ନୂଆଦିଲ୍ଲୀ: ଭାରତର ମେଗା ପ୍ଲାନ୍
ଉଡିବ ପାକିସ୍ତାନ-ଚୀନ ହୋସ୍…
ଫ୍ରାନ୍ସରୁ ଆସୁଛି ଆଉ ୧୧୪ ରାଫେଲ୍!
ଭାରତୀୟ ବାୟୁସେନାକୁ ଆହୁରି ମଜବୁତ କରିବା ପାଇଁ ଭାରତ ଏବଂ ଫ୍ରାନ୍ସ ମଧ୍ୟରେ ୧୧୪ଟି ନୂତନ ରାଫେଲ ଲଢ଼ୁଆ ବିମାନ କ୍ରୟ ପାଇଁ ଆଲୋଚନା ତୀବ୍ର ହୋଇଛି। ପ୍ରାୟ ୪୦ ବିଲିୟନ ଡଲାର (ପ୍ରାୟ ୩.୩ ଲକ୍ଷ କୋଟି ଟଙ୍କା) ମୂଲ୍ୟର ଏହି ମେଗା-ଡିଲରେ ଭାରତ ଏକ ପ୍ରମୁଖ ସର୍ତ୍ତ ଉପରେ ଜିଦ୍ ଧରିଛି। ଭାରତ ଫ୍ରାନ୍ସ ଉପରେ ବାରମ୍ବାର ନିର୍ଭରଶୀଳତାକୁ ଏଡାଇ ଏହି ଫରାସୀ ଯୁଦ୍ଧ ବିମାନଗୁଡ଼ିକୁ ଭାରତୀୟ ନିର୍ମିତ କ୍ଷେପଣାସ୍ତ୍ର ସହିତ ସଜ୍ଜିତ କରିବାକୁ ଚାହୁଁଛି। ଏହି ଚୁକ୍ତିର ସବୁଠାରୁ ଗୁରୁତ୍ୱପୂର୍ଣ୍ଣ ପଏଣ୍ଟ ହେଉଛି, “ଇଣ୍ଟରଫେସ୍ ନିୟନ୍ତ୍ରଣ ଡକ୍ୟୁମେଣ୍ଟ୍ସ” (ICDs) ସହିତ ଜଡିତ। ଏଗୁଡ଼ିକ ହେଉଛି ଅତ୍ୟନ୍ତ ଗୋପନୀୟ ବୈଷୟିକ ବ୍ଲୁପ୍ରିଣ୍ଟ ଏବଂ ସଫ୍ଟୱେର୍ କୋଡ୍, ଯାହା ବ୍ୟାଖ୍ୟା କରେ ଯେ ବିମାନର କମ୍ପ୍ୟୁଟର ଏହାର କ୍ଷେପଣାସ୍ତ୍ର ଏବଂ ଅସ୍ତ୍ରଶସ୍ତ୍ର ସହିତ କିପରି କାମ କରେ।
ଆଉ ଯଦି ଫ୍ରାନ୍ସ ଏହି ଡକ୍ୟୁମେଣ୍ଟଗୁଡ଼ିକୁ ଭାରତକୁ ହସ୍ତାନ୍ତର କରେ, ତେବେ ଭାରତୀୟ ବାୟୁସେନା ଫ୍ରାନ୍ସ ସହାୟତା ବିନା ଏହାର ସ୍ୱଦେଶୀ ‘ଅସ୍ତ୍ର’ ବିଅଣ୍ଡ ଭିଜୁଆଲ ରେଞ୍ଜ ମିସାଇଲ୍ ଏବଂ ଆଗାମୀ ବ୍ରହ୍ମୋସ-ଏନଜି ସୁପରସୋନିକ୍ କ୍ରୁଜ୍ କ୍ଷେପଣାସ୍ତ୍ରକୁ ରାଫେଲରେ ସଂଯୁକ୍ତ କରିବାକୁ ସକ୍ଷମ ହେବ। ତଥାପି କୁହାଯାଉଛି ଫ୍ରାନ୍ସ ଏହାର ଅତ୍ୟାଧୁନିକ ବୌଦ୍ଧିକ ସମ୍ପତ୍ତି ବାଣ୍ଟିବାକୁ ଅନିଚ୍ଛୁକ। ଏହା ଭୟ କରୁଛି ଯେ ଭାରତ ଏବଂ ରୁଷ ସହିତ ମିଳିତ ଭାବରେ ବିକଶିତ ବ୍ରହ୍ମୋସ ଭଳି କ୍ଷେପଣାସ୍ତ୍ରକୁ ରାଫେଲରେ ସମନ୍ୱିତ କରିବାର ପ୍ରକ୍ରିୟା ପାଶ୍ଚାତ୍ୟ ଗୁପ୍ତ ଡାଟା ଲିକ୍ କରିପାରେ।
ବର୍ତ୍ତମାନ, ଉଭୟ ଦେଶର ଅଧିକାରୀମାନେ ଏକ ବୁଝାମଣା ବାଟ ଖୋଜିବାକୁ ଚେଷ୍ଟା କରୁଛନ୍ତି ଯାହା ଭାରତର ଉଦ୍ଦେଶ୍ୟ ପୂରଣ କରିବ ଏବଂ ଫ୍ରାନ୍ସର ସଫ୍ଟୱେର୍ ଗୋପନୀୟତାକୁ ବି ସୁରକ୍ଷା ଦେବ। ଯାହାକୁ ନେଇ ଜୁନ୍ ମାସରେ ଗୁରୁତ୍ୱପୂର୍ଣ୍ଣ ବୈଠକ ହେବାକୁ ଯାଉଛି। ସେଥିପାଇଁ ଭାରତୀୟ ବାୟୁସେନା ମୁଖ୍ୟ ଏୟାର ଚିଫ୍ ମାର୍ଶାଲ୍ ଏ.ପି. ସିଂହ ଫ୍ରାନ୍ସ ଗସ୍ତ କରୁଛନ୍ତି, ଯେଉଁଠାରେ ସେ ପ୍ୟାରିସରେ ଅନୁଷ୍ଠିତ ୟୁରୋସାଟୋରୀ ପ୍ରତିରକ୍ଷା ପ୍ରଦର୍ଶନୀରେ ମଧ୍ୟ ଯୋଗଦେବେ। ଏଥିସହିତ ଏହାର ଠିକ୍ ପରେ ପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଜୁନ୍ ୧୫ ରୁ ୧୭ ପର୍ଯ୍ୟନ୍ତ ଫ୍ରାନ୍ସର ଏଭିଆନ୍-ଲେସ୍-ବେନ୍ସରେ ୫୨ତମ G-7 ଶିଖର ସମ୍ମିଳନୀରେ ଯୋଗଦେବେ।
ତେବେ କହିରଖୁଛୁ, ଭାରତୀୟ ବାୟୁସେନା ନିକଟରେ ବର୍ତ୍ତମାନ ବିଶ୍ୱର ପ୍ରାୟ ୩୫୦ ରୁ ୫୦୦ ସବୁଠାରୁ ଘାତକ ‘ମିଟିଓର୍’ କ୍ଷେପଣାସ୍ତ୍ରର ଷ୍ଟକ୍ ଅଛି। ଏହି କ୍ଷେପଣାସ୍ତ୍ରଗୁଡ଼ିକ ଏତେ ମହଙ୍ଗା ଏବଂ ଉନ୍ନତ ଯେ ଏଗୁଡ଼ିକ କେବଳ ଶତ୍ରୁ ରାଡାର ବିମାନ କିମ୍ବା ଏୟାର ରିଫ୍ୟୁଏଲ୍ ଟ୍ୟାଙ୍କର ଭଳି ବଡ଼ ଲକ୍ଷ୍ୟ ପାଇଁ ସଂରକ୍ଷିତ କରି ରଖାଯାଇଛି । ବାୟୁସେନା ନିୟମିତ ପାଟ୍ରୋଲିଂ ପାଇଁ ରାଫେଲରେ ଭାରତରେ ନିର୍ମିତ ଆଷ୍ଟ୍ରା Mk1 ଏବଂ Mk2 କ୍ଷେପଣାସ୍ତ୍ର ବ୍ୟବହାର କରିବାକୁ ଚାହୁଁଛି, ଯାହା ଦ୍ୱାରା ମୂଲ୍ୟବାନ କ୍ଷେପଣାସ୍ତ୍ରଗୁଡ଼ିକ ଯୁଦ୍ଧ ସମୟ ପାଇଁ ସଂରକ୍ଷିତ ରହିବ।
ଏଥିସହିତ ବାୟୁସେନାର ହ୍ରାସ ପାଉଥିବା ଲଢ଼ୁଆ ସ୍କ୍ୱାର୍ଡନକୁ ଦୃଷ୍ଟିରେ ରଖି, ଏହି ଚୁକ୍ତି ଭାରତ ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ। କାରଣ ଏବେ ପଡ଼ୋଶୀ ପାକିସ୍ତାନ ଚୀନ୍ ଠାରୁ ଅତ୍ୟାଧୁନିକ J-35 ଷ୍ଟିଲ୍ଥ ଲଢ଼ୁଆ ବିମାନ କିଣିବାକୁ ପ୍ରସ୍ତୁତ ହେଉଛି। ଭାରତର ନିଜସ୍ୱ ପଞ୍ଚମ ପିଢ଼ିର ଷ୍ଟିଲ୍ଥ ବିମାନ (AMCA) ୨୦୩୦ ଦଶକର ମଧ୍ୟଭାଗ ପୂର୍ବରୁ ପ୍ରସ୍ତୁତ ହେବ ନାହିଁ, ତେଣୁ ରାଫେଲ୍ ଆଗାମୀ ଦଶନ୍ଧି ପାଇଁ ଭାରତୀୟ ଆକାଶରେ ପ୍ରମୁଖ ଶକ୍ତି ପାଲଟିବ । ଆଉ ୨୦୨୬ ଶଷ ସୁଦ୍ଧା ଫ୍ରାନ୍ସ ସହ ଏକ ଚୁକ୍ତିରେ ପହଞ୍ଚିବା ନେଇ ଆଶା ରଖିଛି ଭାରତ ।