ମହିଳା କ୍ରିକେଟ୍ ଟିମକୁ ଦିଦିଙ୍କ ଶୁଭେଚ୍ଛା ବାର୍ତ୍ତା ନେଇ ଆରମ୍ଭ ହେଲା ବିଜେପି-ଟିଏମସିର ରାଜନୈତିକ ଖେଳ

ନୂଆଦିଲ୍ଲୀ: ରବିବାର ଦିନ ଭାରତର ମହିଳା କ୍ରିକେଟ୍ ଦଳ ପ୍ରଥମ ଥର ପାଇଁ ବିଶ୍ୱକପ୍ ଜିତି ଇତିହାସ ରଚିଛି। ବିଶ୍ୱକପ୍ ଜିତିବା ପାଇଁ ଭାରତୀୟ ମହିଳା କ୍ରିକେଟ୍ ଦଳକୁ ଦେଶ ଏବଂ ବିଦେଶରୁ ନିରନ୍ତର ଅଭିନନ୍ଦନ ମିଳୁଛି। ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ମଧ୍ୟ ଶୁଭେଚ୍ଛା ଜଣାଇଛନ୍ତି। ଏହି ଗୌରବମୟ ବିଜୟର ଶୁଭେଚ୍ଛା ବାର୍ତ୍ତାକୁ ନେଇ ମଧ୍ୟ ରାଜନୀତି ଜୋର ଧରିଛି। ମମତା ବାନାର୍ଜୀଙ୍କ ଏକ ପୁରୁଣା ବୟାନକୁ ନେଇ ଟାର୍ଗେଟ କରିଛି ବିଜେପି। ସେ ଝିଅମାନଙ୍କୁ ଏକ ଦୁଷ୍କର୍ମ ଘଟଣା ପରେ ରାତି ୮ ଟା ସୁଦ୍ଧା ଘରକୁ ଫେରିବାକୁ ପରାମର୍ଶ ଦେଇଥିଲେ। ଏହି ବୟାନ ପାଇଁ ବିଜେପି ତାଙ୍କୁ ଟାର୍ଗେଟ କରିଛି।

ଯେତେବେଳେ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ମହିଳା ଖେଳାଳିମାନଙ୍କୁ ଟିମ୍ ଇଣ୍ଡିଆର ବିଜୟ ପାଇଁ ଅଭିନନ୍ଦନ ଜଣାଇଥିଲେ, ବିଜେପି ତୁରନ୍ତ ତାଙ୍କ ଉପରେ କଟାକ୍ଷ କରିଥିଲା। ବାନାର୍ଜୀଙ୍କ ଏକ୍ସରେ ଅଭିନନ୍ଦନ ପୋଷ୍ଟ କରିଥିଲେ। ଏହି ପୋଷ୍ଟ ପରେ, ବିଜେପି ତାଙ୍କୁ ତାଙ୍କର ପୂର୍ବ ବକ୍ତବ୍ୟ ମନେ ପକାଇ ଦେଇ ଲେଖିଥିଲା, “ହେ ଭଗବାନ, ସେମାନେ ରାତି ୧୨ଟା ପର୍ଯ୍ୟନ୍ତ ଖେଳୁଥିଲେ, କିନ୍ତୁ ଆପଣ କହିଥିଲେ ଯେ ଝିଅମାନେ ରାତି ୮ଟାରେ ଘରକୁ ଫେରିବା ଉଚିତ!”

ଦୁର୍ଗାପୁରର ଏକ ଘରୋଇ ମେଡିକାଲ କଲେଜରେ ଜଣେ ଛାତ୍ରୀଙ୍କ ସହ ଗଣଦୁଷ୍କର୍ମ ଅଭିଯୋଗ ପରେ ମମତା ବାନାର୍ଜୀ ଝିଅମାନଙ୍କୁ ବିଳମ୍ବିତ ରାତିରେ ଘରୁ ନ ବାହାରିବାକୁ ପରାମର୍ଶ ଦେଇଥିଲେ। ସେ କହିଥିଲେ, “ପଶ୍ଚିମବଙ୍ଗରେ ପଢ଼ିବାକୁ ଆସୁଥିବା ଛାତ୍ରୀମାନେ, ବିଶେଷକରି ଅନ୍ୟ ରାଜ୍ୟରୁ ଆସୁଥିବା ଝିଅମାନେ ହଷ୍ଟେଲ ନିୟମ ପାଳନ କରିବା ଉଚିତ। ସେମାନେ ବିଳମ୍ବିତ ରାତିରେ ବାହାରକୁ ଯିବା ଉଚିତ୍ ନୁହେଁ, ଯଦିଓ ସେମାନେ ଯେଉଁଠାକୁ ଚାହିଁବେ ସେଠାକୁ ଯିବାର ମୌଳିକ ଅଧିକାର ଅଛି।”

ଭାରତୀୟ ମହିଳା କ୍ରିକେଟ ଦଳର ଏକଦିବସୀୟ ବିଶ୍ୱକପରେ ଐତିହାସିକ ବିଜୟ ସାରା ଦେଶରେ ପାଳନ କରାଯାଇଥିଲା। ଏହା ଭାରତୀୟ ମହିଳା କ୍ରିକେଟ ପାଇଁ ଏକ ଗୁରୁତ୍ୱପୂର୍ଣ୍ଣ ମୁହୂର୍ତ୍ତ। ବର୍ଷ ବର୍ଷ ଧରି କଠିନ ପରିଶ୍ରମ ପରେ, ରବିବାର ରାତିରେ ଫାଇନାଲରେ ଦକ୍ଷିଣ ଆଫ୍ରିକାକୁ ୫୨ ରନରେ ପରାସ୍ତ କରି ହରମନପ୍ରୀତ କୌରଙ୍କ ନେତୃତ୍ୱାଧୀନ ଦଳ ବିଶ୍ୱର ଚତୁର୍ଥ ଦଳ ଭାବରେ ଏକଦିବସୀୟ ଟାଇଟଲ ଜିତି ଇତିହାସ ରଚିଛି।