କ’ଣ ଟ୍ରମ୍ପଙ୍କୁ ମିଳିଲା ବଡ଼ ବିଜୟ? ୟୁରାନିୟମ୍ ଛାଡ଼ିବାକୁ ଇରାନ ରାଜି, ଜାଣନ୍ତୁ ତେହେରାନର ୪ଟି ବଡ଼ ସର୍ତ୍ତ

ୱାସିଂଟନ୍: ଆମେରିକା ଏବଂ ଇରାନ ମଧ୍ୟରେ ଲାଗି ରହିଥିବା ଯୁଦ୍ଧ ଏବେ ଏକ ନିର୍ଣ୍ଣାୟକ ମୋଡ଼ରେ ପହଞ୍ଚିଥିବା ମନେହେଉଛି। ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଦାବି କରିଛନ୍ତି ଯେ, ଇରାନ ସହ ଏକ ଶାନ୍ତି ଚୁକ୍ତି ପ୍ରାୟତଃ ଚୂଡ଼ାନ୍ତ ପର୍ଯ୍ୟାୟରେ ପହଞ୍ଚିଛି। ଏହି ଚୁକ୍ତିର ସବୁଠାରୁ ଗୁରୁତ୍ୱପୂର୍ଣ୍ଣ ଦିଗ ହେଉଛି ଯେ, ଇରାନ ନିଜର ଅତି ସମୃଦ୍ଧ ୟୁରାନିୟମ୍ ଭଣ୍ଡାରକୁ ଛାଡ଼ିବା ପାଇଁ ନୀତିଗତ ଭାବେ ଗ୍ରୀନ ସିଗ୍ନାଲ ଦେଇଛି। ତେବେ ଏହା ବଦଳରେ ତେହେରାନ ଚୁପ୍ ବସିନାହିଁ; ଆମେରିକା ସାମ୍ନାରେ ନିଜର ୪ଟି ବଡ଼ ସର୍ତ୍ତ ମଧ୍ୟ ରଖିଛି।

ଯଦିଓ ଟ୍ରମ୍ପ ପ୍ରଶାସନ ୟୁରାନିୟମ୍ ପ୍ରସଙ୍ଗରେ ଇରାନକୁ ମନାଇବାରେ ସଫଳ ହୋଇଥିବା କୁହାଯାଉଛି, କିନ୍ତୁ ଇରାନ ସ୍ପଷ୍ଟ କରିଛି ଯେ ଏହି ନିମ୍ନଲିଖିତ ଦାବିଗୁଡ଼ିକ ପୂରଣ ନହେଲେ ଚୁକ୍ତି ସମ୍ଭବ ନୁହେଁ:

୧. ଅବରୋଧ ଏବଂ କଟକଣା ହଟାଇବା: ଇରାନର ବନ୍ଦରଗୁଡ଼ିକ ଉପରେ ଥିବା ଆମେରିକାର ସାମୁଦ୍ରିକ ଅବରୋଧକୁ ତୁରନ୍ତ ହଟାଇବାକୁ ପଡ଼ିବ। ଏହା ସହିତ ଇରାନ ଉପରେ ଲାଗୁ ହୋଇଥିବା ସମସ୍ତ ଅନ୍ତର୍ଜାତୀୟ ଆର୍ଥିକ କଟକଣା ପ୍ରତ୍ୟାହାର କରାଯିବା ଆବଶ୍ୟକ।

୨. ଜବତ ସମ୍ପତ୍ତି ମୁକୁଳାଇବା: ଆମେରିକା ଏବଂ ବିଦେଶରେ ଜବତ ହୋଇ ରହିଥିବା ଇରାନର କୋଟି କୋଟି ଡଲାରର ସମ୍ପତ୍ତିକୁ ବିନା କୌଣସି ସର୍ତ୍ତରେ ମୁକୁଳାଇବାକୁ ହେବ।

୩. ଯୁଦ୍ଧ କ୍ଷତିପୂରଣ: ଆମେରିକା ଏବଂ ଇସ୍ରାଏଲର ଆକ୍ରମଣ ଯୋଗୁଁ ଇରାନର ପରମାଣୁ କେନ୍ଦ୍ର ତଥା ଅନ୍ୟାନ୍ୟ କ୍ଷେତ୍ରରେ ଯେଉଁ ବ୍ୟାପକ କ୍ଷୟକ୍ଷତି ହୋଇଛି, ତାହାର ଉପଯୁକ୍ତ କ୍ଷତିପୂରଣ ଦେବାକୁ ପଡ଼ିବ।

୪. ସ୍ଥାୟୀ ଯୁଦ୍ଧବିରାମ: ପରମାଣୁ କାର୍ଯ୍ୟକ୍ରମ ନେଇ କୌଣସି ବି ଚୂଡ଼ାନ୍ତ ଆଲୋଚନା ପୂର୍ବରୁ ଯୁଦ୍ଧକୁ ସମ୍ପୂର୍ଣ୍ଣ ଭାବେ ବନ୍ଦ କରିବାକୁ ପଡ଼ିବ। ଏଥିସହ ଭବିଷ୍ୟତରେ ଆଉ ଆକ୍ରମଣ ନକରିବାର ଗ୍ୟାରେଣ୍ଟି ଆମେରିକାକୁ ଦେବାକୁ ହେବ।

ଏହା କ’ଣ ଟ୍ରମ୍ପଙ୍କ ପାଇଁ ଏକ ବଡ଼ ବିଜୟ?

ନ୍ୟୁୟର୍କ ଟାଇମ୍ସର ରିପୋର୍ଟ ଅନୁଯାୟୀ, ଇରାନ ନିଜର ପରମାଣୁ ଅସ୍ତ୍ରଶସ୍ତ୍ର ତିଆରି କରିବା ପାଇଁ ବ୍ୟବହୃତ ହୋଇପାରୁଥିବା ୟୁରାନିୟମ୍ ଛାଡ଼ିବାକୁ ଯେଉଁ ସମ୍ମତି ଜଣାଇଛି, ତାହା ଟ୍ରମ୍ପଙ୍କ ‘ମାକ୍ସିମମ୍ ପ୍ରେସର୍’ ନୀତିର ଏକ ବଡ଼ କୂଟନୈତିକ ସଫଳତା।

ଡୋନାଲ୍ଡ ଟ୍ରମ୍ପ ନିଜେ କହିଛନ୍ତି ଯେ ଏହି ଶାନ୍ତି ଚୁକ୍ତି ମାଧ୍ୟମରେ ହର୍ମୁଜ୍ ପ୍ରଣାଳୀକୁ ମଧ୍ୟ ପୁଣିଥରେ ବ୍ୟବସାୟ ପାଇଁ ଖୋଲାଯିବ। କିନ୍ତୁ ଇରାନ ନିଜ ସର୍ତ୍ତରେ ଅଟଳ ଥିବାରୁ ଏବଂ ହର୍ମୁଜ୍ ପ୍ରଣାଳୀ ଉପରେ ନିଜର ନିୟନ୍ତ୍ରଣ ବଜାୟ ରଖିବାକୁ ଚାହୁଁଥିବାରୁ, ଏହି ଚୁକ୍ତି କେତେ ଶୀଘ୍ର ବାସ୍ତବ ରୂପ ନେଉଛି ତାହା ଏବେ ସବୁଠାରୁ ବଡ଼ ପ୍ରଶ୍ନ ପାଲଟିଛି।