ISI-Linked Module: ATSର ବଡ଼ କାର୍ଯ୍ୟାନୁଷ୍ଠାନ;ISI ଏବଂ ପାକିସ୍ତାନୀ ଗ୍ୟାଙ୍ଗଷ୍ଟରଙ୍କ ସହ ଜଡିତ ଦୁଇ ସନ୍ଦିଗ୍ଧ ଗିରଫ

ନୂଆଦିଲ୍ଲୀ:ଏକ ବଡ଼ କାର୍ଯ୍ୟାନୁଷ୍ଠାନ ଗ୍ରହଣ କରି ଉତ୍ତର ପ୍ରଦେଶ ଆତଙ୍କବାଦ ନିରୋଧୀ ସ୍କ୍ୱାଡ୍ (ATS) ପାକିସ୍ତାନର ଗୁଇନ୍ଦା ସଂସ୍ଥା ISI ଏବଂ ପାକିସ୍ତାନୀ ଗ୍ୟାଙ୍ଗଷ୍ଟରମାନଙ୍କ ପାଇଁ କାମ କରୁଥିବା ଦୁଇ ଯୁବକଙ୍କୁ ଗିରଫ କରିଛି। ଗିରଫ ସନ୍ଦିଗ୍ଧଙ୍କ ନାମ ତୁଷାର ଚୌହାନ ଓରଫ ହିଜବୁଲ୍ଲାହ ଅଲି ଖାନ (୨୦ ବର୍ଷ- ବାଗପତର ବାସିନ୍ଦା ଏବଂ ସମୀର ଖାନ (୨୦),ଯିଏ ଦିଲ୍ଲୀର ସୀମାପୁରୀର ବାସିନ୍ଦା ବୋଲି ଚିହ୍ନଟ କରାଯାଇଛି।

UP ATS ଅନୁଯାୟୀ, ଦୁଇ ସନ୍ଦିଗ୍ଧ ଦେଶର ମଲ୍ ଏବଂ ଶିଳ୍ପ କ୍ଷେତ୍ର ଭଳି ଆର୍ଥିକ ସମ୍ବେଦନଶୀଳ ସ୍ଥାନଗୁଡ଼ିକୁ ଟାର୍ଗେଟ କରିବାର ଷଡ଼ଯନ୍ତ୍ରରେ ସାମିଲ ଥିଲେ। ସେମାନଙ୍କର ଲକ୍ଷ୍ୟ ଥିଲା ଦେଶର ଆଭ୍ୟନ୍ତରୀଣ ସୁରକ୍ଷାକୁ ଦୁର୍ବଳ କରିବା ଏବଂ ଆତଙ୍କବାଦୀ କାର୍ଯ୍ୟକଳାପ ଘଟାଇବା। ତଦନ୍ତରୁ ଜଣାପଡିଛି ଯେ ଦୁଇ ସନ୍ଦିଗ୍ଧ ସୋସିଆଲ ମିଡିଆ ପ୍ଲାଟଫର୍ମ ମାଧ୍ୟମରେ ପାକିସ୍ତାନୀ ଗ୍ୟାଙ୍ଗଷ୍ଟର ଶାହଜାଦ ଭାଟି ସହ ଜଡିତ ଥିଲେ। ଭାଟି ଇନଷ୍ଟାଗ୍ରାମରେ ଏକ ନକଲି ଆକାଉଣ୍ଟ ତିଆରି କରି ସେମାନଙ୍କ ସହିତ ଯୋଗାଯୋଗ କରିଥିଲେ।

UP ATS ଅନୁଯାୟୀ, ଅଭିଯୁକ୍ତମାନଙ୍କୁ ତୁରନ୍ତ ₹୫୦,୦୦୦ ଏବଂ ଅପରାଧ ପରେ ₹୨.୫ଲକ୍ଷ ଟଙ୍କାର ପ୍ରତିଶ୍ରୁତି ଦେଇ ପ୍ରଲୋଭିତ କରାଯାଇଥିଲା। ସେମାନଙ୍କୁ ଅସ୍ତ୍ରଶସ୍ତ୍ର ମଧ୍ୟ ପ୍ରତିଶ୍ରୁତି ଦିଆଯାଇଥିଲା।

ତଦନ୍ତରୁ ଏହା ମଧ୍ୟ ଜଣାପଡିଛି ଯେ ସମୀର ଖାନ TTH (Tehrik-e-Taliban Hindustan) ସହିତ ସମ୍ପର୍କରେ ଥିଲେ। ଦୁଇ ଅଭିଯୁକ୍ତ VOIP କଲ୍ ଏବଂ ଟେଲିଗ୍ରାମ ଭଳି ମାଧ୍ୟମରେ ଯୋଗାଯୋଗ ବଜାୟ ରଖିଥିଲେ,ଯାହା ଦ୍ଵାରା ସେମାନଙ୍କର କାର୍ଯ୍ୟକଳାପ ଚିହ୍ନଟ ହୋଇପାରିବ ନାହିଁ। ୟୁପି ATS ଅଭିଯୁକ୍ତଙ୍କଠାରୁ ଗୋଟିଏ ପିସ୍ତଲ, ପାଞ୍ଚଟି ଜୀବନ୍ତ .32 ବୋର କାର୍ଟ୍ରିଜ୍, ଗୋଟିଏ ଛୁରୀ ଏବଂ ଦୁଇଟି ମୋବାଇଲ୍ ଫୋନ୍ ଜବତ କରିଛି।

ଉଭୟଙ୍କ ବିରୁଦ୍ଧରେ IPCର ଧାରା 148, 152, ଏବଂ 61(2), ଅସ୍ତ୍ରଶସ୍ତ୍ର ଆଇନ, 1959ର ଧାରା 3/4/25 ଏବଂ ବେଆଇନ କାର୍ଯ୍ୟକଳାପ (ନିବାରଣ) ଆଇନ, 1967ର ଧାରା 13/18 ଅନୁଯାୟୀ ଏକ ମାମଲା ରୁଜୁ କରାଯାଇଛି।

UP ATS ଏବେ ଉଭୟ ଅଭିଯୁକ୍ତଙ୍କୁ ପଚରାଉଚରା କରୁଛି ଏବଂ ସେମାନଙ୍କର ଅନ୍ୟ ସହଯୋଗୀ ଏବଂ ନେଟୱାର୍କର ତଦନ୍ତ କରୁଛି ।