Snake Bites Man: ସାପ କାମୁଡ଼ି ଦେଲା ବୋଲି କିଛି ଏପରି କରି ଡାକ୍ତରଖାନା ଧାଇଁଲେ ଯୁବକ, ଡାକ୍ତର ବି ଦେଖି ତାଟକା…
ଭଦ୍ରକ: ଓଡ଼ିଶାର ଭଦ୍ରକ ଜିଲ୍ଲାରୁ ସାପ କାମୁଡ଼ାକୁ ନେଇ ଏକ ଅଜବ ଘଟଣା ସାମ୍ନାକୁ ଆସିଛି। ସାପ କାମୁଡ଼ିବା ପରେ ସାଧାରଣତଃ ଲୋକେ ଭୟଭୀତ ହୋଇ ତୁରନ୍ତ ଚିକିତ୍ସା ପାଇଁ ହସ୍ପିଟାଲ ଯାଆନ୍ତି। କିନ୍ତୁ ଭଦ୍ରକର ଜଣେ ଯୁବକ ଯେଉଁଭଳି ଭାବେ ହସ୍ପିଟାଲରେ ପହଞ୍ଚିଲେ, ତାହା ଦେଖି ସେଠାରେ ଉପସ୍ଥିତ ଲୋକେ ଆଶ୍ଚର୍ଯ୍ୟ ହୋଇ ଯାଇଥିଲେ। ନିଜେ ଡାକ୍ତର ବି ସ୍ତବ୍ଧ ହୋଇଯାଇଥିଲେ ।
ଏହି ଘଟଣା ଭଦ୍ରକ ଜିଲ୍ଲା ବାସୁଦେବପୁର ବ୍ଲକ୍ ଅନ୍ତର୍ଗତ ବାଲିମେଡ ଅଞ୍ଚଳର ଜେନାସାହିର ବୋଲି ଜଣାପଡ଼ିଛି। ଯୁବକଙ୍କ ନାମ ବିଜୟ ଜେନା ବୋଲି ସୂଚନା ମିଳିଛି। ସୂଚନା ଅନୁସାରେ, ବିଜୟ ସନ୍ଧ୍ୟା ସମୟରେ ନିଜ ସାଙ୍ଗମାନଙ୍କ ସହ ବାହାରେ ବୁଲୁଥିଲେ। ଏହି ସମୟରେ ତାଙ୍କୁ ଏକ ବିଷଧର ସାପ କାମୁଡ଼ିଥିଲା। ତେବେ ଘଟଣା ପରେ ବିଜୟ ଚିକିତ୍ସା ପାଇଁ ଯିବା ସହ କାମୁଡ଼ିଥିବା ସାପଟିକୁ ଏକ ପ୍ଲାଷ୍ଟିକ୍ ଡବାରେ ରଖି ସାଙ୍ଗରେ ନେଇ ଯାଇଥିଲେ। ନିକଟସ୍ଥ କମ୍ୟୁନିଟି ହେଲ୍ଥ ସେଣ୍ଟରରେ ସେ ପହଞ୍ଚିବା ପରେ ଡବା ଭିତରେ ସାପ ଥିବା ଦେଖି ହସ୍ପିଟାଲରେ ଉପସ୍ଥିତ ଲୋକେ ଚକିତ ହୋଇଯାଇଥିଲେ। ଯୁବକଙ୍କ ଚିକିତ୍ସା ସହ ଘଟଣାର କାରଣ ଜାଣିବାରେ ଏହା ଡାକ୍ତରଙ୍କ ପାଇଁ ମଧ୍ୟ ଅସ୍ୱାଭାବିକ ଦୃଶ୍ୟ ଥିଲା।
ପ୍ରାଥମିକ ଚିକିତ୍ସା ପରେ ବିଜୟଙ୍କୁ ଅଧିକ ଚିକିତ୍ସା ପାଇଁ ଭଦ୍ରକ ଜିଲ୍ଲା ମୁଖ୍ୟ ଚିକିତ୍ସାଳୟକୁ ରେଫର୍ କରାଯାଇଥିଲା। ରିପୋର୍ଟ ଅନୁସାରେ ତାଙ୍କ ଅବସ୍ଥା ସ୍ଥିର ଥିବା ଜଣାପଡ଼ିଛି।
ତେବେ ସାପ କାମୁଡ଼ିଲେ ତାକୁ ଧରିବାକୁ ଚେଷ୍ଟା କରିବା ବିପଜ୍ଜନକ। ସାପକୁ ଧରିବା ପରିବର୍ତ୍ତେ ତୁରନ୍ତ ନିରାପଦ ସ୍ଥାନକୁ ଯାଇ ଚିକିତ୍ସା ନେବା ହିଁ ସବୁଠାରୁ ଜରୁରୀ। ଏହି ଘଟଣାରେ ବିଜୟଙ୍କ ହସ୍ପିଟାଲ ପହଞ୍ଚିବାର ଶୈଳୀ ଯେତେ ଚର୍ଚ୍ଚାରେ ରହିଛି, ସାପ କାମୁଡ଼ା ପରେ ତୁରନ୍ତ ଚିକିତ୍ସା ନେବାର ବାର୍ତ୍ତା ମଧ୍ୟ ସେତିକି ଗୁରୁତ୍ୱପୂର୍ଣ୍ଣ।