Delhi Airport Flight Landing:ଟଳିଲା ବଡ଼ ଦୁର୍ଘଟଣା; ଦିଲ୍ଲୀ ବିମାନବନ୍ଦରରେ ଭୁଲ ରନୱେରେ ଅବତରଣ କଲା ଆଫଗାନ ବିମାନ

ନୂଆଦିଲ୍ଲୀ:ଦିଲ୍ଲୀର ଆଇଜିଆଇ ବିମାନବନ୍ଦରରେ ଏକ ବଡ଼ ଦୁର୍ଘଟଣା ଟଳିଯାଇଛି । ଦିଲ୍ଲୀର ଆଇଜିଆଇ ବିମାନବନ୍ଦରରେ ପାଇଲଟ୍ ଭୁଲବଶତଃ ବିମାନଟିକୁ ଉଡ଼ାଣ ପାଇଁ ବ୍ୟବହୃତ ରନୱେରେ ଅବତରଣ କରାଇ ଦେଇଥିଲେ। ଦିଲ୍ଲୀର ଆଇଜିଆଇ ବିମାନବନ୍ଦରରେ (IGI Airport Delhi) ଏରିଆନା ଆଫଗାନ ଫ୍ଲାଇଟ୍ସର ଏକ ବିମାନ ଭୁଲ ରନୱେରେ ଅବତରଣ କରିଛି । ପାଇଲଟ୍ ନିଜର ଭୁଲ ସ୍ୱୀକାର ନକରି ILS ସିଷ୍ଟମ ଏବଂ ଦିଲ୍ଲୀର ପାଣିପାଗର ଦୁର୍ବଳ ଦୃଶ୍ୟତାକୁ ଦାୟୀ କରିଛନ୍ତି। ବେସାମରିକ ବିମାନ ଚଳାଚଳ ମହାନିର୍ଦ୍ଦେଶକ (DGCA) ଏହି ଘଟଣାର ତଦନ୍ତ ନିର୍ଦ୍ଦେଶ ଦେଇଛନ୍ତି।

ରବିବାର ଅପରାହ୍ନରେ ଦିଲ୍ଲୀର ଇନ୍ଦିରା ଗାନ୍ଧୀ ଅନ୍ତର୍ଜାତୀୟ ବିମାନବନ୍ଦରରେ ଆଫଗାନିସ୍ତାନରୁ ଏକ ବିମାନ ଭୁଲ ରନୱେରେ ଅବତରଣ କରିବା ସମୟରେ ଏହି ଘଟଣା ଘଟିଥିଲା। ବିମାନ ଟ୍ରାଫିକ୍ ନିୟନ୍ତ୍ରଣ ସୂତ୍ର କହିଛନ୍ତି ଯେ ଏହା ଏକ ଅତ୍ୟନ୍ତ ବିପଦପୂର୍ଣ୍ଣ ପରିସ୍ଥିତି ହୋଇଥାନ୍ତା । ବର୍ତ୍ତମାନ ଏହି ମାମଲାର ତଦନ୍ତ ଆରମ୍ଭ ହୋଇଛି।

କାବୁଲରୁ ଦିଲ୍ଲୀ ଆସୁଥିବା ବିମାନ ନମ୍ବର FG 311କୁ ରନୱେ 29L ରେ ଅବତରଣ କରିବା ପାଇଁ ଏୟାର ଟ୍ରାଫିକ୍ କଣ୍ଟ୍ରୋଲ ଅନୁମତି ଦେଇଥିଲା। ଏହା ସତ୍ତ୍ୱେ, ବିମାନଟି ରନୱେ 29R ରେ ଅବତରଣ କଲା, ଯାହାକୁ ଉଡ଼ାଣ ପାଇଁ ନିର୍ଦ୍ଦିଷ୍ଟ କରାଯାଇଥିଲା।
ସୌଭାଗ୍ୟବଶତଃ, ସେହି ସମୟରେ 29R ରେ କୌଣସି ବିମାନ ଉଡ଼ାଣ ପାଇଁ ପ୍ରସ୍ତୁତ ହେଉ ନଥିଲା, ଫଳରେ ବଡ ଅଘଟଣ ଟଳିଯାଇଛି । ଏହି ଘଟଣାଟି ଦିଲ୍ଲୀର ଇନ୍ଦିରା ଗାନ୍ଧୀ ଅନ୍ତର୍ଜାତୀୟ ବିମାନବନ୍ଦରରେ ନଭେମ୍ବର ୨୩ ତାରିଖ ଦିନ ୧୨:୦୬ ସମୟରେ ଘଟିଥିଲା।

ଏହି ଅପ୍ରତ୍ୟାଶିତ ଅବତରଣ ଅନେକ ପ୍ରଶ୍ନ ଉଠାଇଛି – ପାଇଲଟ୍ କଣ ଦିଗଭ୍ରମର ଶିକାର ହୋଇଥିଲେ, ନା ପୁଣି ଥରେ GPS ସ୍ପୁଫିଂ ସମସ୍ୟା ଦେଖା ଦେଇଥିଲା? ଏହି ସମସ୍ତ ସମ୍ଭାବନାର ତଦନ୍ତ ପାଇଁ DGCA ତୁରନ୍ତ ନିର୍ଦ୍ଦେଶ ଜାରି କରିଛି।