ଡାର୍ବିନ: ଅଷ୍ଟ୍ରେଲିଆ ଏବଂ ବାଂଲାଦେଶ ମଧ୍ୟରେ ଡାର୍ବିନ୍ର ମାରାରା ଓଭାଲ୍ରେ ଆରମ୍ଭ ହୋଇଥିବା ପ୍ରଥମ ଟେଷ୍ଟ ମ୍ୟାଚ୍ର ପ୍ରଥମ ଦିନ ବାଂଲାଦେଶ ନାମରେ ରହିଛି । ଏହି ମ୍ୟାଚର ପ୍ରଥମ ଦିବସରେ ବାଂଲାଦେଶ ଦୃଢ଼ ସ୍ଥିତିରେ ରହିଛି । ତେବେ ଅଷ୍ଟ୍ରେଲିଆର ମିଚେଲ ଷ୍ଟାର୍କ ଏକ ବିଶ୍ୱରେକର୍ଡ ନିଜ ନାମରେ କରିଛନ୍ତି । ଷ୍ଟାର୍କଙ୍କ ରେକର୍ଡ ଅଷ୍ଟ୍ରେଲିଆ ପାଇଁ ଏହି ନିରାଶାଜନକ ଦିନରେ ଖୁସିର ଖବର ଆସିଥିଲା । ଶାଦମାନଙ୍କ ୱିକେଟ୍ ନେବା ସହ ଷ୍ଟାର୍କ ଟେଷ୍ଟ କ୍ରିକେଟରେ ୪୩୪ତମ ୱିକେଟ୍ ପୂରଣ କରିଛନ୍ତି । ଏହାସହ ସେ ଭାରତର ମହାନ ଅଧିନାୟକ କପିଳ ଦେବ (୪୩୪ ୱିକେଟ୍)ଙ୍କ ସମକକ୍ଷ ହେବା ସହ ଟେଷ୍ଟ କ୍ରିକେଟ୍ର ସବୁଠାରୁ ସଫଳ ବାମହାତୀ ବୋଲରଙ୍କ ମଧ୍ୟରେ ନିଜ ସ୍ଥାନ ଆହୁରି ମଜବୁତ କରିଛନ୍ତି । ବାଂଲାଦେଶୀ ପେସ୍ ବୋଲରଙ୍କ ଘାତକ ବୋଲିଂ ଆଗରେ ଅଷ୍ଟ୍ରେଲିଆର ପ୍ରଥମ ଇନିଂସ୍ ମାତ୍ର ୧୯୮ ରନ୍ରେ ସିମିତ ରହିଯାଇଛି । ଦିନ ଶେଷ ସୁଦ୍ଧା ବାଂଲାଦେଶ ୧ ୱିକେଟ୍ ହରାଇ ୯୬ ରନ୍ ସଂଗ୍ରହ କରି ମଜବୁତ ସ୍ଥିତିରେ ରହିଛି ।
ଅଷ୍ଟ୍ରେଲିଆ ଟସ୍ ଜିତି ପ୍ରଥମେ ବ୍ୟାଟିଂ କରିବାକୁ ନିଷ୍ପତ୍ତି ନେଇଥିଲା, ମାତ୍ର ବାଂଲାଦେଶର ତେଜ୍ ବୋଲର ହସନ ମହମୁଦଙ୍କ ବୋଲିଂ ଆଗରେ କଙ୍ଗାରୁ ବ୍ୟାଟରମାନେ ଆତ୍ମସମର୍ପଣ କରିଥିଲେ । ହସନ ମହମୁଦ ୫୫ ରନ୍ ଦେଇ ୬ଟି ଗୁରୁତ୍ୱପୂର୍ଣ୍ଣ ୱିକେଟ୍ ହାସଲ କରିଛନ୍ତି । ତାଙ୍କ ବ୍ୟତୀତ ତସ୍କିନ୍ ଅହମ୍ମଦ ଏବଂ ଇବାଦତ ହୋସେନ୍ ୨ଟି ଲେଖାଏଁ ୱିକେଟ୍ ନେଇ ଅଷ୍ଟ୍ରେଲିଆ ବ୍ୟାଟିଂ ଲାଇନ୍ଅପ୍କୁ ଧ୍ୱସ୍ତ କରିଦେଇଥିଲେ । ଅଷ୍ଟ୍ରେଲିଆ ପକ୍ଷରୁ କେବଳ ଷ୍ଟିଭ୍ ସ୍ମିଥ୍ ୭୧ ରନ୍ର ଏକ ସଂଘର୍ଷପୂର୍ଣ୍ଣ ଇନିଂସ୍ ଖେଳିଥିଲେ । ବାଂଲାଦେଶର ଦୃଢ଼ ଜବାବ ପ୍ରଥମ ଇନିଂସ୍ ବ୍ୟାଟିଂ ଆରମ୍ଭ କରି ବାଂଲାଦେଶର ଓପନର୍ମାନେ ଦଳକୁ ଭଲ ଆରମ୍ଭ ଦେଇଥିଲେ । ଦଳୀୟ ସ୍କୋର୍ ୩୬ ରନ୍ ଥିବାବେଳେ ଶାଦମାନ ଇସଲାମ (୨୦)ଙ୍କ ରୂପରେ ବାଂଲାଦେଶ ପ୍ରଥମ ୱିକେଟ୍ ହରାଇଥିଲା । ତାଙ୍କୁ ମିଚେଲ ଷ୍ଟାର୍କ ନାଥନ ଲାୟନଙ୍କ ହାତରେ କ୍ୟାଚ୍ କରାଇଥିଲେ।ଏହାପରେ ତଞ୍ଜିଦ ହସନ (୩୨) ଏବଂ ମୋମିନୁଲ ହକ୍ (୩୫) ଧୈର୍ୟ୍ୟପୂର୍ଣ୍ଣ ବ୍ୟାଟିଂ କରି ଦଳକୁ ଆଉ କୌଣସି କ୍ଷତି ହେବାକୁ ଦେଇନଥିଲେ। ଦିନ ଶେଷ ସୁଦ୍ଧା ବାଂଲାଦେଶ ଅଷ୍ଟ୍ରେଲିଆଠାରୁ ମାତ୍ର ୧୦୨ ରନ୍ ପଛରେ ରହିଛି ।