ଇସଲାମାବାଦ: ଗଭୀର ଜଳ ସଙ୍କଟ ଓ ଆଭ୍ୟନ୍ତରୀଣ ବିବାଦରେ ଛନ୍ଦି ହୋଇପଡ଼ିଥିବା ପାକିସ୍ତାନ ଏବେ ନିଜର ବିଫଳତା ଲୁଚାଇବା ପାଇଁ ପୁଣି ଥରେ ଭାରତ ବିରୋଧରେ ବିଷୋଦଗାର କରିଛି। ସିନ୍ଧୁ ନଦୀ ଜଳ ଚୁକ୍ତି (Indus Waters Treaty)କୁ ନେଇ ଭାରତ ଓ ପାକିସ୍ତାନ ମଧ୍ୟରେ ତିକ୍ତତା ଚରମ ସୀମାରେ ପହଞ୍ଚିଥିବା ବେଳେ, ପାକିସ୍ତାନର ପ୍ରତିରକ୍ଷା ମନ୍ତ୍ରୀ ଖ୍ୱାଜା ଆସିଫ୍ ଭାରତକୁ ସିଧାସଳଖ ଯୁଦ୍ଧ ଧମକ ଦେଇଛନ୍ତି।
ଭାରତ ଯଦି ପାକିସ୍ତାନକୁ ଆସୁଥିବା ନଦୀ ପାଣି ବନ୍ଦ କରେ, ତେବେ ଇସଲାମାବାଦ ସାମରିକ ପଦକ୍ଷେପ ଗ୍ରହଣ କରିବା ସହ ଭାରତ ବିରୋଧରେ ଯୁଦ୍ଧ ଘୋଷଣା କରିବ ବୋଲି ସେ ଚେତାବନୀ ଦେଇଛନ୍ତି।
ଏକ ପାକିସ୍ତାନୀ ଗଣମାଧ୍ୟମକୁ ସାକ୍ଷାତକାର ଦେଇ ପ୍ରତିରକ୍ଷା ମନ୍ତ୍ରୀ ଆସିଫ୍ କହିଛନ୍ତି, “ନଦୀ ଜଳ ସୁରକ୍ଷା ହେଉଛି ଆମର ଜାତୀୟ ସୁରକ୍ଷାର ଏକ ପ୍ରମୁଖ ଅଂଶ। ଯେଉଁ ମୁହୂର୍ତ୍ତରେ ଆମେ ଅନୁଭବ କରିବୁ ଯେ ଭାରତ ଆମ ଜଳ ଯୋଗାଣରେ ବାଧା ସୃଷ୍ଟି କରୁଛି, ସେହି ସମୟରେ ଆମେ ନିଶ୍ଚିତ ଭାବେ ଭାରତ ବିରୋଧରେ ଯୁଦ୍ଧକୁ ଓହ୍ଲାଇବୁ।” ନଦୀ ପାଣି ପ୍ରବାହକୁ ରୋକିବା ପାଇଁ ଭାରତ କୌଣସି ପ୍ରକାରର ଡ୍ୟାମ୍ କିମ୍ବା ଟନେଲ୍ ନିର୍ମାଣ କଲେ ତାକୁ ପାକିସ୍ତାନ ଧ୍ୱଂସ କରିଦେବ ବୋଲି ମଧ୍ୟ ସେ ଚେତାବନୀ ଦେଇଛନ୍ତି।
ସୂଚନାଯୋଗ୍ୟ, ଜମ୍ମୁ-କଶ୍ମୀରର ପହଲଗାମଠାରେ ପାକିସ୍ତାନ ପ୍ରାୟୋଜିତ ଏକ ବଡ଼ ଧରଣର ଆତଙ୍କବାଦୀ ଆକ୍ରମଣରେ ୨୬ ଜଣ ଭାରତୀୟ ପ୍ରାଣ ହରାଇବା ପରେ ନୂଆଦିଲ୍ଲୀ କଡ଼ା ଆଭିମୁଖ୍ୟ ଗ୍ରହଣ କରିଥିଲା। ଭାରତ ସ୍ପଷ୍ଟ କରିଦେଇଥିଲା ଯେ ପାକିସ୍ତାନ ସୀମାପାର ଆତଙ୍କବାଦକୁ ପାଣ୍ଠି ଯୋଗାଇବା ବନ୍ଦ ନକରିବା ପର୍ଯ୍ୟନ୍ତ ୧୯୬୦ ମସିହାର ସିନ୍ଧୁ ନଦୀ ଜଳ ଚୁକ୍ତିକୁ ସ୍ଥଗିତ ରଖାଯିବ। ଏହା ସହ ୨୦୨୮ ଜୁନ୍ ସୁଦ୍ଧା ପାକିସ୍ତାନକୁ ଯାଉଥିବା ସିନ୍ଧୁ ନଦୀର ପାଣି ସମ୍ପୂର୍ଣ୍ଣ ବନ୍ଦ କରାଯାଇପାରେ ବୋଲି ଭାରତର କେନ୍ଦ୍ର ଜଳଶକ୍ତି ମନ୍ତ୍ରୀ ସଙ୍କେତ ଦେଇଥିଲେ। ଭାରତର ଏହି କଡ଼ା ଆଭିମୁଖ୍ୟ ଯୋଗୁଁ ଏବେ ପାକିସ୍ତାନ ଶାସକ ଦଳ ଭୟଭୀତ ହୋଇପଡ଼ିଛି।
ଅନ୍ୟପଟେ, ପାକିସ୍ତାନ ନିଜର ଭୁଲ୍ ନୀତି ଯୋଗୁଁ ବର୍ତ୍ତମାନ ଦେଶ ଭିତରେ ଏକ ଭୟଙ୍କର ଜଳ ସଙ୍କଟ ଦେଇ ଗତି କରୁଛି। ଦେଶର ପ୍ରାୟ ଏକ ତୃତୀୟାଂଶ ଜନସଂଖ୍ୟା, ବିଶେଷ କରି ସିନ୍ଧ ଏବଂ ବାଲୁଚିସ୍ତାନ ଅଞ୍ଚଳରେ ପାଣି ପାଇଁ ହାହାକାର ପଡ଼ିଛି। କୃଷି ପ୍ରଧାନ ସିନ୍ଧ ପ୍ରଦେଶର କେନାଲଗୁଡ଼ିକରେ ୩୫ ରୁ ୮୦ ପ୍ରତିଶତ ପର୍ଯ୍ୟନ୍ତ ଜଳାଭାବ ଦେଖାଦେଇଛି। ଏହି ଜଳ ସଙ୍କଟକୁ ନେଇ ପାକିସ୍ତାନର ବିଭିନ୍ନ ପ୍ରଦେଶ ମଧ୍ୟରେ ଗୃହଯୁଦ୍ଧ ଭଳି ସ୍ଥିତି ସୃଷ୍ଟି ହେଲାଣି। ସିନ୍ଧ ପ୍ରଦେଶର ନେତାମାନେ ଅଭିଯୋଗ କରିଛନ୍ତି ଯେ ପଞ୍ଜାବ ପ୍ରଦେଶ ବେଆଇନ ଭାବେ ସେମାନଙ୍କ ଭାଗର ପାଣି ଚୋରି କରୁଛି, ଯାହାଫଳରେ ସିନ୍ଧରେ ଆର୍ଥିକ ମରୁଡ଼ି ପରିସ୍ଥିତି ଉପୁଜିଛି।
