କଟକ: କଟକରେ ଦୁଇ ଭାଇଙ୍କ ବିରୋଧରେ ଲାଗିଲା ଜାତୀୟ ସୁରକ୍ଷା ଆଇନ। ଆଇନ ଶୃଙ୍ଖଳାକୁ ନେଇ ଚିନ୍ତା ବଢ଼ିବା ପରେ ଜିଲ୍ଲା ପ୍ରଶାସନ ଏହି କଡ଼ା ପଦକ୍ଷେପ ନେଇଛି। ଏସପିଙ୍କ ସୁପାରିଶ ଆଧାରରେ କଟକ ଜିଲ୍ଲାପାଳ ଏହି ଆଦେଶ ଜାରି କରିଛନ୍ତି।
NSA ଲାଗୁ ହୋଇଥିବା ଦୁଇ ଭାଇ ହେଲେ ଜ୍ୟୋତି ପ୍ରକାଶ ପ୍ରହରାଜ ଏବଂ ଜ୍ୟୋତି ସମ୍ରାଟ ପ୍ରହରାଜ। ଦୁହେଁଙ୍କୁ ପରବର୍ତ୍ତୀ ନିର୍ଦ୍ଦେଶ ଯାଏଁ ଚୌଦ୍ୱାର ସର୍କଲ ଜେଲ୍ରେ ରଖିବାକୁ ଆଦେଶ ହୋଇଛି।
ସୂଚନା ଅନୁସାରେ, ସାଧାରଣ ଶାନ୍ତି ଓ ଜନସୁରକ୍ଷାକୁ ନଜରରେ ରଖି ଏହି ନିଷ୍ପତ୍ତି ନିଆଯାଇଛି। ପ୍ରଶାସନର ମତରେ, ଏଭଳି ପଦକ୍ଷେପ ଆଗାମୀ ଦିନରେ ଆଇନ ଶୃଙ୍ଖଳା ବଜାୟ ରଖିବାରେ ସହାୟକ ହେବ।
ଜିଲ୍ଲାପାଳଙ୍କ କାର୍ଯ୍ୟାଳୟରୁ ଜାରି ଆଦେଶରେ ଜ୍ୟୋତି ସମ୍ରାଟ ପ୍ରହରାଜ ଓରଫ ବାପିଙ୍କ ନାଁ ଉଲ୍ଲେଖ ରହିଛି। ସେ ଭଦ୍ରେଶ୍ୱର ଥାନା ଅଧୀନ ଝାଡ଼େଶ୍ୱରପୁର ଅଞ୍ଚଳର ବୋଲି କୁହାଯାଇଛି। ତାଙ୍କ ବିରୋଧରେ ପୂର୍ବରୁ ଏକ ମାମଲା ରହିଥିବା ଆଦେଶରେ ଉଲ୍ଲେଖ ଅଛି।
NSA ହେଉଛି ଏକ ପ୍ରତିରୋଧମୂଳକ ଆଇନ। ଜନଶାନ୍ତି ଓ ସାଧାରଣ ସୁରକ୍ଷା ପ୍ରତି ବିପଦ ଥିବା ଆଶଙ୍କା କଲେ ପ୍ରଶାସନ ଏହି ଆଇନ ଅଧୀନରେ ଡିଟେନସନ ଆଦେଶ ଜାରି କରିପାରେ।
