ଗ୍ରୀଷ୍ମ ଋତୁ ଆସିବା କ୍ଷଣି ଲୋକଙ୍କର ସବୁଠାରୁ ପ୍ରିୟ ଫଳ ପାଲଟିଯାଏ ତରଭୁଜ। ଶରୀରକୁ ଥଣ୍ଡା ରଖିବା ସହ ଜଳୀୟ ଅଂଶ ପୂରଣ କରିବାରେ ଏହାର ଜବାବ ନାହିଁ। କିନ୍ତୁ ଆପଣ ଜାଣନ୍ତି କି, ପ୍ରବଳ ଖରା ଏବଂ ରକ୍ଷଣାବେକ୍ଷଣରେ ସାମାନ୍ୟ ଅବହେଳା କାରଣରୁ ଏହି ଅମୃତ ତୁଲ୍ୟ ଫଳ ଆପଣଙ୍କ ପାଇଁ ‘ବିଷ’ ବା ମାରାତ୍ମକ ଫୁଡ୍ ପଏଜନିଂର କାରଣ ପାଲଟିପାରେ?
ନିକଟରେ ମୁମ୍ବାଇରେ ଏହି ତରଭୂଜ ଖାଇବା ଦ୍ୱାରା ଏକ ପରିବାର ପ୍ରାଣ ହରାଇଥିବା ଆଶଙ୍କା କରାଯାଉଛି। ଏହି ଘଟଣା ପରେ ଖରାଦିନେ କଟା ଫଳ, ବିଶେଷକରି ତରଭୁଜର ସୁରକ୍ଷିତ ବ୍ୟବହାରକୁ ନେଇ ଚିନ୍ତା ବଢ଼ିଯାଇଛି।
ତରଭୁଜରେ ପ୍ରଚୁର ପରିମାଣରେ ପାଣି ଥାଏ ଏବଂ ଏହାର ଏସିଡିଟି ସ୍ତର ବହୁତ କମ୍ ରହିଥାଏ। ଏଭଳି ପରିବେଶ କ୍ଷତିକାରକ ବ୍ୟାକ୍ଟେରିଆ ବୃଦ୍ଧି ପାଇଁ ଅତ୍ୟନ୍ତ ଅନୁକୂଳ ହୋଇଥାଏ।
ମାଟି କିମ୍ବା ଜଳସେଚନ ପାଣି ସଂସ୍ପର୍ଶରେ ଆସିବା କାରଣରୁ ତରଭୁଜର ବାହାର ଚୋପାରେ ଅନେକ ସମୟରେ ମାରାତ୍ମକ ଜୀବାଣୁ ଲାଗି ରହିଥାନ୍ତି। ଯେତେବେଳେ ଆମେ ତରଭୁଜକୁ ନଧୋଇ ସିଧାସଳଖ ଛୁରିରେ କାଟୁ, ସେତେବେଳେ ବାହାରେ ଥିବା ବ୍ୟାକ୍ଟେରିଆ ସିଧାସଳଖ ଭିତରର ମିଠା ଅଂଶକୁ ପ୍ରବେଶ କରନ୍ତି।
ଓଡ଼ିଶା ଭଳି ରାଜ୍ୟରେ ଏବେ ପ୍ରବଳ ଗ୍ରୀଷ୍ମ ପ୍ରବାହ ଜାରି ରହିଛି। ଅତ୍ୟଧିକ ଗରମରେ ଏହି ବ୍ୟାକ୍ଟେରିଆଗୁଡ଼ିକ ଦ୍ରୁତ ଗତିରେ ବଂଶବିସ୍ତାର କରିଥାନ୍ତି।
ଅନେକ ସମୟରେ ଗୋଟିଏ କଟିଂ ବୋର୍ଡ କିମ୍ବା ଛୁରିରେ କଞ୍ଚା ମାଂସ କାଟିବା ପରେ ବିନା ସଫାରେ ସେଥିରେ ତରଭୁଜ କାଟିଲେ ବ୍ୟାକ୍ଟେରିଆ ବ୍ୟାପିବାର ଆଶଙ୍କା ଦ୍ୱିଗୁଣିତ ହୋଇଯାଏ।
ତେଣୁ ବାହାରୁ କଟା ଫଳ କିଣନ୍ତୁ ନାହିଁ। ରାସ୍ତା କଡ଼ରେ ଖୋଲାରେ ବିକ୍ରି ହେଉଥିବା କଟା ତରଭୁଜ କେବେବି ଖାଆନ୍ତୁ ନାହିଁ। ଏଥିରେ ଧୂଳିମଳି ପଡ଼ିବା ସହ ଫ୍ରିଜ୍ରେ ରଖାଯାଉନଥିବାରୁ ଏହା ବିପଦଜନକ ହୋଇପାରେ।
ବଜାରରୁ ତରଭୁଜ ଆଣିବା ପରେ କାଟିବା ପୂର୍ବରୁ ପାଣିରେ ଏହାର ବାହାର ଚୋପାକୁ ଭଲ ଭାବରେ ଘଷି ସଫା କରନ୍ତୁ।
ତରଭୁଜ କାଟିବାର ତୁରନ୍ତ ପରେ ବଳକା ଅଂଶକୁ ଫ୍ରିଜ୍ରେ ୫ ଡିଗ୍ରୀ ସେଲସିୟସ୍ ତାପମାତ୍ରା ତଳେ ଷ୍ଟୋର୍ କରନ୍ତୁ।
ଯଦି କଟା ତରଭୁଜ ସାଧାରଣ ତାପମାତ୍ରାରେ ୨ ଘଣ୍ଟାରୁ ଅଧିକ ସମୟ ରହିଛି, ତେବେ ତାହାକୁ ଆଦୌ ଖାଆନ୍ତୁ ନାହିଁ, ଫୋପାଡ଼ି ଦିଅନ୍ତୁ।
ଯଦି ତରଭୁଜରୁ ଖଟା ଗନ୍ଧ ଆସୁଛି, ମଦ ଭଳି ବାସ୍ନା ମାରୁଛି କିମ୍ବା ଏହା ଲାଳୁଆ ହୋଇଯାଇଛି, ତେବେ ତାହା ଖରାପ ହୋଇସାରିଛି ବୋଲି ଜାଣିବେ।
ବିଶେଷକରି ଛୋଟ ପିଲା ଏବଂ ବୟସ୍କ ବ୍ୟକ୍ତିମାନଙ୍କ କ୍ଷେତ୍ରରେ ଦୂଷିତ ଫଳ ଖାଇଲେ ଡିହାଇଡ୍ରେସନ୍ ଏବଂ ସେପ୍ସିସ୍ ଭଳି ମାରାତ୍ମକ ରୋଗ ହେବାର ଆଶଙ୍କା ଥାଏ।
