୋଟିଏ ସ୍ଥାନରେ, ମହାକାଶରେ ଉଦ୍ଭୂତ ଦୃଶ୍ୟ

ନୂଆଦିଲ୍ଲୀ: ମହାକାଶରେ ଘଟୁଥିବା ଏକ ଅଦ୍ଭୁତ ଘଟଣା ମହାକାଶ ବୈଜ୍ଞାନକଙ୍କୁ ଆଶ୍ଚର୍ଯ୍ୟ କରିଛି। ପୃଥିବୀରୁ ପ୍ରାୟ ୭୦୦ ମିଲିୟନ ଆଲୋକ ବର୍ଷ ଦୂରରେ, ଦୁଇଟି ବିଶାଳ ଗ୍ୟାଲାକ୍ସି ଏକ ମହାକାଶୀୟ ଖେଳରେ ଲିପ୍ତ। ପ୍ରଥମ ଥର ପାଇଁ, ଏକ ନିକଟବର୍ତ୍ତୀ ଗ୍ୟାଲାକ୍ସି କ୍ଲଷ୍ଟରରେ ବିଜ୍ଞାନୀମାନେ ଦେଖିଛନ୍ତି ଯେ, ଏକ ଗ୍ୟାଲାକ୍ସିରୁ ତାରାମାନେ ଅନ୍ୟ ଗ୍ୟାଲାକ୍ସି ଆଡ଼କୁ ଯାଉଛନ୍ତି। ଏହି ଅପୂର୍ବ ଦୃଶ୍ୟ ଅବେଲ ୩୬୬୭ ଗ୍ୟାଲାକ୍ସି କ୍ଲଷ୍ଟରରେ ଦେଖାଦେଇଛି। ଏଠାରେ ଏକ ଧୀମା କିନ୍ତୁ ବିଶାଳ ତାରାଙ୍କର ଧାରା ସୃଷ୍ଟି ହେଉଛି, ଯାହା ପ୍ରାୟ ୧୦ ଲକ୍ଷ ଆଲୋକ ବର୍ଷ ଲମ୍ବା। ଏହି ତାରାଙ୍କର ପୁଲ କ୍ଲଷ୍ଟରର ଦୁଇଟି ସବୁଠାରୁ ଉଜ୍ଜ୍ୱଳ ଗ୍ୟାଲାକ୍ସିକୁ ସଂଯୋଗ କରୁଛି।

ଦୁଇ କ୍ଲଷ୍ଟରର ମହାମିଳନ
ବୈଜ୍ଞାନିକଙ୍କ ମତରେ, ଅବେଲ ୩୬୬୭ ହେଉଛି ଦୁଇଟି ଛୋଟ କ୍ଲଷ୍ଟରର ମିଳନର ଫଳ। ଏହା ପ୍ରାୟ ଏକ ବିଲିୟନ ବର୍ଷ ପୂର୍ବେ ମିଶିବା ଆରମ୍ଭ କରିଥିଲା। ପ୍ରତ୍ୟେକ କ୍ଲଷ୍ଟରରେ ଥିଲା ନିଜର ପ୍ରମୁଖ କେନ୍ଦ୍ରୀୟ ଗ୍ୟାଲାକ୍ସି। ଏବେ ଏହି ଗ୍ୟାଲାକ୍ସି ଓ ସେମାନଙ୍କର ଉପଗ୍ରହ ଗ୍ୟାଲାକ୍ସିଗୁଡ଼ିକ ଏକାଠି ମିଶୁଛନ୍ତି। ଏହି ସମୟରେ ସୃଷ୍ଟି ହେଉଥିବା ତାରାଙ୍କର ପୁଲ ଏହାର ପୁରାତନ ଇତିହାସ ଏବଂ ଗୁରୁତ୍ୱାକର୍ଷଣ ଶକ୍ତିର ପ୍ରମାଣ। ବ୍ରାଉନ ୟୁନିଭର୍ସିଟିର ପିଏଚଡି ଗବେଷକ ଆନ୍ଥନୀ ଏଙ୍ଗଲର୍ଟ କହିଛନ୍ତି, “ଏତେ ବଡ଼ ପରିମାଣରେ ଏବଂ ଏତେ ନିକଟରେ ଥିବା କ୍ଲଷ୍ଟରରେ ଏପରି ଗଠନ ପ୍ରଥମ ଥର ପାଇଁ ଦେଖାଗଲା। ଏହା ଆମ ପାଇଁ ଏକ ବଡ଼ ଆଶ୍ଚର୍ଯ୍ୟ ଥିଲା।”

କିପରି ଦୃଶ୍ୟମାନ ହେଲା ଏହି ଅଦୃଶ୍ୟ ପୁଲ?
ଏହି ପୁଲ ଆସଲରେ ଇନ୍ଟ୍ରା-କ୍ଲଷ୍ଟର ଲାଇଟ (ICL) ରୁ ଗଠିତ। ଏହା ହେଉଛି ସେହି ତାରାମାନଙ୍କର ଆଲୋକ, ଯେଉଁମାନେ ନିଜ ମୂଳ ଗ୍ୟାଲାକ୍ସିରୁ ଛିନ୍ନ ହୋଇ ଖୋଲା ମହାକାଶରେ ଭାସୁଛନ୍ତି। ଏତେ ଧୀମା ଆଲୋକକୁ ଦେଖିବା ସହଜ ନଥିଲା। ଏଥିପାଇଁ ବିଜ୍ଞାନୀମାନେ ଚିଲିର ସେରୋ ଟୋଲୋଲୋ ଇଣ୍ଟର-ଆମେରିକାନ ଅବଜରଭେଟୋରୀରେ ଡାର୍କ ଏନର୍ଜି କ୍ୟାମେରା ମାଧ୍ୟମରେ ବହୁ ବର୍ଷ ଧରି ସଂଗ୍ରହୀତ ଡାଟାକୁ ଏକତ୍ର କରିଥିଲେ। ମୋଟ ୨୮ ଘଣ୍ଟାର ଡାଟାକୁ ଷ୍ଟକ କରି ଏହି ଚିତ୍ର ପ୍ରସ୍ତୁତ ହୋଇଛି।

ଏଙ୍ଗଲର୍ଟ କହିଛନ୍ତି, “ଏହା କେବଳ ସଂଯୋଗ ଥିଲା ଯେ ବହୁ ବର୍ଷ ଧରି ଅନେକ ବୈଜ୍ଞାନିକ ଅବେଲ ୩୬୬୭ର ଚିତ୍ର ଉଠାଇଥିଲେ, ଏବଂ ଆମେ ସେହି ସମସ୍ତ ପର୍ଯ୍ୟବେକ୍ଷଣକୁ ଏକତ୍ର କରି ଏହି ନଜାରା ଦେଖିପାରିଲୁ।”

ପୁଲର ଦୁଇ ପ୍ରାନ୍ତରେ ରୋଚକ ଗ୍ୟାଲାକ୍ସି
ଏହି ପୁଲର ଉପର ପ୍ରାନ୍ତରେ ରହିଛି ଆଇସି ୪୯୬୫, ଯାହା ଏକ ଲେଣ୍ଟିକୁଲାର (ଡିସ୍କ ପରି) ଗ୍ୟାଲାକ୍ସି। ଏହା ନିକଟରେ କିଛି ଛୋଟ ଗ୍ୟାଲାକ୍ସି ମଧ୍ୟ ରହିଛନ୍ତି, ଯେଉଁମାନେ ଏବେ କ୍ଲଷ୍ଟରରେ ମିଶୁଛନ୍ତି। ନିମ୍ନ ପ୍ରାନ୍ତରେ ରହିଛି ଜୋ୧୭୧, ଯାହାକୁ ‘ଜେଲିଫିସ ଗ୍ୟାଲାକ୍ସି’ କୁହାଯାଏ। ଏହାର ଏକ ପର୍ଶ୍ୱରୁ ଲମ୍ବା ଗ୍ୟାସ ଧାରା ବାହାରୁଛି। ଅବେଲ ୩୬୬୭ରେ ମିଶିବା ସମୟରେ ଜୋ୧୭୧ର ଗ୍ୟାସ ଭଣ୍ଡାର ଛିନ୍ନ ହେଉଛି, ଯାହାଦ୍ୱାରା ଏହାର କିଛି ଅଂଶରେ ନୂଆ ତାରା ଜନ୍ମ ବନ୍ଦ ହୋଇଯାଇଛି।

ଡାର୍କ ମାଟରର ପ୍ରଥମ ସମାଧାନର ସୂତ୍ର
ଏହି ତାରାଙ୍କର ପୁଲ କେବଳ ସୁନ୍ଦର ନୁହେଁ, ବରଂ ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ବିଜ୍ଞାନୀମାନେ ମାନନ୍ତି ଯେ ଇନ୍ଟ୍ରା-କ୍ଲଷ୍ଟର ଲାଇଟ ଡାର୍କ ମାଟରର ବିତରଣର ନକ୍ସା ଦେଖାଇଥାଏ। ଡାର୍କ ମାଟର ବ୍ରହ୍ମାଣ୍ଡର ୮୦% ଦ୍ରବ୍ୟମାନର ଅଂଶ, କିନ୍ତୁ ଏହା ଅଦୃଶ୍ୟ। ଏହି ଆଲୋକ ମାଧ୍ୟମରେ ବିଜ୍ଞାନୀମାନେ ଡାର୍କ ମାଟରର ଅବସ୍ଥାନ ଓ ବିସ୍ତାରର ଅନୁମାନ କରିପାରନ୍ତି।