ନୂଆଦିଲ୍ଲୀ: ୟୁକ୍ରେନରେ ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ଚାଲିଥିବା ଯୁଦ୍ଧ ମଧ୍ୟରେ, ୟୁରୋପ ତୃତୀୟ ବିଶ୍ୱଯୁଦ୍ଧର ବିପଦ ବିରୁଦ୍ଧରେ ପ୍ରସ୍ତୁତି ଆରମ୍ଭ କରିଛି। ମସ୍କୋର ବାରମ୍ବାର ବିମାନ ଆକ୍ରମଣ ସୁରକ୍ଷା ବିପଦ ସୃଷ୍ଟି କରିବା ପରେ, ୟୁରୋପ ଏକ ଅବିଶ୍ୱସନୀୟ ଯୋଜନା ବିକଶିତ କରିଛି, ଯେଉଁଥିରେ ଏକ ଏୟାର ସିଲ୍ଡ, ସ୍ପେସ୍ ସିଲ୍ଡ, ଡ୍ରୋନ୍ ୱାଲ୍ ଏବଂ ଫ୍ଲାଙ୍କ୍ ୱାଚ୍ ଅନ୍ତର୍ଭୁକ୍ତ। ବର୍ତ୍ତମାନ, ୟୁରୋପ ମହାଦେଶ ପୁଟିନଙ୍କ ଆକ୍ରମଣ ବିରୁଦ୍ଧରେ ନିଜର ପ୍ରସ୍ତୁତିକୁ ଯୁଦ୍ଧକାଳୀନ ଭିତ୍ତିରେ ନେଉଛି। ୟୁରୋପୀୟ ସୀମା ଏବଂ ବିମାନବନ୍ଦର ଉପରେ ଡ୍ରୋନ୍ ଆକ୍ରମଣର ଏକ ସିରିଜ୍ ପରେ ଏହି ନିଷ୍ପତ୍ତି ଆସିଛି। ଯାହା ପ୍ରମୁଖ ବିମାନବନ୍ଦରଗୁଡ଼ିକରେ କାର୍ଯ୍ୟକୁ ଅଚଳ କରିଦେଇଛି।
ମୁକାବିଲା ପାଇଁ ପ୍ରସ୍ତୁତ ହେଉଛି ୟୁରୋପ
ବ୍ରିଟିଶ ଗଣମାଧ୍ୟମ ଦି ସନରେ ପ୍ରକାଶିତ ରିପୋର୍ଟ ଅନୁଯାୟୀ, ୟୁରୋପୀୟ କମିଶନ ଏବେ ଚାରୋଟି ପ୍ରମୁଖ ୟୁରୋପୀୟ ପ୍ରତିରକ୍ଷା ପ୍ରକଳ୍ପ ପ୍ରସ୍ତାବ ଦେଇଛି, ଯେଉଁଥିରେ ଏକ ଡ୍ରୋନ୍-ବିରୋଧୀ ପ୍ରଣାଳୀ ଏବଂ ପୂର୍ବ ସୀମାକୁ ସୁଦୃଢ଼ କରିବା ପାଇଁ ଏକ ଯୋଜନା ଅନ୍ତର୍ଭୁକ୍ତ। ଏହା ପଛରେ ରଣନୀତି ହେଉଛି ୨୦୩୦ ସୁଦ୍ଧା ସମ୍ଭାବ୍ୟ ରୁଷୀୟ ଆକ୍ରମଣରୁ ରକ୍ଷା ପାଇବା। ଯାହାକୁ ନେଇ ୟୁରୋପୀୟ ବାୟୁ ସୁରକ୍ଷା ନିର୍ମାଣ କରିବାର ଯୋଜନା ରଖିଛି, ଯାହା କ୍ଷେପଣାସ୍ତ୍ର ଏବଂ ଅନ୍ୟାନ୍ୟ ବାୟୁ ବିପଦରୁ ରକ୍ଷା କରିବ। ଏହା ବ୍ୟତୀତ, ମହାକାଶରେ ବିପଦର ମୁକାବିଲା କରିବା ଏବଂ ୟୁରୋପୀୟ ମହାକାଶ ସମ୍ପତ୍ତିକୁ ସୁରକ୍ଷା ଦେବା ପାଇଁ ଏକ ୟୁରୋପୀୟ ସ୍ପେସ୍ ସିଲ୍ଡ ତିଆରି କରାଯିବ। ନାଟୋର ପୂର୍ବ ପାର୍ଶ୍ୱରେ ଏକ ବହୁ-ସ୍ତରୀୟ ବାୟୁ ପ୍ରତିରକ୍ଷା ପ୍ରଣାଳୀ ନିର୍ମାଣ କରାଯିବ, ଯାହା ଡ୍ରୋନଗୁଡ଼ିକୁ ଚିହ୍ନଟ ଏବଂ ଖସାଇବାରେ ସାହାଯ୍ୟ କରିବ। ଏଥିସହିତ ଏକ ବ୍ୟାପକ ପୂର୍ବ ଫ୍ଲାଙ୍କ୍ ୱାଚ୍ ରଣନୀତି ରହିଛି, ଯାହା ୨୦୨୮ ଶେଷ ସୁଦ୍ଧା ରୁଷର ନିକଟତମ EU ସୀମାରେ ବାୟୁ ଏବଂ ସ୍ଥଳ ସୁରକ୍ଷାକୁ ସୁଦୃଢ଼ କରିବା ପାଇଁ ଡିଜାଇନ୍ କରାଯାଇଛି। ସେପଟେ, ୟୁରୋପୀୟ ଦେଶମାନେ ଡ୍ରୋନ୍ ପ୍ରାଚୀର ମାଧ୍ୟମରେ ସୀମା ସୁରକ୍ଷା ବିଷୟରେ ଆଲୋଚନା କରିବା ପାଇଁ ଏକ ଭର୍ଚୁଆଲ୍ ବୈଠକ କରିଛନ୍ତି। ଯେଉଁଥିରେ ବାଲ୍ଟିକ୍ ଗଣରାଜ୍ୟ, ପୋଲାଣ୍ଡ, ରୋମାନିଆ, ବୁଲଗେରିଆ ଏବଂ ୟୁକ୍ରେନ ଯୋଗ ଦେଇଥିଲେ । ୟୁରୋପୀୟ ଅଧିକାରୀମାନେ କହିଛନ୍ତି ଯେ ଏହା ଏକ ସମୟୋଚିତ ନିଷ୍ପତ୍ତି। ଯାହା ରୁଷୀୟ ଆକ୍ରମଣକୁ ରୋକିବାକୁ ଏକ ମିଳିତ ପ୍ରୟାସ ।
ଥମୁନି ଆକ୍ରମଣ
ରୁଷ ଏବଂ ୟୁକ୍ରେନ ମଧ୍ୟରେ ଯୁଦ୍ଧ ଥମିବାର ନାଁ ନେଉନାହିଁ । ଆଜି ପୁଣି ରୁଷ ଶହ ଶହ ଡ୍ରୋନ ଏବଂ ଡଜନ ଡଜନ କ୍ଷେପଣାସ୍ତ୍ର ସାହାଯ୍ୟରେ ୟୁକ୍ରେନୀୟ ଶକ୍ତି କେନ୍ଦ୍ର ଉପରେ ଆକ୍ରମଣ କରିଛି। ଏହି ଆକ୍ରମଣ ଠିକ୍ ସେହି ସମୟରେ ହୋଇଛି ଯେତେବେଳେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏବଂ ୟୁକ୍ରେନୀୟ ରାଷ୍ଟ୍ରପତି ଭୋଲୋଦିମିର ଜେଲେନ୍ସକିଙ୍କ ମଧ୍ୟରେ ଏକ ପ୍ରମୁଖ ବୈଠକ ସ୍ଥିର ହୋଇଛି। ଜେଲେନସ୍କି ଟ୍ରମ୍ପଙ୍କ ସମର୍ଥନ ଲୋଡ଼ିବା ପରେ ମାସକ ମଧ୍ୟରେ ରୁଷିଆର ଆଜି ସବୁଠାରୁ ବଡ଼ ଡ୍ରୋନ୍ ଆକ୍ରମଣ କରିଛି । ଯାହା ୟୁକ୍ରେନକୁ ଅନ୍ଧାରରେ ଢାକି ଦେଇଛି। ଡ୍ରୋନ୍ ଏବଂ କ୍ଷେପଣାସ୍ତ୍ର ଆକ୍ରମଣ ପରେ ଆଠଟି ୟୁକ୍ରେନୀୟ ଅଞ୍ଚଳରେ ବିଦ୍ୟୁତ୍ ବିଭ୍ରାଟ ସୃଷ୍ଟି ହୋଇଛି । ଦେଶର ସର୍ବବୃହତ ଘରୋଇ ଶକ୍ତି କମ୍ପାନୀ, DTEK, ରାଜଧାନୀ କିଭରେ ବିଦ୍ୟୁତ୍ ବିଭ୍ରାଟ ରିପୋର୍ଟ କରିଛି ଏବଂ କହିଛି ଯେ ଆକ୍ରମଣ ଯୋଗୁଁ କେନ୍ଦ୍ରୀୟ ପୋଲ୍ଟାଭା ଅଞ୍ଚଳରେ ପ୍ରାକୃତିକ ଗ୍ୟାସ୍ ଉତ୍ତୋଳନକୁ ବନ୍ଦ କରିବାକୁ ପଡିଛି। ଯାହାକୁ ନେଇ ୟୁକ୍ରେନୀୟ ରାଷ୍ଟ୍ରପତି ଭୋଲୋଦିମିର ଜେଲେନ୍ସକି ଦାବି କରିଛନ୍ତି ଯେ, ରୁଷିଆ ରାତାରାତି ୟୁକ୍ରେନରେ ୩୦୦ ରୁ ଅଧିକ ଡ୍ରୋନ୍ ଏବଂ ୩୭ ଟି କ୍ଷେପଣାସ୍ତ୍ର ମାଡ଼ କରିଛି। ସେ ରୁଷିଆକୁ କ୍ଲଷ୍ଟର ଯୁଦ୍ଧାସ୍ତ୍ର ବ୍ୟବହାର କରି ବାରମ୍ବାର ସମାନ ଲକ୍ଷ୍ୟସ୍ଥଳରେ ଆକ୍ରମଣ କରୁଥିବା ଅଭିଯୋଗ କରିଛନ୍ତି ।
କାହିଁକି ଡ୍ରୋନ୍ ଓ୍ବାଲ ଯୋଜନା?
ୟୁରୋପୀୟ ରାଷ୍ଟ୍ରଗୁଡ଼ିକ, ବିଶେଷକରି ନାଟୋର ପୂର୍ବ ପାର୍ଶ୍ୱରେ ଥିବା ରାଷ୍ଟ୍ରଗୁଡ଼ିକ, ବର୍ତ୍ତମାନ ଏକ ବହୁ-ସ୍ତରୀୟ ବାୟୁ ପ୍ରତିରକ୍ଷା ପ୍ରଣାଳୀ ନିର୍ମାଣ କରିବାକୁ ଯୋଜନା କରୁଛନ୍ତି ଯାହା ଡ୍ରୋନଗୁଡ଼ିକୁ ଶୀଘ୍ର ଚିହ୍ନଟ କରିବାରେ ଏବଂ ସେଗୁଡ଼ିକୁ ଖସାଇବାରେ ସାହାଯ୍ୟ କରିବ। ଏହି “ଡ୍ରୋନ୍ ପ୍ରାଚୀର” ସହିତ ସେମାନଙ୍କର ସୀମାକୁ କିପରି ସୁରକ୍ଷିତ ରଖାଯିବ ତାହା ମୂଲ୍ୟାଙ୍କନ କରିବା ପାଇଁ ଶୁକ୍ରବାର ଦିନ ଅନେକ ଆଗୁଆ ୟୁରୋପୀୟ ରାଷ୍ଟ୍ର ଏକ ଭର୍ଚୁଆଲ୍ ବୈଠକରେ ଯୋଗ ଦେଇଥିଲେ। ସେମାନଙ୍କ ମଧ୍ୟରେ ୟୁକ୍ରେନ ସହିତ ବାଲ୍ଟିକ୍ ଗଣରାଜ୍ୟ, ପୋଲାଣ୍ଡ, ରୋମାନିଆ ଏବଂ ବୁଲଗେରିଆ ଅନ୍ତର୍ଭୁକ୍ତ। ଯଦିଓ ୟୁକ୍ରେନ ଏହି ପ୍ରକଳ୍ପର ଅଂଶ ନୁହେଁ, କିନ୍ତୁ ଡ୍ରୋନକୁ ଖସାଇବାରେ ଏହାର ସର୍ବାଧିକ ଦକ୍ଷତା ଅଛି। ତେବେ ଏହାର ମୁଖ୍ୟ କାରଣ ହେୁଛି ରୁଷୀୟ ଡ୍ରୋନ୍ ନାଟୋ ଦେଶ ଠାରୁ କିଛି ଦୂରରେ ପରୀକ୍ଷଣ କରାଯିବା । ଏଥିସହିତ ଡେନମାର୍କ, ପୋଲିଶ୍ ଏବଂ ରୋମାନିଆ ଅଞ୍ଚଳରେ ରୁଷୀୟ ଡ୍ରୋନ ଅନୁପ୍ରବେଶ ଏବଂ ରୁଷୀୟ ଯୁଦ୍ଧ ବିମାନ ଦ୍ୱାରା ଏଷ୍ଟୋନିଆନ ଏୟାରସ୍ପେସ ଉଲ୍ଲଙ୍ଘନ ହୋଇଥିଲା। ଯାହାକୁ ନେଇ ୟୁକ୍ରେନୀୟ ଅଧିକାରୀମାନେ ଦାବି କରିଛନ୍ତି ଯେ ଅନ୍ୟ ଦେଶର ଆକାଶ ସୀମାରେ ରୁଷର ଅନୁପ୍ରବେଶ ଜାଣିଶୁଣି କରାଯାଇଛି। “ପୁଟିନ୍ କେବଳ ଭୟ ବୃଦ୍ଧି କରୁଛନ୍ତି, ତାଙ୍କର ଯୁଦ୍ଧକୁ ବିସ୍ତାର କରୁଛନ୍ତି ଏବଂ ପଶ୍ଚିମକୁ ପରୀକ୍ଷା କରୁଛନ୍ତି,” ୟୁକ୍ରେନର ବୈଦେଶିକ ମନ୍ତ୍ରୀ ଆଣ୍ଡ୍ରି ସିବିହା ପୋଷ୍ଟ କରିଛନ୍ତି।
Comments are closed.