ଗୁମର ଖୋଲିବ ବଲାଙ୍ଗୀର ଅପହରଣ ମାମଲା: ପୋଲିସ ହାତରେ ଲାଗିଲା ନୂଆ ସୁରାଗ, ମୁହାଁମୁହିଁ ଜେରାରେ ବାହାରିବ ସତ

ବଲାଙ୍ଗୀର: ବଲାଙ୍ଗୀର ସହରର ବହୁଚର୍ଚ୍ଚିତ ବ୍ୟବସାୟୀ ନରେନ୍ଦ୍ର ସାହୁଙ୍କ ଅପହରଣ ମାମଲାରେ ଏବେ ଏକ ନୂଆ ମୋଡ଼ ଆସିଛି। ପୋଲିସର ତଦନ୍ତ ଯେତେ ଆଗକୁ ବଢ଼ୁଛି, ଘଟଣାରେ ସେତେ ନୂଆ ନୂଆ ରହସ୍ୟ ଉନ୍ମୋଚନ ହେବାରେ ଲାଗିଛି। ସୂଚନା ଅନୁଯାୟୀ, ଉଦ୍ଧାର ହୋଇଥିବା ବ୍ୟବସାୟୀ ନରେନ୍ଦ୍ର ସାହୁ ଏବଂ ଗିରଫ ହୋଇଥିବା ଅଭିଯୁକ୍ତଙ୍କ ବୟାନରେ ଆଦୌ ତାଳମେଳ ରହୁନଥିବା ପୋଲିସ ଜାଣିବାକୁ ପାଇଛି। ଏହି ବିଭ୍ରାଟ କାରଣରୁ ପ୍ରକୃତ ସତ୍ୟ ବାହାର କରିବା ପାଇଁ ପୋଲିସ ଏବେ ଉଭୟଙ୍କୁ ସାମ୍ନାସାମ୍ନି ବସାଇ ଜେରା କରିବାକୁ ନିଷ୍ପତ୍ତି ନେଇଛି।

ଦିନକ ତଳେ ବଲାଙ୍ଗୀରରୁ ବ୍ୟବସାୟୀ ନରେନ୍ଦ୍ର ସାହୁଙ୍କୁ ଅପହରଣ କରାଯାଇଥିବା ନେଇ ତାଙ୍କ ପରିବାର ଲୋକେ ଥାନାରେ ଅଭିଯୋଗ କରିଥିଲେ । ଅଭିଯୋଗକୁ ଭିତ୍ତି କରି ପୋଲିସ ଏକ ସ୍ୱତନ୍ତ୍ର ଟିମ୍ ଗଠନ କରି ତଦନ୍ତ ଆରମ୍ଭ କରିଥିଲା ଏବଂ ପରେ ଭୁବନେଶ୍ୱରରୁ ତାଙ୍କୁ ସୁରକ୍ଷିତ ଭାବେ ଉଦ୍ଧାର କରାଯାଇଥିଲା । ଏହି ଘଟଣାରେ ସମ୍ପୃକ୍ତ ଥିବା ସନ୍ଦେହରେ କିଛି ଅଭିଯୁକ୍ତଙ୍କୁ ମଧ୍ୟ ଅଟକ ରଖି ପଚରାଉଚରା କରାଯାଇଥିଲା। ତେବେ ଜେରା ବେଳେ ବ୍ୟବସାୟୀ ନରେନ୍ଦ୍ର ସାହୁ ଅପହରଣର ଯେଉଁ କାହାଣୀ ବଖାଣିଥିଲେ ଏବଂ ଅଭିଯୁକ୍ତମାନେ ଯେଉଁ ତଥ୍ୟ ପ୍ରଦାନ କରିଛନ୍ତି, ସେଥିରେ ଆକାଶ ପାତାଳ ଫରକ ଦେଖିବାକୁ ମିଳିଛି।

କେଉଁ ପରିସ୍ଥିତିରେ ଏବଂ କାହିଁକି ଏହି ଅପହରଣ ହୋଇଥିଲା, ସେ ନେଇ ଉଭୟ ପକ୍ଷ ଭିନ୍ନ ଭିନ୍ନ କଥା କହୁଛନ୍ତି। ବ୍ୟବସାୟୀଙ୍କ ବୟାନରେ ଅନେକ ଅସଙ୍ଗତି ଥିବାରୁ ଏହା ପ୍ରକୃତରେ ଅପହରଣ ଥିଲା ନା କୌଣସି ଆର୍ଥିକ କାରବାର ଅବା ବ୍ୟବସାୟିକ ଶତ୍ରୁତାକୁ କେନ୍ଦ୍ର କରି ରଚାଯାଇଥିବା ଷଡ଼ଯନ୍ତ୍ର, ତାହାକୁ ନେଇ ପୋଲିସର ସନ୍ଦେହ ବଢ଼ିବାରେ ଲାଗିଛି। ତେଣୁ ସମସ୍ତ ଦ୍ୱନ୍ଦ୍ୱକୁ ଦୂର କରିବା ତଥା ଘଟଣାର ମୂଳ କାରଣ ଖୋଜି ବାହାର କରିବାକୁ ତଦନ୍ତକାରୀ ଅଧିକାରୀମାନେ ନରେନ୍ଦ୍ର ସାହୁ ଏବଂ ଅଭିଯୁକ୍ତମାନଙ୍କୁ ମୁହାଁମୁହିଁ ଜେରା କରିବେ ବୋଲି ସୂଚନା ମିଳିଛି।

ଦିନ ଦ୍ୱିପ୍ରହରରେ ଜଣେ ପ୍ରତିଷ୍ଠିତ ବ୍ୟବସାୟୀଙ୍କ ଅପହରଣ ଘଟଣା ସମଗ୍ର ବଲାଙ୍ଗୀର ଜିଲ୍ଲାର ଆଇନ ଶୃଙ୍ଖଳା ସ୍ଥିତି ଉପରେ ପ୍ରଶ୍ନବାଚୀ ସୃଷ୍ଟି କରିଥିଲା। ବ୍ୟବସାୟୀ ସଂଘ ପକ୍ଷରୁ ମଧ୍ୟ ପୋଲିସ ଉପରେ ତୁରନ୍ତ କାର୍ଯ୍ୟାନୁଷ୍ଠାନ ପାଇଁ ଲଗାତାର ଚାପ ପକାଯାଇଥିଲା। ପୋଲିସ ଅଧିକାରୀଙ୍କ ସୂତ୍ରରୁ ଜଣାପଡ଼ିଛି ଯେ, ସାମ୍ନାସାମ୍ନି ଜେରା ସମୟରେ ମୋବାଇଲ୍ କଲ୍ ରେକର୍ଡିଂ, ସିସିଟିଭି ଫୁଟେଜ୍ ଏବଂ ଅନ୍ୟାନ୍ୟ ବୈଷୟିକ ପ୍ରମାଣଗୁଡ଼ିକୁ ମଧ୍ୟ ଭିତ୍ତି କରି ପ୍ରଶ୍ନ କରାଯିବ । ବର୍ତ୍ତମାନ ସମସ୍ତଙ୍କ ନଜର ପୋଲିସର ଏହି ତଦନ୍ତ ଉପରେ ରହିଛି ଏବଂ ଏହି ସାମ୍ନାସାମ୍ନି ଜେରା ପରେ ଅପହରଣ ପଛର ପ୍ରକୃତ ସତ୍ୟ ପଦାକୁ ଆସିବ ବୋଲି ସାଧାରଣରେ ଆଶା କରାଯାଉଛି।