ନୂଆଦିଲ୍ଲୀ: ଅଗଷ୍ଟ ୧୫ ତାରିଖରେ ଆମ ଦେଶ ନିଜର ୮୦ତମ ସ୍ୱାଧୀନତା ଦିବସ ପାଳନ କରିବାକୁ ଯାଉଛି। ଏହି ପବିତ୍ର ତଥା ଗୌରବମୟ ଅବସରରେ ରାଜଧାନୀ ନୂଆଦିଲ୍ଲୀର ଐତିହାସିକ ଲାଲକିଲ୍ଲା ପ୍ରାଙ୍ଗଣରେ ସ୍ୱତନ୍ତ୍ର ଏବଂ ବ୍ୟାପକ ପ୍ରସ୍ତୁତି କରାଯାଇଛି। ଚଳିତ ବର୍ଷ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଲାଲକିଲ୍ଲାରେ ଜାତୀୟ ପତାକା ଉତ୍ତୋଳନ କରିବା ସହିତ ଦେଶବାସୀଙ୍କୁ ଉଦ୍ବୋଧନ ଦେବେ। ତେବେ ଚଳିତ ବର୍ଷର ଏହି ଜାତୀୟ ସମାରୋହ କେବଳ ଏକ ଉତ୍ସବରେ ସୀମିତ ନରହି, ପ୍ରଧାନମନ୍ତ୍ରୀ ମୋଦୀଙ୍କ ନାମରେ ଏକ ନୂଆ ରେକର୍ଡ ସୃଷ୍ଟି କରିବାକୁ ଯାଉଛି ।
ସୂଚନା ଅନୁଯାୟୀ, ୨୦୨୬ ଅଗଷ୍ଟ ୧୫ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଲଗାତାର ୧୩ତମ ଥର ପାଇଁ ଲାଲକିଲ୍ଲାରୁ ତ୍ରିରଙ୍ଗା ଉତ୍ତୋଳନ କରିବେ । ଉଲ୍ଲେଖଯୋଗ୍ୟ ଯେ, ଗତ ବର୍ଷ ସେ ୧୨ଥର ପାଇଁ ପତାକା ଉତ୍ତୋଳନ କରି ପୂର୍ବତନ ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧୀଙ୍କ ଲଗାତାର ୧୧ ଥରର ରେକର୍ଡକୁ ଭାଙ୍ଗି ଦେଇଥିଲେ। ଏହା ସହିତ ପ୍ରଥମ ଅଣ-କଂଗ୍ରେସ ପ୍ରଧାନମନ୍ତ୍ରୀ ଭାବେ ସର୍ବାଧିକ ଥର ଦେଶର ମୁଖ୍ୟ ସମାରୋହରେ ପତାକା ଉତ୍ତୋଳନ କରିବାର ବିରଳ ଗୌରବ ମଧ୍ୟ ସେ ହାସଲ କରିଛନ୍ତି। ଅବଶ୍ୟ, ସର୍ବାଧିକ ଥର ପତାକା ଉତ୍ତୋଳନ କରିବା ତାଲିକାରେ ଦେଶର ପ୍ରଥମ ପ୍ରଧାନମନ୍ତ୍ରୀ ପଣ୍ଡିତ ଜବାହରଲାଲ ନେହେରୁ (୧୭ ଥର) ଏବଂ ଇନ୍ଦିରା ଗାନ୍ଧୀ (ସମୁଦାୟ ୧୬ ଥର) ଯଥାକ୍ରମେ ପ୍ରଥମ ଓ ଦ୍ୱିତୀୟ ସ୍ଥାନରେ ରହିଛନ୍ତି ।
କେବଳ ପତାକା ଉତ୍ତୋଳନ ନୁହେଁ, ବରଂ ନିଜର ଭାଷଣକୁ ନେଇ ମଧ୍ୟ ପ୍ରଧାନମନ୍ତ୍ରୀ ମୋଦୀ ଆଉ ଏକ ଇତିହାସ ନିଜ ନାମରେ କରିପାରନ୍ତି । ଲାଲକିଲ୍ଲାର ପ୍ରାଚୀରରୁ ସବୁଠାରୁ ଲମ୍ବା ଭାଷଣ ଦେବାର ରେକର୍ଡ ମଧ୍ୟ ସେ କରିବାର ଯଥେଷ୍ଟ ସମ୍ଭାବନା ଅଛି। ସ୍ମରଣଯୋଗ୍ୟ ଯେ, ୨୦୨୫ ମସିହାରେ ୭୯ତମ ସ୍ୱାଧୀନତା ଦିବସ ଅବସରରେ ସେ ୧୦୩ ମିନିଟ୍ (ଅର୍ଥାତ୍ ୧ ଘଣ୍ଟା ୪୩ ମିନିଟ୍) ଧରି ଦେଶବାସୀଙ୍କୁ ସମ୍ବୋଧିତ କରିଥିଲେ, ଯାହାକି ଏକ ବିଶେଷ ରେକର୍ଡ ଥିଲା। ତେଣୁ ଆସନ୍ତାକାଲି ତାଙ୍କର ଉଦ୍ବୋଧନ ଉପରେ ସାରା ଦେଶବାସୀଙ୍କ ନଜର ରହିବ।
ଦେଶ ଚଳିତ ବର୍ଷ ନିଜ ଆଜାଦୀର ୮୦ତମ ବର୍ଷପୂର୍ତ୍ତି ପାଳନ କରୁଥିବାରୁ, ଏଥର ଲାଲକିଲ୍ଲାରେ କଡ଼ା ସୁରକ୍ଷା ବ୍ୟବସ୍ଥା ସହ ଅନେକ ନୂତନ ତଥା ଆକର୍ଷଣୀୟ କାର୍ଯ୍ୟକ୍ରମର ଆୟୋଜନ ହୋଇଛି, ଯାହା ଆସନ୍ତାକାଲିର ସମାରୋହକୁ ବେଶ୍ ସ୍ୱତନ୍ତ୍ର ଏବଂ ସ୍ମରଣୀୟ କରିବ। ଗାର୍ଡ ଅଫ୍ ଅନର ଠାରୁ ଆରମ୍ଭ କରି ପୂର୍ଣ୍ଣାଙ୍ଗ ଆୟୋଜନ ପାଇଁ ସମସ୍ତ ପ୍ରସ୍ତୁତି ଶେଷ ପର୍ଯ୍ୟାୟରେ ପହଞ୍ଚିଛି।
