WFH rule for employees: PM ମୋଦୀଙ୍କ ଅପିଲ ପରେ ଏହି ରାଜ୍ୟରେ ଗ୍ରୁପ୍ C-D କର୍ମଚାରୀଙ୍କ ପାଇଁ WFHର ନିର୍ଦ୍ଦେଶ

ନୂଆଦିଲ୍ଲୀ:ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ମିତବ୍ୟୟତା ଏବଂ ଇନ୍ଧନ ସଂରକ୍ଷଣ ପାଇଁ ଅପିଲ ପରେ, ଅନେକ ରାଜ୍ୟ ସରକାର ନିରନ୍ତର ନିଜସ୍ୱ ନିଷ୍ପତ୍ତି ନେଉଛନ୍ତି। ଅନେକ ରାଜ୍ୟ ଏହି ଆହ୍ବାନ ଉପରେ କାର୍ଯ୍ୟ କରିବା ଆରମ୍ଭ କରିସାରିଛନ୍ତି। ବର୍ତ୍ତମାନ ତ୍ରିପୁରାର ଭାରତୀୟ ଜନତା ପାର୍ଟି (ବିଜେପି) ସରକାର ଏହାର ୫୦ପ୍ରତିଶତ ଗ୍ରୁପ୍ C ଏବଂ D କର୍ମଚାରୀଙ୍କୁ ଘରୁ କାମ (Work From Home)କରିବାକୁ ନିର୍ଦ୍ଦେଶ ଦେଇ ନିଜ ରାଜ୍ୟରେ ଇନ୍ଧନ ସଂରକ୍ଷଣ ଅଭିଯାନରେ ସାମିଲ ହୋଇଛି ।

ବୁଧବାର ଦିନ ଜାରି ହୋଇଥିବା ଏକ ସରକାରୀ ନିର୍ଦ୍ଦେଶରେ କୁହାଯାଇଛି ଯେ ରାଜ୍ୟର ୫୦ ପ୍ରତିଶତ ଗ୍ରୁପ୍ ସି ଏବଂ ଡି କର୍ମଚାରୀ ଘରୁ କାମ କରିବେ, ଯାହା ତୁରନ୍ତ କାର୍ଯ୍ୟକାରୀ ହେବ। ପ୍ରଧାନମନ୍ତ୍ରୀ ମୋଦୀ ନାଗରିକ ଏବଂ ପ୍ରତିଷ୍ଠାନଗୁଡ଼ିକୁ ଇନ୍ଧନ ସଂରକ୍ଷଣ କରିବାକୁ ଏବଂ ସମ୍ଭବ ହେଲେ ଘରୁ କାମ କରିବାକୁ ଅନୁରୋଧ କରିବା ପରେ ଏହି ନିର୍ଦ୍ଦେଶ ଦିଆଯାଇଛି।

ଏହି ନିର୍ଦ୍ଦେଶ ସମ୍ପର୍କରେ ରାଜ୍ୟ ସାଧାରଣ ପ୍ରଶାସନ (GA) ବିଭାଗର ସ୍ୱତନ୍ତ୍ର ସଚିବ ଏ.କେ. ଭଟ୍ଟାଚାର୍ଯ୍ୟ କହିଛନ୍ତି, “HOD ମାନଙ୍କୁ ନିଷ୍ପତ୍ତି ନେବାକୁ ପଡିବ ଯେ ଗ୍ରୁପ୍ C ଏବଂ D କର୍ମଚାରୀଙ୍କ ମଧ୍ୟରୁ ୫୦ ପ୍ରତିଶତ ପ୍ରତିଦିନ କାର୍ଯ୍ୟାଳୟରେ ଯୋଗଦେବା ଆବଶ୍ୟକ ଏବଂ ବାକି ୫୦ପ୍ରତିଶତଙ୍କୁ ଘରୁ କାମ କରିବାକୁ ନିର୍ଦ୍ଦେଶ ଦିଆଯିବ।”

ନିର୍ଦ୍ଦେଶରେ ଆହୁରି କୁହାଯାଇଛି, “ସମସ୍ତ ବିଭାଗ ମୁଖ୍ୟଙ୍କୁ ପରାମର୍ଶ ଦିଆଯାଇଛି ଯେ ସେମାନେ ଗ୍ରୁପ୍ C ଏବଂ D କର୍ମଚାରୀଙ୍କ ପାଇଁ ଏକ ସାପ୍ତାହିକ ଡ୍ୟୁଟି ରୋଷ୍ଟର ପ୍ରସ୍ତୁତ କରନ୍ତୁ ଏବଂ ସେମାନଙ୍କୁ ବିକଳ୍ପ ସପ୍ତାହରେ କାର୍ଯ୍ୟାଳୟରେ ଯୋଗଦେବାକୁ କୁହନ୍ତୁ। ପ୍ରଥମ ସପ୍ତାହ ପାଇଁ ରୋଷ୍ଟର ଚୂଡ଼ାନ୍ତ କରିବା ସମୟରେ, ମୁଖ୍ୟ କାର୍ଯ୍ୟାଳୟ ଅଧିକାରୀମାନଙ୍କୁ ମଧ୍ୟ ପରାମର୍ଶ ଦିଆଯାଇଛି ଯେ ସେମାନେ ସେମାନଙ୍କ କାର୍ଯ୍ୟାଳୟ ନିକଟରେ ରହୁଥିବା ଅଧିକାରୀମାନଙ୍କୁ ସାମିଲ କରନ୍ତୁ।”

ନିର୍ଦ୍ଦେଶରେ କୁହାଯାଇଛି ଯେ ରୋଷ୍ଟର ଅନୁଯାୟୀ, ଏକ ନିର୍ଦ୍ଦିଷ୍ଟ ଦିନରେ ଘରୁ କାମ କରୁଥିବା ଅଧିକାରୀମାନେ ସର୍ବଦା ଟେଲିଫୋନ ଏବଂ ଇଲେକ୍ଟ୍ରୋନିକ୍ ଯୋଗାଯୋଗ ମାଧ୍ୟମରେ ଉପଲବ୍ଧ ରହିବେ। କୌଣସି ଜରୁରୀକାଳୀନ କାର୍ଯ୍ୟ ପାଇଁ ଡକାଗଲେ ସେମାନଙ୍କୁ କାର୍ଯ୍ୟାଳୟରେ ଉପସ୍ଥିତ ରହିବାକୁ ପଡିବ।

ଏଥିରେ ଆହୁରି କୁହାଯାଇଛି, “ସମାନ ନିର୍ଦ୍ଦେଶ ସାର୍ବଜନୀନ କ୍ଷେତ୍ର ଉଦ୍ୟୋଗ (PSU), ସ୍ଥାନୀୟ ସଂସ୍ଥା ଏବଂ ଅନ୍ୟାନ୍ୟ ସ୍ୱାୟତ୍ତ ସାମ୍ବିଧାନିକ ସଂସ୍ଥା ଏବଂ ରାଜ୍ୟ ସରକାରଙ୍କ ଅନ୍ୟାନ୍ୟ ସମସ୍ତ ଅଧୀନସ୍ଥ କାର୍ଯ୍ୟାଳୟଗୁଡ଼ିକୁ ମଧ୍ୟ ଜାରି କରାଯାଇପାରେ। ଏହି ନିର୍ଦ୍ଦେଶ ତୁରନ୍ତ କାର୍ଯ୍ୟକାରୀ ହେବ ଏବଂ ପରବର୍ତ୍ତୀ ନିର୍ଦ୍ଦେଶ ପର୍ଯ୍ୟନ୍ତ ବଳବତ୍ତର ରହିବ।”

ସରକାରୀ ନିର୍ଦ୍ଦେଶରେ ଏହା ମଧ୍ୟ ଉଲ୍ଲେଖ କରାଯାଇଛି ଯେ, ଏହି ନିର୍ଦ୍ଦେଶଗୁଡ଼ିକ ଜରୁରୀ କିମ୍ବା ଜରୁରୀକାଳୀନ ସେବାରେ ନିୟୋଜିତ କାର୍ଯ୍ୟାଳୟ ଏବଂ କର୍ମଚାରୀଙ୍କ ପାଇଁ ପ୍ରଯୁଜ୍ୟ ହେବ ନାହିଁ। ବର୍ତ୍ତମାନ, ଏହି ଉତ୍ତର-ପୂର୍ବ ରାଜ୍ୟରେ ପ୍ରାୟ ୧୦୦,୦୦୦ ସରକାରୀ କର୍ମଚାରୀ ଅଛନ୍ତି, ଯାହାଙ୍କ ମଧ୍ୟରୁ ଅଧିକାଂଶ ଗ୍ରୁପ୍ C ଏବଂ D କର୍ମଚାରୀ।