ସମ୍ବଲପୁର: ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ମଙ୍ଗଳବାର ଦିନ ସମ୍ବଲପୁର ଜିଲ୍ଲାର ଲପଙ୍ଗାଠାରେ ହିଣ୍ଡାଲକୋ ଇଣ୍ଡଷ୍ଟ୍ରିଜ୍ ଲିମିଟେଡର ଆଦିତ୍ୟ ଆଲୁମିନିୟମ ପ୍ଲାଣ୍ଟରେ ଭାରତର ପ୍ରଥମ ଫ୍ଲାଟ ରୋଲ୍ଡ ପ୍ରଡକ୍ଟସ୍ (FRP) ଆଲୁମିନିୟମ ୟୁନିଟ୍ ଉଦଘାଟନ କରିଛନ୍ତି। ଏଥିରେ ୨୬,୯୯୬ କୋଟି ଟଙ୍କା ନିବେଶ ହୋଇଥିବା ନେଇ ରିପୋର୍ଟରୁ ଜଣାପଡିଛି।
ତେବେ ଏହି ପ୍ରକଳ୍ପରେ ୫୦୧୨ ଜଣଙ୍କ ପାଇଁ ନିଯୁକ୍ତି ସୃଷ୍ଟି ହେବ ଓ ଏହା ଦ୍ବାରା ଡାଉନଷ୍ଟ୍ରିମ୍ ଉତ୍ପାଦନ ଆହୁରି ସୁଦୃଢ଼ ହୋଇପାରିବ ବୋଲି ଅଧିକାରୀ ମାନେ ସୂଚନା ଦେଇଛନ୍ତି। ଏହି ନୂତନ ଶିଳ୍ପ ପ୍ରତିଷ୍ଠା ପାଇଁ ପ୍ରାୟ ୨୦ ଲକ୍ଷ କୋଟି ଟଙ୍କାର ଶିଳ୍ପ ପ୍ରସ୍ତାବ ସହ ଆଗକୁ ବଢ଼ୁଥିବା ନେଇ ମୁଖ୍ୟମନ୍ତ୍ରୀ କହିଛନ୍ତି। ଏଗୁଡ଼ିକ କାର୍ଯ୍ୟକ୍ଷମ ହେବା ପରେ ପ୍ରାୟ ୧୫ ଲକ୍ଷ ନୂତନ ନିଯୁକ୍ତି ସୃଷ୍ଟି ହେବ ବୋଲି ମଧ୍ୟ ସେ କହିଛନ୍ତି।
ଏହି ଉଦଘାଟନୀ ଉତ୍ସବରେ ରାଜସ୍ୱ ମନ୍ତ୍ରୀ ସୁରେଶ ପୂଜାରୀ, ଶିଳ୍ପ ମନ୍ତ୍ରୀ ସମ୍ପଦ ଚନ୍ଦ୍ର ସ୍ୱାଇଁ, ବିଧାୟକ ଜୟ ନାରାୟଣ ମିଶ୍ର ଏବଂ ସୁଦର୍ଶନ ହରିପାଲ, ଅତିରିକ୍ତ ମୁଖ୍ୟ ସଚିବ (ACS) ହେମନ୍ତ ଶର୍ମା, ସରକାରଙ୍କ ବରିଷ୍ଠ ଅଧିକାରୀ ଏବଂ ହିଣ୍ଡାଲକୋ ଇଣ୍ଡଷ୍ଟ୍ରିଜ୍ ଲିମିଟେଡର କର୍ତ୍ତୃପକ୍ଷ ଉପସ୍ଥିତ ଥିଲେ। ପଶ୍ଚିମ ଓଡ଼ିଶା ଆଜି ଜଙ୍ଗଲ ଏବଂ ଚାଷ ଜମିରୁ ବିଶ୍ୱସ୍ତରୀୟ ଉତ୍ପାଦନର କେନ୍ଦ୍ରରେ ପରିଣତ ହେଉଥିବା ଆତ୍ମବିଶ୍ୱାସ, ଶୃଙ୍ଖଳା ଏବଂ ଉଦ୍ୟୋଗର ପ୍ରତୀକ ଭାବରେ ଠିଆ ହୋଇଛି।”
ଲୋକଙ୍କ ଜୀବନରେ ପ୍ରକୃତ ପରିବର୍ତ୍ତନ ଦ୍ୱାରା ଓ ଯୁବପିଢ଼ିଙ୍କ ପାଇଁ ଚାକିରି, ପରିବାର ପାଇଁ ସୁରକ୍ଷା ଏବଂ ଉନ୍ନତ ଶିକ୍ଷା ଏବଂ ସ୍ୱାସ୍ଥ୍ୟସେବା ଦ୍ଵାରା ହିଁ ବିକାଶ ହୋଇଥାଏ ବୋଲି ସେ କହିଛନ୍ତି।