Karnataka Power Tussle: ପୁଣି କ୍ଷମତା ସଂଘର୍ଷ: ମୁଖ୍ୟମନ୍ତ୍ରୀ କହିଲେ, ଅଢ଼େଇ ବର୍ଷ ପାଇଁ ହୋଇନି କୌଣସି ଆପୋଷ ବୁଝାମଣା

ବେଙ୍ଗାଲୁରୁ: ମୁଖ୍ୟମନ୍ତ୍ରୀ ସିଦ୍ଧରମୈୟାଙ୍କ ଏକ ବୟାନ କର୍ଣ୍ଣାଟକରେ ପୁଣି ଥରେ ରାଜନୈତିକ ଉତ୍ତେଜନା ସୃଷ୍ଟି କରିଛି। ଲାଗୁଛି କ୍ଷମତା ସଂଘର୍ଷର ହୋଇନି ଅନ୍ତ! ସିଦ୍ଧରମୈୟା ମୁଖ୍ୟମନ୍ତ୍ରୀ ପରିବର୍ତ୍ତନ ହେବା ସମ୍ପର୍କରେ ସାମ୍ପ୍ରତିକ କଳ୍ପନାଜଳ୍ପନାକୁ ଖାରଜ କରିଛନ୍ତି। ସେ ସ୍ପଷ୍ଟ ଭାବରେ କହିଛନ୍ତି ଯେ ରାଜ୍ୟରେ ମୁଖ୍ୟମନ୍ତ୍ରୀ ପରିବର୍ତ୍ତନ ହେବାର କୌଣସି ପ୍ରଶ୍ନ ଉଠୁନାହିଁ। ସେ ତାଙ୍କର ସମ୍ପୂର୍ଣ୍ଣ ପାଞ୍ଚ ବର୍ଷର କାର୍ଯ୍ୟକାଳ ପୂରଣ କରିବେ। ସେ ଏହା ମଧ୍ୟ ଦାବି କରିଛନ୍ତି ଯେ ତାଙ୍କୁ ଦଳୀୟ ହାଇକମାଣ୍ଡର ସମର୍ଥନ ରହିଛି।

ଗତ କିଛି ମାସ ଧରି, କର୍ଣ୍ଣାଟକର ରାଜନୈତିକ ମହଲରେ ଡିକେ ଶିବକୁମାରଙ୍କୁ ମୁଖ୍ୟମନ୍ତ୍ରୀ ନିଯୁକ୍ତ କରାଯାଉଛି ବୋଲି ପ୍ରଚାର ହେଉଛି। କାରଣ ଦର୍ଶାଯାଇଛି ଯେ ସରକାର ଗଠନ ହେବା ସମୟରେ ଏହା ନିଷ୍ପତ୍ତି ନିଆଯାଇଥିଲା। ସେତେବେଳେ ସିଦ୍ଧରମୈୟା ପ୍ରଥମ ଅଢ଼େଇ ବର୍ଷ ଏବଂ ଡିକେ ଶିବକୁମାର ବାକି କାର୍ଯ୍ୟକାଳ ପାଇଁ କାର୍ଯ୍ୟ କରିବେ ବୋଲି ସହମତ ହୋଇଥିଲା।

ଏବେ ବର୍ତ୍ତମାନର ମୁଖ୍ୟମନ୍ତ୍ରୀ ସିଦ୍ଧରମୈୟା ଏପରି କ୍ଷମତା ବଣ୍ଟନ ବ୍ୟବସ୍ଥାକୁ ସ୍ପଷ୍ଟ ଭାବରେ ପ୍ରତ୍ୟାଖ୍ୟାନ କରିଛନ୍ତି। ସେ କହିଛନ୍ତି ଯେ ପୂର୍ବରୁ ଏପରି କିଛି ନିଷ୍ପତ୍ତି ନିଆଯାଇନଥିଲା। ସେ ବେଲାଗାଭିରେ ବିଧାନସଭା ଅଧିବେଶନର ଶେଷ ଦିନରେ ଏହି ବୟାନ ଦେଇଥିଲେ। ଯେତେବେଳେ କି ଗତକିଛି ଦିନ ପୂର୍ବେ ଡିକେ ଶିବକୁମାର ନିଜେ ଏହା କଥା ଉଲ୍ଲେଖ କରିଥିଲେ। ବର୍ତ୍ତମାନ ସିଏମ ଦେଇଥିବା ଏହି ମନ୍ତବ୍ୟକୁ ନେଇ ଶିବକୁମାର ଏପର୍ଯ୍ୟନ୍ତ କୌଣସି ବିବୃତ୍ତି ଜାରି କରିନାହାଁନ୍ତି।

ହାଇକମାଣ୍ଡ ଚୂଡ଼ାନ୍ତ ନିଷ୍ପତ୍ତି ନେବେ

ସିଦ୍ଧାରମେୟା କହିଛନ୍ତି, “ମୁଁ କେବଳ ଏତିକି କହୁଛି, ମୁଁ ଏବେ ବି ମୁଖ୍ୟମନ୍ତ୍ରୀ ଅଛି ଆଉ ଯେପର୍ଯ୍ୟନ୍ତ ହାଇକମାଣ୍ଡ ଭିନ୍ନ ନିଷ୍ପତ୍ତି ନ ନିଅନ୍ତି ସେପର୍ଯ୍ୟନ୍ତ ମୁଁ ମୁଖ୍ୟମନ୍ତ୍ରୀ ରହିବି। ମୁଁ କେବେ ବି ଅଢ଼େଇ ବର୍ଷ ବିଷୟରେ କୌଣସି ଆଲୋଚନା କରିନାହିଁ। ଅଢ଼େଇ ବର୍ଷ ପାଇଁ କୌଣସି ଚୁକ୍ତିନାମା ନାହିଁ।” ମୁଖ୍ୟମନ୍ତ୍ରୀ ପୁନର୍ବାର କହିଛନ୍ତି ଯେ ସେ ତାଙ୍କର ପୂର୍ଣ୍ଣ କାର୍ଯ୍ୟକାଳ ପୂରଣ କରିବେ। ସେ କହିଛନ୍ତି, “ଆମେ ପୂର୍ଣ୍ଣ କାର୍ଯ୍ୟକାଳ ପୂରଣ କରି ୨୦୦୮ରେ କ୍ଷମତାକୁ ଫେରିବୁ… ଯେପର୍ଯ୍ୟନ୍ତ ହାଇକମାଣ୍ଡ ଅନ୍ୟଥା ନ କୁହନ୍ତି, ମୁଁ ମୁଖ୍ୟମନ୍ତ୍ରୀ।” ବେଲାଗାଭିରେ ବିଧାନସଭାର ଶୀତକାଳୀନ ଅଧିବେଶନର ଶେଷ ଦିନରେ ମୁଖ୍ୟମନ୍ତ୍ରୀ ସିଦ୍ଧାରମେୟାଙ୍କ ଏହି ବୟାନ ରାଜନୀତିକୁ ସରଗରମ କରିଛି।

ଶିବକୁମାରଙ୍କୁ ସମର୍ଥନ କରୁଥିବା ବିଧାୟକମାନେ ଦାବି କରନ୍ତି ଯେ ୨୦୦୩ ରେ କଂଗ୍ରେସ ସରକାର ଗଠନ ହେବା ସମୟରେ ପ୍ରତ୍ୟେକଙ୍କ ପାଇଁ ୨.୫ ବର୍ଷ ପାଇଁ ମୁଖ୍ୟମନ୍ତ୍ରୀ ପଦ ପାଇଁ ଏକ ଚୁକ୍ତି ହୋଇଥିଲା, କିନ୍ତୁ ସିଦ୍ଧାରମେୟା ସମର୍ଥକମାନେ ଏହାକୁ ଲଗାତାର ଅସ୍ୱୀକାର କରିଛନ୍ତି। ଉପମୁଖ୍ୟମନ୍ତ୍ରୀ ଡିକେ ଶିବକୁମାରଙ୍କ ସମର୍ଥକ ବୋଲି ବିଶ୍ୱାସ କରାଯାଉଥିବା କିଛି ବିଧାୟକ ଦିଲ୍ଲୀ ଯାଇ ଦଳୀୟ ହାଇକମାଣ୍ଡଙ୍କ ସହ ସାକ୍ଷାତ କରିଛନ୍ତି।

କର୍ଣ୍ଣାଟକରେ ଉଭୟ ନେତାଙ୍କ ସହ ଅନେକ ଦଳୀୟ ନେତା ଏହି ପ୍ରସଙ୍ଗରେ ଆଲୋଚନା କରିଛନ୍ତି। ଏହା ପରେ, ଡିକେ ଏବଂ ସିଦ୍ଧରମୈୟା ଦୁଇଥର ଜଳଖିଆ ପାଇଁ ସାକ୍ଷାତ କରିଥିଲେ, ଯାହା ଫଳରେ ସବୁକିଛି ଠିକ୍ ଅଛି ବୋଲି ବିଶ୍ୱାସ କରାଯାଇଥିଲା। ଏହି ବିବାଦ ମଧ୍ୟରେ, ଡିକେ ଶିବକୁମାର ଇଙ୍ଗିତ ଦେଇଥିଲେ ଯେ ସେ ଖୁବ୍ ଶୀଘ୍ର ରାଜ୍ୟ ସଭାପତି ପଦ ଛାଡିପାରନ୍ତି। ସିଦ୍ଧରମୈୟାଙ୍କ ବୟାନ ପରେ, ପରିସ୍ଥିତି ଏପର୍ଯ୍ୟନ୍ତ ଶାନ୍ତ ହୋଇନାହିଁ ବୋଲି ବିଶ୍ୱାସ କରାଯାଉଛି।