ରାଜଧାନୀ ଉପକଣ୍ଠରେ ୪୦୦ରୁ ଅଧିକ ରେଡ୍ ଜୋନ୍ ଶିଳ୍ପ, ପାଲଟିବ କି ଦିଲ୍ଲୀ?

ଭୁବନେଶ୍ୱର: ରାଜଧାନୀ ଉପକଣ୍ଠରେ ଦ୍ରୁତ ଶିଳ୍ପାୟନ ମଧ୍ୟରେ ବଢ଼ୁଛି ପ୍ରଦୂଷଣର ଆଶଙ୍କା। ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡର ରିପୋର୍ଟ ଅନୁଯାୟୀ ଖୋର୍ଦ୍ଧା ଜିଲ୍ଲାରେ ଏବେ ୨୫ଶହରୁ ଅଧିକ ଶିଳ୍ପ ସଂସ୍ଥା ରହିଛି। ଏଥିମଧ୍ୟରୁ ୪୬୨ଟି ରେଡ୍ ଜୋନ୍‌ରେ ଥିବାବେଳେ ୧୧୪୫ଟି ଅରେଞ୍ଜ ଜୋନ୍, ୩୬୩ଟି ଗ୍ରୀନ୍ ଜୋନ୍ ଏବଂ ୫୦୦ରୁ ଅଧିକ ଶିଳ୍ପ ହ୍ୱାଇଟ୍ ଜୋନ୍‌ରେ ରହିଛି। ରାଜଧାନୀ ଉପକଣ୍ଠରେ ରେଡ୍ ଜୋନ୍‌ର ୪୦୦ରୁ ଅଧିକ ଶିଳ୍ପ ରହିଥିବାରୁ ପରିବେଶକୁ ନେଇ ଚିନ୍ତା ବଢ଼ିଛି।

ସବୁଠୁ ଅଧିକ ଶିଳ୍ପ ସଂସ୍ଥା ମଞ୍ଚେଶ୍ୱର ଅଞ୍ଚଳରେ ରହିଛି। ଏଠାରେ ୯୦୦ରୁ ଅଧିକ ଶିଳ୍ପ ସଂସ୍ଥା କାର୍ଯ୍ୟରତ ଥିବା ଜଣାପଡ଼ିଛି। ଜନବସତି ନିକଟରେ ଏତେ ସଂଖ୍ୟକ ଶିଳ୍ପ ରହିଥିବାରୁ ପ୍ରଦୂଷଣ ନିୟନ୍ତ୍ରଣ ଓ ପରିବେଶ ନିୟମ ପାଳନ ଏବେ ଗୁରୁତ୍ୱପୂର୍ଣ୍ଣ ପ୍ରସଙ୍ଗ ହୋଇଛି।

ଅନ୍ୟପକ୍ଷରେ, ଶିଳ୍ପଗୁଡ଼ିକର ‘କନସେଣ୍ଟ ଟୁ ଅପରେଟ୍’ ବା ସିଟିଓ ଏକ ଗୁରୁତ୍ୱପୂର୍ଣ୍ଣ ଅନୁମତି। ଶିଳ୍ପ ଚଳାଇବା ସମୟରେ ପରିବେଶ ନିୟମ ପାଳନ ସୁନିଶ୍ଚିତ କରିବା ଏହାର ମୁଖ୍ୟ ଉଦ୍ଦେଶ୍ୟ। ଏହି ଅନୁମତିକୁ ନେଇ ମଧ୍ୟ କର୍ତ୍ତୃପକ୍ଷଙ୍କ ପକ୍ଷରୁ କଡ଼ା ନଜର ରଖାଯାଇଛି। ଖୋର୍ଦ୍ଧା ଜିଲ୍ଲାର ୧୭୮୮ଟି ଶିଳ୍ପ ସଂସ୍ଥାକୁ ସିଟିଓ ସମ୍ବନ୍ଧୀୟ କାରଣ ଦର୍ଶାଅ ନୋଟିସ୍ ଦିଆଯାଇଛି। ଗୁରୁତ୍ୱପୂର୍ଣ୍ଣ କଥା ହେଉଛି, ଗତ ୧ ବର୍ଷ ମଧ୍ୟରେ ଏହି ସମସ୍ତ ଶିଳ୍ପ ସଂସ୍ଥାକୁ ପର୍ଯ୍ୟାୟକ୍ରମେ ନୋଟିସ୍ କରାଯାଇଛି। ଏହାର କିଛି ଦିନ ମଧ୍ୟରେ ଅନେକ ଶିଳ୍ପ ସଂସ୍ଥା ସଚେତନ ହୋଇ ଆବଶ୍ୟକ ପ୍ରକ୍ରିୟା ପୂରଣ କରିଥିବା ଜଣାପଡ଼ିଛି।

ଶିଳ୍ପ ସଂସ୍ଥା ଚଳାଇବା ପୂର୍ବରୁ ଓ ଚଳାଇବା ସମୟରେ ପରିବେଶ ସମ୍ବନ୍ଧୀୟ ନିୟମ ପାଳନ କରିବା ଜରୁରୀ। ସିଟିଓ ଅନୁମତି ମାଧ୍ୟମରେ ଶିଳ୍ପର ପରିବେଶଗତ ଦାୟିତ୍ୱ ଓ ନିୟମ ପାଳନ ଉପରେ ନଜର ରଖାଯାଏ। ତେଣୁ ସିଟିଓ ନଥାଇ କିମ୍ବା ନିୟମ ଅନୁସରଣ ନକରି ଶିଳ୍ପ ଚାଲିଲେ ଏହା ପରିବେଶ ପାଇଁ ବିପଦ ସୃଷ୍ଟି କରିପାରେ।

ଖୋର୍ଦ୍ଧାରେ ଶିଳ୍ପ ସଂଖ୍ୟା ବଢ଼ିବା ସହିତ ରେଡ୍ ଓ ଅରେଞ୍ଜ ଜୋନ୍ ଶିଳ୍ପର ସଂଖ୍ୟା ମଧ୍ୟ ଉଲ୍ଲେଖନୀୟ। ଏଭଳି ସ୍ଥିତିରେ ଶିଳ୍ପାୟନ ସହ ପରିବେଶ ସୁରକ୍ଷାର ସନ୍ତୁଳନ ରକ୍ଷା କରିବା ଏକ ବଡ଼ ଚ୍ୟାଲେଞ୍ଜ। ବିଶେଷକରି ରେଡ୍ ଜୋନ୍ ଶିଳ୍ପଗୁଡ଼ିକର ନିୟମିତ ଯାଞ୍ଚ, ସିଟିଓ ଅନୁମତି ଓ ପ୍ରଦୂଷଣ ନିୟନ୍ତ୍ରଣ ବ୍ୟବସ୍ଥା ଠିକ୍ ଅଛି କି ନାହିଁ, ତାହା ଉପରେ କଡ଼ା ନଜର ଆବଶ୍ୟକ।

ଦିଲ୍ଲୀର ବାୟୁ ପ୍ରଦୂଷଣ ଆଜି ଦେଶ ପାଇଁ ଏକ ବଡ଼ ଚିନ୍ତାର ବିଷୟ। ଯାନବାହନର ଧୂଆଁ, ଶିଳ୍ପ ନିର୍ଗମନ, ନିର୍ମାଣ କାର୍ଯ୍ୟର ଧୂଳିକଣା ସହ ବିଭିନ୍ନ କାରଣ ଦିଲ୍ଲୀର ବାୟୁ ଗୁଣବତ୍ତାକୁ ପ୍ରଭାବିତ କରୁଛି। ବିଶେଷକରି ଶୀତଦିନରେ ପ୍ରଦୂଷକ ଉପାଦାନ ବାୟୁମଣ୍ଡଳରେ ଅଟକି ରହିବାରୁ ସ୍ଥିତି ଆହୁରି ଗମ୍ଭୀର ହୋଇଥାଏ।

ଦିଲ୍ଲୀର ଏହି ଅଭିଜ୍ଞତା ଭୁବନେଶ୍ୱର ପାଇଁ ଏକ ସତର୍କ ସଙ୍କେତ। ଏବେ ରାଜଧାନୀ ଉପକଣ୍ଠରେ ଶିଳ୍ପାୟନ ବଢ଼ୁଛି। ଖୋର୍ଦ୍ଧାରେ ୨୫ଶହରୁ ଅଧିକ ଶିଳ୍ପ, ୪୬୨ଟି ରେଡ୍ ଜୋନ୍ ଶିଳ୍ପ ଏବଂ ମଞ୍ଚେଶ୍ୱରରେ ୯୦୦ରୁ ଅଧିକ ଶିଳ୍ପ ରହିଥିବା ବେଳେ ଏବେଠାରୁ କଡ଼ା ନିରୀକ୍ଷଣ ଜରୁରୀ।

ଭୁବନେଶ୍ୱରକୁ ସବୁଜ ସହର ଭାବେ ରଖିବାକୁ ହେଲେ ଶିଳ୍ପ ବିକାଶ ସହ ପରିବେଶ ସୁରକ୍ଷାକୁ ସମାନ ଗୁରୁତ୍ୱ ଦେବାକୁ ପଡ଼ିବ। ଦିଲ୍ଲୀ ଭଳି ପରିସ୍ଥିତି ସୃଷ୍ଟି ହେବା ପରେ ପଦକ୍ଷେପ ନେବା ଅପେକ୍ଷା, ଏବେଠାରୁ ପ୍ରଦୂଷଣ ନିୟନ୍ତ୍ରଣ ଓ ନିୟମ ପାଳନକୁ କଡ଼ା କରିବା ଆବଶ୍ୟକ।

୨୫ଶହରୁ ଅଧିକ ଶିଳ୍ପ, ୪୬୨ ରେଡ୍ ଜୋନ୍ ଶିଳ୍ପ ଏବଂ ସିଟିଓ ସମ୍ବନ୍ଧୀୟ ୧୭୮୮ଟି ନୋଟିସ୍‌କୁ ନେଇ ଏବେ ଖୋର୍ଦ୍ଧାର ଶିଳ୍ପାଞ୍ଚଳ ଉପରେ ସମସ୍ତଙ୍କ ନଜର। ଶିଳ୍ପ ବଢ଼ିବ, ବିକାଶ ହେବ କିନ୍ତୁ ବିକାଶର ମୂଲ୍ୟ ଯେପରି ପରିବେଶକୁ ଦେବାକୁ ନପଡ଼େ, ସେଥିପାଇଁ ଏବେଠାରୁ ସତର୍କ ହେବାର ସମୟ ବୋଲି ପ୍ରଦୂଷଣ ବୋର୍ଡର ଅଧିକାରୀ ପ୍ରକାଶ କରିଛନ୍ତି।