Rahul Gandhi Hydrogen Bomb: ରାହୁଲଙ୍କ ପ୍ରେସମିଟରେ କିଏ ଏହି ମିଷ୍ଟ୍ରି ଗର୍ଲ?, ହରିୟାଣା ନିର୍ବାଚନରେ ଦେଇଛନ୍ତି ୨୨ ଥର ଭୋଟ…

ନୂଆଦିଲ୍ଲୀ: ପୁଣି ରାହୁଲଙ୍କ ହାଇଡ୍ରୋଜେନ୍ ବୋମା ମାଡ…ପୁଣି ନିର୍ବାଚନ ଆୟୋଗଙ୍କୁ ଘେରିଲେ…ଏଥର ହରିୟାଣା ଭୋଟ ଚୋରି ଖୁଲାସା

ପ୍ରତି ୮ ଭୋଟରଙ୍କ ମଧ୍ୟରେ ଜଣେ ନକଲି…ମିଷ୍ଟ୍ରି ଗର୍ଲ ଫଟୋ ଦେଖାଇ ଖୋଲିଲେ ପୋଲ୍

ଭୋଟ୍ ଚୋରି ପ୍ରସଙ୍ଗରେ ରାହୁଲ ଗାନ୍ଧୀ ପୁଣି ଥରେ ନିର୍ବାଚନ କମିଶନଙ୍କୁ ଆକ୍ରମଣ କରିଛନ୍ତି। ଏଥର, ସେ ହରିୟାଣା ବିଧାନସଭା ନିର୍ବାଚନ ଫଳାଫଳରେ ହେରଫେର ଅଭିଯୋଗ କରିଛନ୍ତି। ତାଙ୍କ ପାଖରେ ଥିବା “H Files” ବା ହାଇଡ୍ରୋଜେନ୍ ବମ୍ ଦାବିକୁ ଦୋହରାଇ ସେ ଏକ ରହସ୍ୟମୟୀ ଝିଅର ଫଟୋ ଦେଖାଇଛନ୍ତି। ରାହୁଲ ଗାନ୍ଧୀ ଦାବି କରିଛନ୍ତି ଯେ ଏହି ମହିଳା ହରିୟାଣାର ବିଭିନ୍ନ ବୁଥରେ ଭିନ୍ନ ଭିନ୍ନ ନାମରେ ଅନେକ ଥର ଭୋଟ ଦେଇଛନ୍ତି। ଏହି ରହସ୍ୟମୟୀ ଝିଅ ହରିୟାଣାରେ ୨୨ ଥର ଭୋଟ ଦେଇଛନ୍ତି। ସେ ଦାବି କରିଛନ୍ତି ଯେ କିଛି ବୁଥରେ ସୀମା, ସରସ୍ୱତୀ ଏବଂ ବିମଳା ଭଳି ବିଭିନ୍ନ ନାମରେ ସମାନ ମହିଳାଙ୍କ ଫଟୋ ଦେଖାଯାଇଛି। ରାହୁଲ କହିଛନ୍ତି ଯେ ତାଙ୍କ ଦଳ ୧୦ ଟି ଭିନ୍ନ ଭିନ୍ନ ବୁଥରେ ସମାନ ଫଟୋ ଏବଂ ନାମ ଦେଖି ଆଶ୍ଚର୍ଯ୍ୟ ହୋଇଛନ୍ତି।

କିଏ ଏହି ମିଷ୍ଟ୍ରି ଗର୍ଲ?

ବିହାର ନିର୍ବାଚନ ଦିନକ ପୂର୍ବରୁ ବୁଧବାର ପୁଣି ରାହୁଲ ତାଙ୍କ ତଥାକଥିତ ହାଇଡ୍ରୋଜେନ୍ ବମ୍ ଛାଡିଥିବା ବେଳେ ପ୍ରେସମିଟରେ ଯେଉଁ ଝିଅର ଫଟୋ ଦେଖାଇଥିଲେ, ତାକୁ ଏବେ ସବୁଠି ଚର୍ଚ୍ଚା । ରାହୁଲଙ୍କ କହିବାନୁଯାୟୀ, ଯେତେବେଳେ ସେ ତାଙ୍କ ଦଳକୁ ଏହି “ରହସ୍ୟମୟୀ ଝିଅ”ର ଫଟୋ ଦେଖାଇଲେ, ସେମାନେ ମଧ୍ୟ ଆଶ୍ଚର୍ଯ୍ୟ ହୋଇଗଲେ। ତଦନ୍ତ ପରେ, ଜଣାପଡିଥିଲା ଯେ ଏହା ଜଣେ ବ୍ରାଜିଲିୟ ମଡେଲର ଷ୍ଟକ୍ ଫଟୋ। ପ୍ରକୃତ ସ୍ଥାନୀୟ ଭୋଟର ନୁହେଁ। ସେ ପ୍ରକୃତରେ ଜଣେ ବ୍ରାଜିଲିଆନ୍ ମଡେଲ୍ ଏବଂ ତାଙ୍କ ଫଟୋ ବ୍ୟବହାର କରି ବିଭିନ୍ନ ନକଲି ପରିଚୟପତ୍ର ତିଆରି କରାଯାଇଛି, ଯାହା ଆଧାରରେ ହରିୟାଣାର ୨୨ ସ୍ଥାନରେ ଭୋଟ୍ ଦିଆଯାଇଛି। ଯାହାକୁ ନେଇ ରାହୁଲ ପ୍ରଶ୍ନ କରିଛନ୍ତି ଯେ, “ଜଣେ ମହିଳା କିପରି ୨୨୩ ଥର ଭୋଟ ଦେଇପାରିବେ? ଦୁଇଟି ବୁଥରେ ଏତେ ଥର ଭୋଟ ଦେଇପାରିବେ କିପରି? ନକଲି ଫଟୋ ସହିତ ଲକ୍ଷେରୁ ଅଧିକ ଭୋଟ ଅଛି। ଜଣେ ବ୍ୟକ୍ତି ୧୪ ଥର ଭୋଟ ଦେଉଛନ୍ତି। ନିର୍ବାଚନ କମିଶନ କାହିଁକି ଡୁପ୍ଲିକେଟ ହଟାଉନାହାଁନ୍ତି? ସେମାନଙ୍କୁ ନିରପେକ୍ଷ ନିର୍ବାଚନ କରିବାକୁ ପଡିବ, ଯାହା ସେମାନେ ଚାହାଁନ୍ତି ନାହିଁ। ବିଜେପି ନେତାମାନେ ଉତ୍ତର ପ୍ରଦେଶ ଏବଂ ହରିୟାଣାରେ ମଧ୍ୟ ଭୋଟ ଦେଉଛନ୍ତି।

ଚୋରି ହୋଇଛି ୨୫ ଲକ୍ଷ ଭୋଟ…

ରାହୁଲଙ୍କ ଅଭିଯୋଗ ଅନୁଯାୟୀ ହରିୟାଣାରେ ଭୋଟର ତାଲିକାରେ ଥିବା ପ୍ରତି ଆଠ ଜଣ ଭୋଟରଙ୍କ ମଧ୍ୟରୁ ଜଣେ ନକଲି। ରାହୁଲ ଦାବି କରିଛନ୍ତି ଯେ ହରିୟାଣାରେ ୨୫ ଲକ୍ଷ ଭୋଟ ଚୋରି ହୋଇଛି। ୨୫ ଲକ୍ଷ ଭୋଟ ନକଲି, ଅସ୍ତିତ୍ୱହୀନ, କିମ୍ବା ହେରଫେର କରାଯାଇଛି। ସେ କହିଛନ୍ତି ଯେ ଏଥିରେ ୫.୨୧ ଲକ୍ଷ ନକଲି ଭୋଟର, ୯୩,୧୭୪ ଅବୈଧ ଭୋଟର ଏବଂ ୧୯.୨୬ ଲକ୍ଷ ଠକ ଭୋଟର ବି ଅନ୍ତର୍ଭୁକ୍ତ। ରାହୁଲ ଗାନ୍ଧୀ ଦାବି କରିଛନ୍ତି ଯେ ନିର୍ବାଚନ କମିଶନ ସିସିଟିଭି ଫୁଟେଜ୍ ନଷ୍ଟ କରିଛନ୍ତି କାରଣ ଜଣେ ବ୍ୟକ୍ତି ସମାନ ଫଟୋ ସହିତ ହରିୟାଣାର ଦୁଇଟି ବୁଥରେ ୨୨୩ ଭୋଟ ପାଇଥିଲେ। ଏହି ପଦ୍ଧତି ବ୍ୟବହାର କରି ହରିୟାଣାରେ ୨୫ ଲକ୍ଷ ଲୋକ ନକଲି ଭୋଟ ଦେଇଛନ୍ତି। ଏହା ସତ୍ତ୍ବେ ବି କଂଗ୍ରେସ ୨୫ ହଜାର ଭୋଟରେ ହାରିଥିଲା ।  ଏଥିସହିତ ଏହି ନିର୍ବାଚନ କଂଗ୍ରେସ ସପକ୍ଷରେ ଥିବା ଦାବି କରିଛନ୍ତି ରାହୁଲ ।

କହିରଖୁଛୁ, ଅକ୍ଟୋବର ୨୦୨୪ରେ ଅନୁଷ୍ଠିତ ହରିୟାଣା ବିଧାନସଭା ନିର୍ବାଚନରେ, ବିଜେପି ୯୦ ଟି ଆସନରୁ ୪୮ ଟି ଜିତି ଏକ ବଡ଼ ବିଜୟ ହାସଲ କରିଥିଲା। କଂଗ୍ରେସ ୩୭ ଟି ଆସନ ଜିତିଥିଲା।