ଜଲାଲାବାଦ: ଆଫଗାନିସ୍ତାନର ପୂର୍ବାଞ୍ଚଳରେ ରବିବାର ରାତିରେ ଏକ ଶକ୍ତିଶାଳୀ ଭୂକମ୍ପ ଆସିଛି। ଏହାର ତୀବ୍ରତା ୬.୦ ଥିଲା। ଭୂକମ୍ପର କେନ୍ଦ୍ର ନଙ୍ଗରହାର ପ୍ରାନ୍ତର ଜଲାଲାବାଦ ନିକଟରେ ଥିଲା। ଏହାର ଗଭୀରତା ୮ କିଲୋମିଟର ବୋଲି ଆମେରିକୀୟ ଭୂବୈଜ୍ଞାନିକ ସର୍ଭେ (USGS) କହିଛି।
ନଙ୍ଗରହାର ସ୍ୱାସ୍ଥ୍ୟ ବିଭାଗର ମୁଖପାତ୍ର ଅଜମଲ ଦରୱେଶଙ୍କ କହିବା ଅନୁଯାୟୀ, ଏହି ଭୂକମ୍ପରେ ୨୫୦ ଜଣଙ୍କର ମୃତ୍ୟୁ ହୋଇଛି। ୫୦୦ରୁ ଅଧିକ ଲୋକ ଆହତ ହୋଇଛନ୍ତି। ଆହତମାନଙ୍କୁ ସ୍ଥାନୀୟ ଡାକ୍ତରଖାନାରେ ଭର୍ତ୍ତି କରାଯାଇଛି। ଅନେକ ଅଞ୍ଚଳରେ ବ୍ୟାପକ କ୍ଷୟକ୍ଷତି ହୋଇଛି।
ପ୍ରଥମ ଭୂକମ୍ପର ୨୦ ମିନିଟ ପରେ ଆଉ ଏକ ଭୂକମ୍ପ ଆସିଥିଲା। ଏହାର ତୀବ୍ରତା ୪.୫ ଓ ଗଭୀରତା ୧୦ କିଲୋମିଟର ଥିଲା। ଏହି ଝଟକା ରାତି ୧୧ଟା ୪୭ରେ ଅନୁଭୂତ ହୋଇଥିଲା। ଏହି ଭୂକମ୍ପର ଝଟକା ଭାରତର ଦିଲ୍ଲୀ-ଏନସିଆର ଓ ପାକିସ୍ତାନରେ ମଧ୍ୟ ଅନୁଭୂତ ହୋଇଥିଲା।
ଗତ ମାସକ ମଧ୍ୟରେ ଆଫଗାନିସ୍ତାନରେ ଏହା ପଞ୍ଚମ ଭୂକମ୍ପ। ଏହି ଦେଶ ଭୂକମ୍ପର ଦୃଷ୍ଟିରୁ ଅତି ସମ୍ବେଦନଶୀଳ। ଏହା ପୂର୍ବରୁ ୨୭ ଅଗଷ୍ଟରେ ୫.୪ ତୀବ୍ରତା, ୧୭ ଅଗଷ୍ଟରେ ୪.୯ ତୀବ୍ରତା, ୧୩ ଅଗଷ୍ଟରେ ୪.୨ ତୀବ୍ରତା ଓ ୮ ଅଗଷ୍ଟରେ ୪.୩ ତୀବ୍ରତାର ଭୂକମ୍ପ ଆସିଥିଲା।
୨୦୨୩ ଅକ୍ଟୋବର ୭ରେ ଆଫଗାନିସ୍ତାନରେ ୬.୩ ତୀବ୍ରତାର ଏକ ଭୂକମ୍ପ ଆସିଥିଲା। ତାଲିବାନ ସରକାରଙ୍କ ଅନୁମାନ ଅନୁଯାୟୀ, ଏଥିରେ ୪ ହଜାର ଲୋକଙ୍କର ମୃତ୍ୟୁ ହୋଇଥିଲା। ସଂଯୁକ୍ତ ରାଷ୍ଟ୍ର ମୃତ୍ୟୁ ସଂଖ୍ୟା ୧,୫୦୦ ବୋଲି କହିଥିଲା। ଏହା ଆଫଗାନିସ୍ତାନର ଏକ ଭୟଙ୍କର ପ୍ରାକୃତିକ ବିପର୍ଯ୍ୟୟ ଥିଲା।
ଭୂକମ୍ପର ତୀବ୍ରତା ରିକ୍ଟର ସ୍କେଲରେ ମପାଯାଏ। ଏହା ୧ରୁ ୯ ପର୍ଯ୍ୟନ୍ତ ମାପ କରେ। ଭୂକମ୍ପର କେନ୍ଦ୍ର ବା ଏପିସେଣ୍ଟରରୁ ଏହା ମାପାଯାଏ। ଭୂମି ଭିତରୁ ନିର୍ଗତ ଶକ୍ତିର ମାତ୍ରା ଏହା ଦର୍ଶାଏ। ଏହା ଅନୁସାରେ ଭୂକମ୍ପର ଭୟାବହତା ଜଣାପଡ଼େ।
Comments are closed.