ଦିଲ୍ଲୀ ଅବକାରୀ ଦୁର୍ନୀତି ମାମଲାରେ ହାଇଭୋଲଟେଜ୍ ଡ୍ରାମା: ବିଚାରପତିଙ୍କୁ ବୟକଟ୍ କଲେ ଅରବିନ୍ଦ କେଜ୍ରିୱାଲ, ବଢ଼ିବ କି ଅଡ଼ୁଆ?

ନୂଆଦିଲ୍ଲୀ: ଦିଲ୍ଲୀର ବହୁଚର୍ଚ୍ଚିତ ତଥା ବିବାଦୀୟ ଅବକାରୀ (ମଦ) ନୀତି ମାମଲାରେ ଆସିଛି ଏକ ବଡ଼ ଏବଂ ଅପ୍ରତ୍ୟାଶିତ ଟ୍ୱିଷ୍ଟ। ଆମ୍ ଆଦମୀ ପାର୍ଟି (ଆପ) ର ଜାତୀୟ ଆବାହକ ତଥା ଦିଲ୍ଲୀର ପୂର୍ବତନ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ଏହି ମାମଲାର ଶୁଣାଣି କରୁଥିବା ଦିଲ୍ଲୀ ହାଇକୋର୍ଟର ବିଚାରପତି ଜଷ୍ଟିସ୍ ସ୍ୱର୍ଣ୍ଣ କାନ୍ତା ଶର୍ମାଙ୍କୁ ଖୋଲାଖୋଲି ବୟକଟ୍ କରିଛନ୍ତି। ବିଚାରପତିଙ୍କ ଉପରେ ପକ୍ଷପାତିତାର ସଙ୍ଗୀନ୍ ଅଭିଯୋଗ ଆଣି ସେ ସ୍ପଷ୍ଟ କରିଛନ୍ତି ଯେ, ସେ ବ୍ୟକ୍ତିଗତ ଭାବେ କିମ୍ବା ତାଙ୍କ ଓକିଲଙ୍କ ମାଧ୍ୟମରେ ଆଉ ଏହି କୋର୍ଟରେ ହାଜର ହେବେ ନାହିଁ।

ନିଜ ସୋସିଆଲ୍ ମିଡିଆ ହ୍ୟାଣ୍ଡେଲ୍ (X) ରେ ଜଷ୍ଟିସ୍ ଶର୍ମାଙ୍କୁ ଲେଖିଥିବା ଏକ ଖୋଲା ଚିଠି ସେୟାର କରି କେଜ୍ରିୱାଲ କହିଛନ୍ତି ଯେ, “ମୋର ବିବେକର ସ୍ୱର ଶୁଣି ମୁଁ ଏହି କଠିନ ନିଷ୍ପତ୍ତି ନେଇଛି। ଏହି କୋର୍ଟରେ ଚାଲିଥିବା କାର୍ଯ୍ୟାନୁଷ୍ଠାନ ଉପରେ ମୋର ବିଶ୍ୱାସ ସମ୍ପୂର୍ଣ୍ଣ ଭାଙ୍ଗିଯାଇଛି। ନ୍ୟାୟ କେବଳ କରାଯିବା ଉଚିତ୍ ନୁହେଁ, ବରଂ ନ୍ୟାୟ ମିଳୁଥିବା ଭଳି ଲାଗିବା ଉଚିତ୍, ଏହି ମୌଳିକ ନୀତି ଏଠାରେ ପାଳନ ହେଉନାହିଁ।”

କେଜ୍ରିୱାଲ ଆହୁରି ମଧ୍ୟ ଉଲ୍ଲେଖ କରିଛନ୍ତି ଯେ, ଗାନ୍ଧିବାଦୀ ଆଦର୍ଶ ଏବଂ ସତ୍ୟାଗ୍ରହର ମାର୍ଗ ଅନୁସରଣ କରି ସେ ଏହି ପ୍ରତିବାଦ କରୁଛନ୍ତି। ଜଷ୍ଟିସ୍ ଶର୍ମାଙ୍କ ରାୟ ବିରୋଧରେ ସୁପ୍ରିମକୋର୍ଟଙ୍କ ଦ୍ୱାରସ୍ଥ ହେବାକୁ ତାଙ୍କର ଅଧିକାର ସୁରକ୍ଷିତ ରହିଛି ବୋଲି ସେ ଦୃଢ଼ତାର ସହ କହିଛନ୍ତି।

ସୂଚନାଯୋଗ୍ୟ ଯେ, ଗତ କିଛି ଦିନ ତଳେ କେଜ୍ରିୱାଲ ଏକ ଆବେଦନ କରି ଅନୁରୋଧ କରିଥିଲେ ଯେ, ଜଷ୍ଟିସ୍ ଶର୍ମା ଏହି ମାମଲାରୁ ନିଜକୁ ଦୂରେଇ ରଖନ୍ତୁ। କେଜ୍ରିୱାଲଙ୍କ ଅଭିଯୋଗ ଥିଲା ଯେ ବିଚାରପତିଙ୍କ ସନ୍ତାନ କେନ୍ଦ୍ର ସରକାରଙ୍କ ପ୍ୟାନେଲ୍ ଓକିଲ ଭାବେ କାର୍ଯ୍ୟ କରୁଛନ୍ତି ଏବଂ ଏହି ମାମଲାରେ ସିବିଆଇ ପକ୍ଷରୁ ଲଢ଼ୁଥିବା ସଲିସିଟର ଜେନେରାଲ୍ ତୁଷାର ମେହେଟ୍ଟାଙ୍କ ସହ ସେମାନଙ୍କର ବୃତ୍ତିଗତ ସମ୍ପର୍କ ରହିଛି। ଏହାଛଡ଼ା ଆରଏସଏସ ସହ ଜଡ଼ିତ ଏକ କାର୍ଯ୍ୟକ୍ରମରେ ବିଚାରପତିଙ୍କ ଉପସ୍ଥିତିକୁ ନେଇ ମଧ୍ୟ ସେ ଆଶଙ୍କା ପ୍ରକଟ କରିଥିଲେ।

ତେବେ ଜଷ୍ଟିସ୍ ଶର୍ମା କେଜ୍ରିୱାଲଙ୍କ ଏହି ଆବେଦନକୁ କଡ଼ା ଭାଷାରେ ଖାରଜ କରିଦେଇଥିଲେ। ସେ ନିଜ ରାୟରେ ସ୍ପଷ୍ଟ କରିଥିଲେ, “ମୁଁ ସମ୍ବିଧାନର ଶପଥ ନେଇଛି। କୌଣସି ଚାପରେ ନ୍ୟାୟ ମୁଣ୍ଡ ନୁଆଁଇବ ନାହିଁ। ବିନା କୌଣସି ଭୟ କିମ୍ବା ପକ୍ଷପାତରେ ମୁଁ ଏହି ମାମଲାର ଶୁଣାଣି କରିବି। ବିନା କୌଣସି ଠୋସ୍ ପ୍ରମାଣରେ ସଂସ୍ଥାନର ନିରପେକ୍ଷତା ଉପରେ ପ୍ରଶ୍ନ ଉଠାଇବା ଗ୍ରହଣୀୟ ନୁହେଁ।”

ତଳ କୋର୍ଟରୁ କେଜ୍ରିୱାଲଙ୍କୁ ଏହି ମାମଲାରେ ମିଳିଥିବା ମୁକ୍ତିକୁ ଚ୍ୟାଲେଞ୍ଜ କରି ସିବିଆଇ ହାଇକୋର୍ଟରେ ଏହି ଆବେଦନ କରିଛି। ଆଇନ ବିଶେଷଜ୍ଞମାନେ ଚେତାବନୀ ଦେଇଛନ୍ତି ଯେ, କୋର୍ଟରେ ହାଜର ନହେବା କେଜ୍ରିୱାଲଙ୍କ ପାଇଁ ମହଙ୍ଗା ପଡ଼ିପାରେ। ବରିଷ୍ଠ ଆଇନଜୀବୀ ସତୀଶ ତାମଟାଙ୍କ ଅନୁଯାୟୀ, ଖଲାସ ହେବା ସମୟରେ ଅଭିଯୁକ୍ତଙ୍କୁ ଏକ ବଣ୍ଡ୍ ସ୍ୱାକ୍ଷର କରିବାକୁ ପଡ଼ିଥାଏ। ଯଦି ସେ ଅପିଲ୍ ପ୍ରକ୍ରିୟାରେ ହାଜର ନହୁଅନ୍ତି, ତେବେ କୋର୍ଟ ପ୍ରଥମେ ଜାମିନଯୋଗ୍ୟ ଏବଂ ପରେ ଜାମିନବିହୀନ ୱାରେଣ୍ଟ ଜାରି କରି ତାଙ୍କୁ ହାଜର ହେବାକୁ ବାଧ୍ୟ କରିପାରିବେ।

ବର୍ତ୍ତମାନ କେଜ୍ରିୱାଲଙ୍କ ଏହି ଆଭିମୁଖ୍ୟ ମାମଲାକୁ ଏକ ନୂଆ ରାଜନୈତିକ ଏବଂ ଆଇନଗତ ମୋଡ଼ ଦେଇଛି। ନ୍ୟାୟିକ ପ୍ରକ୍ରିୟାରୁ ନିଜକୁ ଏପରି ଦୂରେଇ ରଖିବା ପଦକ୍ଷେପ ସମ୍ଭବତଃ ଏକ ବଡ଼ ସାମ୍ବିଧାନିକ ବିତର୍କକୁ ଜନ୍ମ ଦେଇପାରେ।