US Attack: ଚାଲିଥିଲା ବିବାହ ଉତ୍ସବ, ହଠାତ୍ ବର୍ଷିଲା ଭୟଙ୍କର ଆକ୍ରମଣ; ଆମେରିକୀୟ ଅସ୍ତ୍ରର ସିଧା ଆଘାତରେ ୪ ମୃତ, ୬୮ ଆହତ!
ନୂଆଦିଲ୍ଲୀ: ଇରାନର ଦକ୍ଷିଣ ଭାଗରେ ଏକ ବିବାହ ଉତ୍ସବ ଚାଲିଥିବା ସମୟରେ ହୋଇଥିବା ଭୟଙ୍କର ବିସ୍ଫୋରଣକୁ ନେଇ ଚାଞ୍ଚଲ୍ୟକର ତଥ୍ୟ ସାମ୍ନାକୁ ଆସିଛି। ରଏଟର୍ସ ପକ୍ଷରୁ ଯାଞ୍ଚ କରାଯାଇଥିବା ଫଟୋ ଓ ଭିଡିଓର ବିଶ୍ଳେଷଣ କରି ଅସ୍ତ୍ର ବିଶେଷଜ୍ଞମାନେ କହିଛନ୍ତି ଯେ, ଇରାନର କୁହେସ୍ତାକ ସହରରେ ଥିବା ଏକ ବିବାହ ଘର ଉପରେ ଆମେରିକାର ଏକ ଅସ୍ତ୍ର ସିଧାସଳଖ ଆଘାତ କରିଥିବାର ସମ୍ଭାବନା ଅଧିକ। ଏହା କୌଣସି ଅନ୍ୟ ଲକ୍ଷ୍ୟରୁ ରିକୋଶେଟ୍ ହୋଇ ଆସିଥିବା ଆଘାତ ନୁହେଁ ବୋଲି ବିଶେଷଜ୍ଞମାନେ କହିଛନ୍ତି।
ମଙ୍ଗଳବାର ରାତିରେ ଘଟିଥିବା ଏହି ଆକ୍ରମଣରେ ୪ ଜଣଙ୍କ ମୃତ୍ୟୁ ଓ ଅତି କମରେ ୬୮ ଜଣ ଆହତ ହୋଇଛନ୍ତି। ମୃତକଙ୍କ ମଧ୍ୟରେ ବିବାହ ଉତ୍ସବର ତିନିଜଣ ଅତିଥି ଏବଂ ଆଉ ଜଣେ ମାତ୍ର ୪ ବର୍ଷର ଶିଶୁ ରହିଛନ୍ତି ।
ସେପ୍ଟେମ୍ବର ୧ରେ ଆମେରିକାର ସେଣ୍ଟ୍ରାଲ୍ କମାଣ୍ଡ ଇରାନର ଦକ୍ଷିଣାଞ୍ଚଳରେ ଆଇଆରଜିସିର ବାୟୁ ପ୍ରତିରକ୍ଷା ବ୍ୟବସ୍ଥା, ରାଡାର ଏବଂ ଯୋଗାଯୋଗ କେନ୍ଦ୍ରକୁ ଲକ୍ଷ୍ୟ କରି ଅନେକ ଆକ୍ରମଣ କରିଥିଲା। କୁହେସ୍ତାକର ଯେଉଁ ଯୋଗାଯୋଗ ଟାୱାରକୁ ଲକ୍ଷ୍ୟ କରାଯାଇଥିଲା, ତାହା ବିବାହ ଘରଠାରୁ ପ୍ରାୟ ୧୩୫ ମିଟର ଦୂରରେ ଥିଲା।
ଅବସରପ୍ରାପ୍ତ ବ୍ରିଟିଶ୍ ସେନା ଅଧିକାରୀ ଗାରେଥ୍ କଲେଟ୍ଙ୍କ ସମେତ ଅନେକ ଅସ୍ତ୍ର ବିଶେଷଜ୍ଞ ଘରର ଛାତ ଉପରେ ହୋଇଥିବା କ୍ଷତିକୁ ଦେଖି ଏହା ସିଧାସଳଖ ଆଘାତର ଫଳ ବୋଲି ମତ ଦେଇଛନ୍ତି। ଟ୍ରେଭର ବଲ୍ ନାମକ ଜଣେ ପୂର୍ବତନ ଆମେରିକୀୟ ବୋମା ନିଷ୍କ୍ରିୟକରଣ ବିଶେଷଜ୍ଞ ମଧ୍ୟ କହିଛନ୍ତି ଯେ, ଏହା ଛାତ ଉପରେ କିମ୍ବା ଛାତର ଠିକ୍ ଉପରେ ବିସ୍ଫୋରଣ ହୋଇଥିବା ଏକ ଅସ୍ତ୍ରର କ୍ଷତି ପରି ଦେଖାଯାଉଛି। କିଛି ଅବଶେଷକୁ ସେ ଆମେରିକାର JSOW ଗ୍ଲାଇଡ୍ ବମ୍ ସହ ସମ୍ପର୍କିତ ବୋଲି ଚିହ୍ନଟ କରିଥିଲେ, ଯଦିଓ ସେଗୁଡ଼ିକ ଏହି ଆକ୍ରମଣରୁ ଆସିଥିବା କଥା ରଏଟର୍ସ ସ୍ୱାଧୀନ ଭାବେ ନିଶ୍ଚିତ କରିପାରିନାହିଁ।
ଆମେରିକାର ଉପରାଷ୍ଟ୍ରପତି ଜେଡି ଭାନ୍ସ କହିଛନ୍ତି ଯେ ଘଟଣାର ତଦନ୍ତ କରାଯାଉଛି। ଆମେରିକୀୟ ସେନା ମଧ୍ୟ ଘଟଣା ସମ୍ପର୍କିତ ରିପୋର୍ଟ ବିଷୟରେ ଅବଗତ ଥିବା ଏବଂ ତଦନ୍ତ କରୁଥିବା କହିଛି।
ଏହି ଘଟଣା ଇରାନରେ ଚାଲିଥିବା ଯୁଦ୍ଧରେ ସାଧାରଣ ଲୋକଙ୍କ ଜୀବନ ଉପରେ ପଡ଼ୁଥିବା ପ୍ରଭାବକୁ ପୁଣିଥରେ ସାମ୍ନାକୁ ଆଣିଛି। ଗୁରୁବାର କୁହେସ୍ତାକରେ ମୃତକଙ୍କ ଅନ୍ତିମ ସଂସ୍କାର ସମୟରେ ବହୁ ସଂଖ୍ୟାରେ ଲୋକ ଯୋଗ ଦେଇଥିଲେ। ସମଗ୍ର ଅଞ୍ଚଳରେ ଶୋକ ଓ ଭୟର ପରିବେଶ ରହିଥିବା ସ୍ଥାନୀୟ ଲୋକେ କହିଛନ୍ତି।