ନୂଆପଡ଼ା/ଭୁବନେଶ୍ୱର: ନୂଆପଡ଼ା ଉପନିର୍ବାଚନ ପାଇଁ ବେଶ୍ ସରଗରମ ରହିଛି ବିଭିନ୍ନ ରାଜନୈତିକ ଦଳ। ଜୋରସୋରରେ ଚାଲିଛି ପ୍ରଚାର ପ୍ରସାର। ସେହିପରି ଦୁଇ ଦିନ ତଳେ ଶଙ୍ଖ ଛାଡି ପଦ୍ମ ଧରିଲେ ଅମର ପଟ୍ଟନାୟକ। ଯାହାକୁ ନେଇ ରାଜନୀତି ଏବେ ହଲଚଲ୍ ସୃଷ୍ଟି ହୋଇଛି। ଏନେଇ ନୂଆପଡା ଖୁଣ୍ଟିଆ ଭବନଠାରେ ପିସସି ମିଡ଼ିଆ ସେଲ ପକ୍ଷରୁ ଆୟୋଜିତ ସାମ୍ବାଦିକ ସମ୍ମିଳନୀରେ ଯୋଗଦେଇ ପୂର୍ବତନ ବିଧାୟକ ତଥା ପିସିସିର ବରିଷ୍ଠ ଉପସଭାପତି ଡ଼ ଦେବାଶିଷ ପଟ୍ଟନାୟକ ବିଜେପି ବିଜେଡିଙ୍କ ଭାତୃପ୍ରେମ ଏବଂ କେତେ ନିବିଡ଼ ତାହା ପ୍ରକାଶ କରିଛନ୍ତି।
ଡ ପଟ୍ଟନାୟକ କହିଛନ୍ତି, ଅମର ପଟ୍ଟନାୟକଙ୍କୁ ପାଞ୍ଚଜଣ ଲୋକ ଚିହ୍ନିବେକି ନାହିଁ ସନ୍ଦେହ । ମହାଶୟ ବିଜେପିରେ ମିଶିବାର ମାତ୍ର ଘଣ୍ଟାକ ପୂର୍ବରୁ ବିଜେଡି ସାମାଜିକ ଗଣମାଧ୍ୟମରେ ଉଦବୋଧନ ଦେଉଥିଲେ କିନ୍ତୁ ଏକ ଫୋନ ଆସିଲା ପରେ ବାବୁ ବିଜେପି ଅଫିସ ହାଜର ହୋଇ ଗେରୁଆ ପିନ୍ଧିଲେ ଓ ପ୍ରଧାନମନ୍ତ୍ରୀଙ୍କ ଭାଷଣ ମତେ ଆକୃଷ୍ଟ କରିଥିଲା ବୋଲି ଗୀତ ଗାଇଲେ। ବିଜେପିକୁ ସେ ଯେତେ ଗାଳି ଗୁଲଜ କରିଛନ୍ତି ତା ସତ୍ତ୍ୱେ ମଧ୍ୟ ବିଜେପି ତାଙ୍କୁ ନିଜ ଦଳକୁ ନେବା ଆଶ୍ଚର୍ଯ୍ୟ ବିଷୟ। ହୁଏତ ଗାଳି ଗୁଲଜ କଲେ ବିଜେପି ତାହା ପ୍ରଶଂସା ବୋଲି ବିଚାର କରୁ ଥାଇପାରେ।
ସେ ରାଜ୍ୟସଭା ସାଂସଦ ହୋଇ ମୁଖପାତ୍ର ମଧ୍ୟ ଥିଲେ ଏବଂ ସେ ସମୟରେ ବିଜେପିର ପ୍ରତ୍ୟେକ କାର୍ଯ୍ୟକଳାପକୁ ତୀବ୍ର ନିନ୍ଦା କରୁଥିଲେ। ଏପରିକି ବିଜେପି ତାହା ଖଣ୍ଡନ କରିବା ପାଇଁ ଅନେକ ସମୟରେ ବିବୃତି ମଧ୍ୟ ରଖୁଥିଲା । ନୂଆପଡାରେ ପ୍ରାର୍ଥୀ ଅଦଳ ବଦଳ ଏବଂ ପ୍ରଚାର ପ୍ରସାର ଦେଖିଲେ ସାଧାରଣ ବ୍ୟକ୍ତିଟିଏ ମଧ୍ୟ କହି ଦେବ ବିଜେପି ବିଜେଡି ଭାଇ ଭାଇ ବୋଲି। ନୂଆଦିଲ୍ଲୀରେ କେତେବେଳେ ଡିଲ ହେଉଛି ତ କେତେବେଳେ ଭୁବନେଶ୍ୱରରେ ଡିଲ ହେଉଛି । ନବୀନ ବାବୁ ସବୁ ଜାଣନ୍ତି ନଜାଣିଲା ଭଳି ବ୍ୟବହାର କରନ୍ତି । ଅମର ପଟ୍ଟନାୟକ ବିଜେପି ଯିବା ଏଇ ଡିଲ ଅନ୍ତର୍ଗତ ।
ବିଜେଡି ବିଜେପି ସହିତ ନାହିଁ ବୋଲି ଲୋକଙ୍କ ଧାରଣା ନ ଆସୁ ସେଥିପାଇଁ ନୂଆପଡା ଗସ୍ତ କରିଥିଲେ। ନୂଆପଡା ଗସ୍ତ କଲେ କଣ ନୂଆପଡା ବିଜେଡି କର୍ମକର୍ତ୍ତାଙ୍କ ସାଥିରେ କରାଯାଇଥିବା ବିଶ୍ୱାସଘାତକତା ଲିଭି ଯିବ। ବିଜେପି କେବଳ ଚୋରି ଡକାୟତି ଓ ଭୟ ବଳରେ ନିର୍ବାଚନ ଜିତିବାକୁ ଚେଷ୍ଟା କରୁଛି। ଭୋଟ ଚୋରି ପୁଣି ପ୍ରାର୍ଥୀ ଚୋରି ତ କେତେବେଳେ କଂଗ୍ରେସ ଅଫିସ ଉପରେ ପୋଲିସ ଚଢ଼ାଉ ତ କେତେବେଳେ ବିଜେପି ବିଧାୟକଙ୍କ ପିଏସଓ ଲୋକଙ୍କୁ ଭୟଭୀତ କରିବା ପାଇଁ ଫାଙ୍କା ଗୁଳି ଚାଳନା କରୁଛି।
ଆମ କଂଗ୍ରେସ ପ୍ରାର୍ଥୀ ଆଦିବାସୀ ନେତା ନୂଆପଡାର ମାଟିର ସନ୍ତାନ ଓ ଗର୍ବ। ତାଙ୍କ ଲୋକପ୍ରିୟତା ଏବଂ ପିସିସି ସଭାପତିଙ୍କ ସାଧାରଣ ଜନତାଙ୍କ ସହିତ ସୁସମ୍ପର୍କ ତଥା ତାଙ୍କ ଅକ୍ଲାନ୍ତ ପରିଶ୍ରମ ଦେଖି ବିଜେପି ଛାନିଆ ହୋଇଯାଉଛି । କିନ୍ତୁ ନୂଆପଡାବାସୀ ଜାଣନ୍ତି ନୂଆପଡାର ବିକାଶ ଓ ଆଦିବାସୀଙ୍କ ଉନ୍ନତି କେବଳ କଂଗ୍ରେସ ଓ ଘାସିରାମ ମାଝୀ କରିପାରିବେ। ଘାସିରାମଙ୍କ ବିଜୟ ହେବ ବୋଲି ଡ ପଟ୍ଟନାୟକ କହିଛନ୍ତି। ନୂଆପଡା କଂଗ୍ରେସ ଗଣମାଧ୍ୟମ ସଂଯୋଜକ ସୁଧୀର ମିଶ୍ରଙ୍କ ସଂଯୋଜନାରେ ଆଜିର ସାମ୍ବାଦିକ ସମ୍ମୀଳନୀରେ ଯୁବନେତା ମୂରଲୀଧର ନାୟକ, ପୂର୍ବତନ ବିଧାୟକ ବିନୋଦ ପାତ୍ର ଓ ପିସିସି ୱାର ରୁମ ସଦସ୍ୟ ଶାନ୍ତନୁ ସାହୁ ଉପସ୍ଥିତ ଥିଲେ।
Comments are closed.