ବାଲେଶ୍ୱର: ପାଇପ୍ ଯୋଗେ ଆସୁଥିବା ପାନୀୟ ଜଳ ଏବେ ବାଲେଶ୍ୱର ସହରବାସୀଙ୍କ ପାଇଁ କାଳ ସାଜିଛି। ସହରର ୨୭ ନମ୍ବର ୱାର୍ଡରେ ଗତ ଗୋଟିଏ ମାସ ମଧ୍ୟରେ ୩୦ରୁ ଅଧିକ ଜଣ୍ଡିସ୍ ଆକ୍ରାନ୍ତ ଚିହ୍ନଟ ହେବା ପରେ ସ୍ଥାନୀୟ ଅଞ୍ଚଳରେ ଆତଙ୍କ ଖେଳିଯାଇଛି। ସରକାର ସହରରେ ବିଶୁଦ୍ଧ ପାନୀୟ ଜଳ ଯୋଗାଇବା ନେଇ ବଡ଼ ବଡ଼ ଦାବି କରୁଥିବା ବେଳେ, ପ୍ରକୃତ ଚିତ୍ର କିନ୍ତୁ ସମ୍ପୂର୍ଣ୍ଣ ଓଲଟା।
ସ୍ଥାନୀୟ ବାସିନ୍ଦାଙ୍କ ଅଭିଯୋଗ ଅନୁଯାୟୀ, ସେମାନଙ୍କୁ ଯୋଗାଇ ଦିଆଯାଉଥିବା ପାଇପ୍ ପାଣି ଅତ୍ୟନ୍ତ ଦୂଷିତ। ପାଣିରେ ମିଶୁଥିବା ଅପରିଷ୍କାର ପଦାର୍ଥ ଓ ଅତ୍ୟଧିକ ଟିଡିଏସ୍ ସ୍ତର ଏହି ରୋଗ ବ୍ୟାପିବାର ମୁଖ୍ୟ କାରଣ ବୋଲି ସନ୍ଦେହ କରାଯାଉଛି। କେତେକ ସମୟରେ ପାଇପରୁ ମଇଳା ପାଣି ଆସୁଥିବା ବେଳେ ଆଉ କେତେବେଳେ ପ୍ରବଳ ବ୍ଲିଚିଂ ପାଉଡର ଗନ୍ଧ ଯୋଗୁଁ ସେହି ପାଣି ପିଇବା ସମ୍ଭବ ହେଉନାହିଁ ବୋଲି ଗୀତାରାଣୀ ଦାଶ ନାମ୍ନୀ ଜଣେ ସ୍ଥାନୀୟ ମହିଳା ଅଭିଯୋଗ କରିଛନ୍ତି। ସେ କହିଛନ୍ତି, “ଏଠାରେ ପ୍ରାୟ ସମସ୍ତେ ଜଣ୍ଡିସ୍ରେ ଆକ୍ରାନ୍ତ। ମୋ ପୁଅ, ଝିଆରୀ ଓ ଅନ୍ୟ ଝିଅମାନେ ମଧ୍ୟ ଏହି ରୋଗରେ ପଡ଼ିଥିଲେ। ଆମେ ବାଧ୍ୟ ହୋଇ ଆୟୁର୍ବେଦିକ ଚିକିତ୍ସା କରୁଛୁ।”
ସ୍ୱାସ୍ଥ୍ୟ ବିଭାଗ ପକ୍ଷରୁ ପ୍ରଭାବିତ ଅଞ୍ଚଳରୁ ପାଣି ନମୁନା ସଂଗ୍ରହ କରାଯାଇଛି। ବର୍ତ୍ତମାନ ସୁଦ୍ଧା ୫ ଜଣଙ୍କଠାରେ ଜଣ୍ଡିସ୍ ନିଶ୍ଚିତ ହୋଇଥିବା ବେଳେ ୧୮ ଜଣଙ୍କ ରିପୋର୍ଟକୁ ଅପେକ୍ଷା କରାଯାଇଛି। ଅନ୍ୟପଟେ, ଜିଲ୍ଲା ଜନସ୍ୱାସ୍ଥ୍ୟ ଅଧିକାରୀ ଏହି ରୋଗ ବ୍ୟାପିବା ପଛରେ ଦୂଷିତ ପାଣି ହିଁ ମୁଖ୍ୟ କାରଣ ବୋଲି ସ୍ୱୀକାର କରିଛନ୍ତି।
ତେବେ, ପବ୍ଲିକ୍ ହେଲ୍ଥ ଇଞ୍ଜିନିୟରିଂ ଡିପାର୍ଟମେଣ୍ଟର ସୁପରିଟେଣ୍ଡିଂ ଇଞ୍ଜିନିୟର ନବୀନ ଚନ୍ଦ୍ର ସିଂ ଏହାକୁ ନେଇ କିଛିଟା ଅବଗତ ନଥିବା କହିଛନ୍ତି। ସେ କହିଛନ୍ତି, “ମୋ ପାଖରେ ଏଯାଏଁ ମାତ୍ର ଗୋଟିଏ କେସ୍ର ଖବର ଅଛି। ଯଦି ପାଇପ୍ ଲାଇନରେ କିଛି ଲିକେଜ୍ ଥାଏ, ତେବେ ଆମେ ତାହାକୁ ଆଗାମୀ ଦୁଇ ଦିନ ମଧ୍ୟରେ ସମ୍ପୂର୍ଣ୍ଣ ମରାମତି କରିବୁ।”
ଏହି ବୟାନ ପରେ ସ୍ଥାନୀୟ ବାସିନ୍ଦା ଅସନ୍ତୋଷ ପ୍ରକାଶ କରିଛନ୍ତି। ଜଣ୍ଡିସ୍ର ପ୍ରଭାବ କେବଳ ୨୭ ନମ୍ବର ୱାର୍ଡ ନୁହେଁ, ବରଂ ନିକଟସ୍ଥ ଦିଙ୍ଗାମାଟି ଅଞ୍ଚଳକୁ ମଧ୍ୟ ବ୍ୟାପିଥିବା ସ୍ଥାନୀୟ ଲୋକେ କହିଛନ୍ତି। ତୁରନ୍ତ ପାନୀୟ ଜଳର ଗୁଣବତ୍ତା ଯାଞ୍ଚ କରିବା ଏବଂ ମରାମତି କାର୍ଯ୍ୟ ଶେଷ କରିବାକୁ ସେମାନେ ଦାବି କରିଛନ୍ତି।
