‘ଏହି ବନ୍ଧୁତାକୁ କେବେ ଭୁଲିବନି ଇରାନ’: ଖାମେନେଇଙ୍କ ଅନ୍ତିମ ସଂସ୍କାରରେ ଭାରତର ଉପସ୍ଥିତିକୁ ନେଇ କୃତଜ୍ଞତା ଜଣାଇଲା ତେହେରାନ୍

ନୂଆଦିଲ୍ଲୀ: ଇରାନର ସର୍ବୋଚ୍ଚ ନେତା ତଥା ସୁପ୍ରିମ୍ ଲିଡର୍ ଆୟାତୁଲ୍ଲା ସୟଦ୍ ଅଲି ଖାମେନେଇଙ୍କ ଅନ୍ତିମ ସଂସ୍କାର ସମାରୋହରେ ଭାରତର ସକ୍ରିୟ ଯୋଗଦାନକୁ ନେଇ ଇରାନ ସରକାର ଗଭୀର କୃତଜ୍ଞତା ଜ୍ଞାପନ କରିଛନ୍ତି। ଏହି ଜାତୀୟ ଶୋକ ସମୟରେ ଭାରତ ସରକାର ଏବଂ ଏହାର ପ୍ରତିନିଧି ମଣ୍ଡଳୀ ଯେଉଁଭଳି ଭାବେ ଇରାନବାସୀଙ୍କ ପାଖରେ ଛିଡ଼ା ହୋଇ ସମବେଦନା ଜଣାଇଛନ୍ତି, ତାହାକୁ ନେଇ ନୂଆଦିଲ୍ଲୀ ସ୍ଥିତ ଇରାନ ଦୂତାବାସ ପକ୍ଷରୁ ଏକ ଭାବପୂର୍ଣ୍ଣ ବାର୍ତ୍ତା ଜାରି କରାଯାଇଛି।

ଦୂତାବାସ ଏହାକୁ ଉଭୟ ଦେଶ ମଧ୍ୟରେ ଥିବା ଐତିହାସିକ ବନ୍ଧୁତା ଏବଂ ପାରସ୍ପରିକ ସମ୍ମାନର ପ୍ରତୀକ ବୋଲି ଅଭିହିତ କରିଛି। ଇରାନ ଦୂତାବାସ ନିଜର ଅଫିସିଆଲ୍ ‘ଏକ୍ସ’ ହ୍ୟାଣ୍ଡେଲରେ ପୋଷ୍ଟ କରି ଲେଖିଛି ଯେ, “ଆୟାତୁଲ୍ଲା ଖାମେନେଇଙ୍କ ଅନ୍ତିମ ସଂସ୍କାରରେ ଭାରତର ରାଜନୈତିକ ନେତା, ସାଂସଦ, ବୁଦ୍ଧିଜୀବୀ ଏବଂ ବିଭିନ୍ନ ଧର୍ମର ପ୍ରତିନିଧିଙ୍କ ଉପସ୍ଥିତି ଦୁଇ ଦେଶର ସୁଦୃଢ଼ ସାଂସ୍କୃତିକ ତଥା ମାନବିକ ସମ୍ପର୍କକୁ ଦର୍ଶାଉଛି। ଭାରତବାସୀଙ୍କ ଏହି ବନ୍ଧୁତା ଓ ସହାନୁଭୂତିକୁ ଇରାନର ଲୋକମାନେ କେବେ ମଧ୍ୟ ଭୁଲିବେ ନାହିଁ।” ଭବିଷ୍ୟତରେ ଏହା ଦୁଇ ଦେଶର ଦ୍ୱିପାକ୍ଷିକ ସମ୍ପର୍କକୁ ଆହୁରି ମଜବୁତ କରିବ ବୋଲି ଆଶା ବ୍ୟକ୍ତ କରାଯାଇଛି।

ତେହେରାନ୍ ଠାରେ ଆୟୋଜିତ ଏହି ରାଷ୍ଟ୍ରୀୟ ଅନ୍ତିମ ସଂସ୍କାରରେ ଭାରତ ସରକାରଙ୍କ ପକ୍ଷରୁ ଏକ ଉଚ୍ଚସ୍ତରୀୟ ପ୍ରତିନିଧି ମଣ୍ଡଳୀ ଯୋଗ ଦେଇଥିଲେ। ଏଥିରେ କେନ୍ଦ୍ର ବୈଦେଶିକ ବ୍ୟାପାର ରାଷ୍ଟ୍ରମନ୍ତ୍ରୀ ପବିତ୍ର ମାର୍ଘେରିଟା ଏବଂ ବିହାର ରାଜ୍ୟପାଳ ତଥା ଅବସରପ୍ରାପ୍ତ ଲେଫ୍ଟନାଣ୍ଟ ଜେନେରାଲ୍ ସୟଦ୍ ଅତା ହସନୈନ୍ ସାମିଲ ହୋଇ ଖାମେନେଇଙ୍କୁ ଶେଷ ଶ୍ରଦ୍ଧାଞ୍ଜଳି ଅର୍ପଣ କରିଥିଲେ। ସରକାରୀ ପ୍ରତିନିଧିଙ୍କ ବ୍ୟତୀତ ଭାରତର ବିଭିନ୍ନ ରାଜନୈତିକ ଦଳର ନେତା ମଧ୍ୟ ଏହି ଶୋକସଭାରେ ସାମିଲ ହୋଇଥିଲେ। ଜମ୍ମୁ-କାଶ୍ମୀରର ପୂର୍ବତନ ମୁଖ୍ୟମନ୍ତ୍ରୀ ତଥା ପିଡିପି ନେତ୍ରୀ ମେହବୁବା ମୁଫ୍ତି ଏବଂ କଂଗ୍ରେସ ନେତା ତଥା ପୂର୍ବତନ ବୈଦେଶିକ ମନ୍ତ୍ରୀ ସଲମାନ ଖୁର୍ସିଦ୍ ପ୍ରମୁଖ ତେହେରାନ୍ ଯାଇ ଇରାନବାସୀଙ୍କ ସହ ଶୋକ ପାଳନ କରିଥିଲେ।

ସୂଚନାଯୋଗ୍ୟ ଯେ, ଗତ ଫେବୃଆରୀ ୨୮ ତାରିଖରେ ଆମେରିକା ଏବଂ ଇସ୍ରାଏଲର ମିଳିତ ଆକ୍ରମଣରେ ୮୬ ବର୍ଷୀୟ ସୁପ୍ରିମ୍ ଲିଡର୍ ଆୟାତୁଲ୍ଲା ଅଲି ଖାମେନେଇଙ୍କର ମୃତ୍ୟୁ ଘଟିଥିଲା। ୧୯୮୯ ମସିହାରୁ ସେ ଇରାନର ସର୍ବୋଚ୍ଚ ନେତା ଭାବେ ଦାୟିତ୍ୱ ତୁଲାଉଥିଲେ। ତାଙ୍କ ମୃତ୍ୟୁ ପରେ ପଶ୍ଚିମ ଏସିଆରେ ଉତ୍ତେଜନା ବୃଦ୍ଧି ପାଇଛି। ଏବେ ଇରାନରେ ୬ ଦିନ ଧରି ତାଙ୍କର ଅନ୍ତିମ ବିଦାୟ କାର୍ଯ୍ୟକ୍ରମ ଚାଲିଥିବା ବେଳେ ଆସନ୍ତା ଜୁଲାଇ ୯ ତାରିଖରେ ମାଶହାଦ୍ ସହରରେ ତାଙ୍କର ଶେଷକୃତ୍ୟ ସମ୍ପନ୍ନ ହେବ।