Naveen Patnaik on Middle East Situations: ‘ଓଡ଼ିଆଙ୍କୁ ଫେରେଇ ଆଣନ୍ତୁ…’, ମଧ୍ୟପ୍ରାଚ୍ୟ ଅବସ୍ଥା ନେଇ ଚିନ୍ତା ପ୍ରକଟ କଲେ ନବୀନ, ସରକାରଙ୍କୁ କଲେ ଅନୁରୋଧ
ଭୁବନେଶ୍ୱର: ମଧ୍ୟପ୍ରାଚ୍ୟ ଯୁଦ୍ଧ ଭିତରେ ମୋହନ ସରକାରଙ୍କୁ ଅନୁରୋଧ କଲେ ନବୀନ। କହିଲେ ଓଡ଼ିଆଙ୍କୁ ଫେରେଇ ଆଣ। ଇରାନ-ଆମେରିକା ଯୁଦ୍ଧ ସୋମବାର ସୁଦ୍ଧା ୧୦ ଦିନ ଅତିକ୍ରମ କରିଥିବ ବେଳେ ଏହା ଅଧିକ ତୀବ୍ର ହେବାରେ ଲାଗିଛି। ଯାହାର ପ୍ରଭାବ ସାରା ବିଶ୍ୱରେ ଦେଖିବାକୁ ମିଳିଥିବା ବେଳେ, ଅଧିକ ହନ୍ତସନ୍ତ ହେଉଛନ୍ତି ସେଠି ଫସି ରହିଥିବା ଭାରତୀୟ। ଏହି ସମୟରେ ଯୁଦ୍ଧକୁ ନେଇ ଓଡ଼ିଶାର ପୂର୍ବତନ ମୁଖ୍ୟମନ୍ତ୍ରୀ ତଥା ବିରୋଧୀ ଦଳ ନେତା ନବୀନ ପଟ୍ଟନାୟକ ଚିନ୍ତା ପ୍ରକଟ କରିଛନ୍ତି। ବିଶେଷ କରି ଓଡ଼ିଆ ଲୋକଙ୍କ ପାଇଁ ଚିନ୍ତିତ ହୋଇଛନ୍ତି ନବୀନ।
ସେ କହିଛନ୍ତି, ମୁଁ ବୁଝିପାରୁଛି ଯେ ମଧ୍ୟପ୍ରାଚ୍ୟ ଦେଶଗୁଡ଼ିକରେ ଲକ୍ଷ ଲକ୍ଷ ଓଡ଼ିଆ ଲୋକ ଫସି ରହିଛନ୍ତି, ସେମାନେ କେତେ କଷ୍ଟରେ ଥିବେ। ମୁଁ ଓଡ଼ିଶା ସରକାର ଏବଂ ଭାରତ ସରକାରଙ୍କୁ ଅନୁରୋଧ କରୁଛି ଯେ ସେମାନେ କିପରି ଭାରତରେ ନିଜ ଘରକୁ ଫେରିବେ ସେ ପାଇଁ ତୁରନ୍ତ ପଦକ୍ଷେପ ନିଅନ୍ତୁ। ମାର୍ଚ୍ଚ ୫ ସୁଦ୍ଧା, ମୋଟ ୧୪,୯୯୨ ଫସି ରହିଥିବା ଯାତ୍ରୀଙ୍କୁ ଭାରତ ଫେରାଇ ଅଣାଯାଇଛି। ତଥାପି, ମଧ୍ୟପ୍ରାଚ୍ୟରେ ହଜାର ହଜାର ଭାରତୀୟ ଏବେ ବି ଫସି ରହିଛନ୍ତି ବୋଲି ନବୀନ କହିଛନ୍ତି। ଏବଂ ସେମାନଙ୍କୁ ଫେରେଇ ଆଣିବା ପାଇଁ ସରକାରଙ୍କୁ ଅନୁରୋଧ କରିଛନ୍ତି। ଉଭୟ ରାଜ୍ୟ ଓ କେନ୍ଦ୍ର ସରକାରଙ୍କୁ ଅନୁରୋଧ କରୁଛି ବୋଲି କହିଛନ୍ତି ନବୀନ।
ତେବେ ମଧ୍ୟପ୍ରାଚ୍ୟ ଯୁଦ୍ଧ ଦିନକୁ ଦିନ ଅଧିକ ବଢୁଛି। ୨୮ ତାରିଖରେ ଆରମ୍ଭ ହୋଇଥିବା ଯୁଦ୍ଧ ପରଠାରୁ ଲକ୍ଷ ଲକ୍ଷ ଓଡ଼ିଆ ଶ୍ରମିକ ଏବଂ ବୃତ୍ତିଗତ ମଧ୍ୟପ୍ରାଚ୍ୟ (ବିଶେଷକରି ଇସ୍ରାଏଲ, ଇରାନ ଏବଂ ବାହାରିନ)ରେ ଫସି ରହିଛନ୍ତି। ସେମାନଙ୍କର ସୁରକ୍ଷିତ ସ୍ଥାନାନ୍ତର ସମନ୍ୱୟ ପାଇଁ ରାଜ୍ୟ ସରକାର ଏକ କାର୍ଯ୍ୟକାରୀ ଗୋଷ୍ଠୀ ଗଠନ କରିଛନ୍ତି, ଯେଉଁଥିରେ କେବଳ କେନ୍ଦ୍ରାପଡ଼ାରୁ ୧୦୦୦ ରୁ ଅଧିକ ଶ୍ରମିକ ରିପୋର୍ଟ ହୋଇଛନ୍ତି। ଏହା ବ୍ୟତୀତ ବ୍ରହ୍ମପୁର ଏବଂ ଖୋର୍ଦ୍ଧା ଭଳି ଜିଲ୍ଲାରୁ ବହୁ ସଂଖ୍ୟକ ଶ୍ରମିକ ସଂଘର୍ଷପ୍ରବଣ ଅଞ୍ଚଳରେ ବାସ କରୁଛନ୍ତି, ସେମାନଙ୍କ ମଧ୍ୟରୁ କେତେକ ଇସ୍ରାଏଲରେ ନିର୍ମାଣ ଏବଂ ଆତିଥ୍ୟ କ୍ଷେତ୍ରରେ କାର୍ଯ୍ୟ କରୁଛନ୍ତି।
ଆଉ ଯୁଦ୍ଧ ପରେ ବିମାନ ସଂଯୋଗ ବିଚ୍ଛିନ୍ନ ହୋଇଥିବାରୁ ଏବଂ ଶ୍ରମିକମାନେ କ୍ରମାଗତ କ୍ଷେପଣାସ୍ତ୍ର ଆକ୍ରମଣରୁ ବିପଦର ସମ୍ମୁଖୀନ ହେଉଥିବାରୁ ଓଡ଼ିଶାରେ ପରିବାରଗୁଡ଼ିକ ଭୟଭୀତ ହୋଇପଡ଼ିଛନ୍ତି। ଯାହାକୁ ନେଇ ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ତୁରନ୍ତ ସ୍ଥାନାନ୍ତର ପାଇଁ କେନ୍ଦ୍ରକୁ ଅନୁରୋଧ କରିଛନ୍ତି। ଓଡ଼ିଶା ସରକାର ଓଡ଼ିଆ ପରିବାର ଅଧୀନରେ ଏକ ୨୪/୭ ହେଲ୍ପଲାଇନ୍ (୯୫୮୩୩୨୧୯୬୪) ମଧ୍ୟ ସ୍ଥାପନ କରିଛନ୍ତି।
ଅପରପକ୍ଷେ ବୈଦେଶିକ ମନ୍ତ୍ରଣାଳୟ (MEA) ନାଗରିକମାନଙ୍କୁ ଫେରିବା ପାଇଁ ସୁବିଧା ଯୋଗାଇ ଦେଉଛି, ସହାୟତା ପାଇଁ ଏକ WhatsApp ହେଲ୍ପଲାଇନ୍ (+971543090571) ଏବଂ ଏକ ଟୋଲ୍-ଫ୍ରି ନମ୍ବର (80046342) ଯୋଗାଇ ଦିଆଯାଇଛି।