Russia-Ukraine war: ‘ୟୁକ୍ରେନରେ ସୈନ୍ୟ ମୁତୟନ ହେଲେ, ଗୁଳି ବର୍ଷିବ’, କାହିଁକି ୟୁରୋପ ଏବଂ ଆମେରିକାକୁ ଧମକ ଦେଲେ ପୁଟିନ୍?

ନୂଆଦିଲ୍ଲୀ: ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନ ଶୁକ୍ରବାର ଚେତାବନୀ ଦେଇଛନ୍ତି ଯେ ଯଦି ପଶ୍ଚିମ ଦେଶଗୁଡ଼ିକ ୟୁକ୍ରେନରେ ସେମାନଙ୍କର ସୈନ୍ୟ ନିୟୋଜନ କରନ୍ତି, ତେବେ ରୁଷ ସେନା ଏହାକୁ ଏକ ବୈଧ ଲକ୍ଷ୍ୟ ବୋଲି ବିବେଚନା କରିବ । ଅର୍ଥାତ୍ ଏହା ସିଧାସଳଖ ସେମାନଙ୍କ ଉପରେ ଆକ୍ରମଣ କରିବ। ତେବେ ୟୁକ୍ରେନରେ ଶାନ୍ତି ଚୁକ୍ତି ହେଲେ ସୁରକ୍ଷା ଗ୍ୟାରେଣ୍ଟି ସୁନିଶ୍ଚିତ କରିବା ପାଇଁ ପଶ୍ଚିମ ଦେଶମାନଙ୍କର ଏକ ସମ୍ମିଳନୀ ଅନୁଷ୍ଠିତ ହୋଇଛି। ରୁଷ ସହିତ କୌଣସି ଯୁଦ୍ଧବିରତି ଚୁକ୍ତି ନହେବା ପରେ, ୨୬ ଟି ଦେଶ ୟୁକ୍ରେନର ସୁରକ୍ଷା ଗ୍ୟାରେଣ୍ଟି ଦେବା ପାଇଁ ସେମାନଙ୍କର ସୈନ୍ୟ ପଠାଇବାକୁ ପ୍ରସ୍ତାବ ଦେଇଛନ୍ତି । ଯାହାକୁ ନେଇ ଏବେ ଉତ୍ୟକ୍ତ ହୋଇଛନ୍ତି ପୁଟିନ୍ । ସିଧା ସେମାନଙ୍କୁ ସ୍ପଷ୍ଟ ଭାବରେ ଧମକ ଦେଇଛନ୍ତି।

ଏଏଫପି ରିପୋର୍ଟ ଅନୁଯାୟୀ, ପୁଟିନ ରୁଷର ପୂର୍ବ ସହର ଭ୍ଲାଦିଭୋଷ୍ଟକରେ ଏକ ଅର୍ଥନୈତିକ ଫୋରମରେ କହିଥିଲେ, ଯଦି କିଛି ସୈନ୍ୟ ସେଠାରେ ଦେଖାଯାଆନ୍ତି, ବିଶେଷକରି ବର୍ତ୍ତମାନ ଯୁଦ୍ଧ ସମୟରେ, ତେବେ ଆମେ ଏହି ଆଧାରରେ ଆଗକୁ ବଢ଼ୁଛୁ ଯେ ସେମାନେ ବୈଧ ଟାର୍ଗେଟ ହେବେ । ସେ କହିଛନ୍ତି ଯେ ଏପରି ଏକ ବାହିନୀର ନିୟୋଜିତ ଦୀର୍ଘକାଳୀନ ଶାନ୍ତି ପାଇଁ ଭଲ ନୁହେଁ, ଏବଂ ସେ ଏହା ମଧ୍ୟ କହିଛନ୍ତି ଯେ ପଶ୍ଚିମ ଦେଶମାନଙ୍କ ସହିତ ୟୁକ୍ରେନର ଘନିଷ୍ଠ ସାମରିକ ସମ୍ପର୍କ ଏହି ସଂଘର୍ଷର “ମୂଳ କାରଣ” ମଧ୍ୟରୁ ଗୋଟିଏ।

ତେବେ ଫେବୃଆରୀ ୨୦୨୨ରେ ରୁଷ ଦ୍ୱାରା ଆରମ୍ଭ ହୋଇଥିବା ଯୁଦ୍ଧର ଅନ୍ତ ପାଇଁ ଏକ ଶାନ୍ତି ଚୁକ୍ତିନାମା ପାଇଁ ଚେଷ୍ଟା କରାଯାଉଛି। ଏପରି ପରିସ୍ଥିତିରେ, ଫ୍ରାନ୍ସ ଏବଂ ବ୍ରିଟେନଙ୍କ ନେତୃତ୍ୱରେ ମୋଟ ୨୬ଟି ଦେଶ ପ୍ରତିଶ୍ରୁତି ଦେଇଛନ୍ତି ଯେ ସେମାନେ ଯୁଦ୍ଧବିରତି ପରେ ୟୁକ୍ରେନକୁ ସୁରକ୍ଷା ଦେବା ପାଇଁ ସ୍ଥଳ, ସମୁଦ୍ର ଏବଂ ଆକାଶରେ ଆଶ୍ୱାସନା ବାହିନୀ ମୁତୟନ କରିବେ। ଏହି ଯୁଦ୍ଧ ଆରମ୍ଭ ହେବାର ପ୍ରାୟ ସାଢ଼େ ତିନି ବର୍ଷ ହୋଇଗଲାଣି। ଏପର୍ଯ୍ୟନ୍ତ ଯୁଦ୍ଧରେ ହଜାର ହଜାର ଲୋକ ପ୍ରାଣ ହରାଇଛନ୍ତି, ଏହା ଲକ୍ଷ ଲକ୍ଷ ଲୋକଙ୍କୁ ସେମାନଙ୍କ ଘର ଛାଡିବାକୁ ବାଧ୍ୟ କରିଛି। ଦ୍ୱିତୀୟ ବିଶ୍ୱଯୁଦ୍ଧ ପରେ ଏହା ୟୁରୋପର ସବୁଠାରୁ ରକ୍ତାକ୍ତ ସଂଘର୍ଷ ଏବଂ ଏହାର ପୂର୍ବ, ଦକ୍ଷିଣ ୟୁକ୍ରେନର ଅଧିକାଂଶ ଅଂଶକୁ ନଷ୍ଟ କରିଦେଇଛି।

ୟୁକ୍ରେନ କହିଛି ଯେ ପଶ୍ଚିମ ସୈନ୍ୟମାନଙ୍କ ଦ୍ୱାରା ସମର୍ଥିତ ସୁରକ୍ଷା ଗ୍ୟାରେଣ୍ଟି, ଯେକୌଣସି ଚୁକ୍ତି ପାଇଁ ଗୁରୁତ୍ୱପୂର୍ଣ୍ଣ ଯାହା ନିଶ୍ଚିତ କରିବ ଯେ ଭବିଷ୍ୟତରେ ରୁଷ ଏହାର ଆକ୍ରମଣ ପୁଣି ଆରମ୍ଭ କରିବ ନାହିଁ।

ଅପରପକ୍ଷରେ ୟୁକ୍ରେନରେ ଶାନ୍ତି ଚୁକ୍ତି ହେଲେ ସୁରକ୍ଷା ଗ୍ୟାରେଣ୍ଟି ସୁନିଶ୍ଚିତ କରିବା ପାଇଁ ଗୁରୁବାର ଏକ ଶିଖର ସମ୍ମିଳନୀ ଅନୁଷ୍ଠିତ ହୋଇଥିଲା। ଏହି ମିଳିତତାର ନାମ ହେଉଛି କିଭ୍ “କୋଏଲିସନ ଅଫ୍ ଓ୍ବିଲିଙ୍ଗସ(ଇଚ୍ଛାର ମିଳିତତା)”। ଏହି ଶିଖର ସମ୍ମିଳନୀ ପରେ, ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ସହିତ ଏକ ଭିଡିଓ କନଫରେନ୍ସ ମଧ୍ୟ ଅନୁଷ୍ଠିତ ହୋଇଥିଲା। ଯେଉଁଥିରେ ୨୬ ଟି ଦେଶ ୟୁକ୍ରେନର ସୁରକ୍ଷା ଗ୍ୟାରେଣ୍ଟି ଦେବା ପାଇଁ ସେମାନଙ୍କର ସୈନ୍ୟ ପଠାଇବାକୁ ପ୍ରସ୍ତାବ ଦେଇଛନ୍ତି ।

ତେବେ ୟୁକ୍ରେନର ସହଯୋଗୀମାନେ ସେମାନଙ୍କର ସୈନ୍ୟ ନିୟୋଜିତ ଯୋଜନାର କୌଣସି ନିର୍ଦ୍ଦିଷ୍ଟ ବିବରଣୀ ଦେଇନାହାଁନ୍ତି। ଏଥିରେ କେତେ ସୈନିକ ସାମିଲ ହେବେ ଏବଂ କେଉଁ ଦେଶରୁ କେତେ ସୈନିକ ପଠାଯିବ ତାହା କୁହାଯାଇ ନାହିଁ।

ଫ୍ରାନ୍ସ ରାଷ୍ଟ୍ରପତି ଇମାନୁଏଲ ମାକ୍ରନ ଶିଖର ସମ୍ମିଳନୀ ପରେ ଗଣମାଧ୍ୟମକୁ କହିଥିଲେ, ଯେ ଆମର ୨୬ ଟି ଦେଶ ଆନୁଷ୍ଠାନିକ ଭାବରେ ପ୍ରତିଶ୍ରୁତି ଦେଇଛନ୍ତି ଯେ ୟୁକ୍ରେନରେ ‘ଆଶ୍ୱାସନା ବାହିନୀ’ ଭାବରେ ସ୍ଥଳ, ସମୁଦ୍ର କିମ୍ବା ଆକାଶରେ ଉପସ୍ଥିତ ରହିବା ପାଇଁ ସୈନ୍ୟ ନିୟୋଜିତ କରାଯିବ। ଅନ୍ୟ କିଛି ଦେଶ ଏପର୍ଯ୍ୟନ୍ତ କୌଣସି ନିଷ୍ପତ୍ତି ନେଇନାହାଁନ୍ତି । ଏଥିସହିତ ଏଥିରେ ଆମେରିକାର ଯୋଗ ନେଇ ସେ କହିଛନ୍ତି ଯେ ଆମେରିକା ଏହାକୁ ସମର୍ଥନ କରିବ କି ନାହିଁ ତାହା ଆଗାମୀ ଦିନରେ ଜଣାପଡିବ ।