ଟିଏମସି ପାଇଁ ତିଆରି ହୋଇଥିଲା ଦେଢ଼ ଲକ୍ଷ ପତାକା, ଏବେ ଚିହ୍ନ ରଦ୍ଦ ଆଶଙ୍କାରେ ଚିନ୍ତାରେ କ୍ଷୁଦ୍ର ବ୍ୟବସାୟୀ

କୋଲକାତା: ତୃଣମୂଳ କଂଗ୍ରେସ (ଟିଏମସି) ର ଦଳୀୟ ଚିହ୍ନ ‘ଘାସ-ଫୁଲ’କୁ ନେଇ ନିର୍ବାଚନ କମିଶନଙ୍କ ସମ୍ଭାବ୍ୟ କଟକଣା ବା ଫ୍ରିଜ୍ ହେବା ପରେ କେବଳ ରାଜନୈତିକ ମହଲରେ ନୁହେଁ, ବରଂ ସାଧାରଣ ବ୍ୟବସାୟୀଙ୍କ ପାଇଁ ମଧ୍ୟ ଏକ ବଡ଼ ଚିନ୍ତାର କାରଣ ପାଲଟିଛି । ଏହି ରାଜନୈତିକ ଅସ୍ଥିରତାର ସିଧାସଳଖ ପ୍ରଭାବ ପଶ୍ଚିମବଙ୍ଗ ହାୱଡ଼ା ଅଞ୍ଚଳର ଜଣେ ପତାକା ନିର୍ମାତାଙ୍କ ଉପରେ ପଡ଼ିଛି। ନିର୍ବାଚନ ସମୟରେ ବିପୁଳ ଲାଭର ଆଶା ରଖି ଉକ୍ତ ବ୍ୟବସାୟୀ ଜଣକ ଆଗୁଆ ପ୍ରାୟ ୧.୫ ଲକ୍ଷ ଟିଏମସି ପତାକା ପ୍ରସ୍ତୁତ କରି ରଖିଥିଲେ । କିନ୍ତୁ ଏବେ ଦଳୀୟ ଚିହ୍ନ ରଦ୍ଦ ହେବାର ଖବର ତାଙ୍କ ମୁଣ୍ଡରେ ଚଡ଼କ ପକାଇଛି ।

ସାଧାରଣତଃ ନିର୍ବାଚନ ଆସିଲେ ପଶ୍ଚିମବଙ୍ଗରେ ରାଜନୈତିକ ଦଳର ପତାକା, ବ୍ୟାନର, ଟୋପି ଏବଂ ପୋଷ୍ଟରର ଚାହିଦା ବହୁଗୁଣିତ ହୋଇଯାଏ । ଏହାକୁ ଦୃଷ୍ଟିରେ ରଖି ହାୱଡ଼ାର ଉକ୍ତ ପତାକା ବ୍ୟବସାୟୀ ନିଜର ସମସ୍ତ ପୁଞ୍ଜି ଖଟାଇ ଟିଏମସିର ‘ଘାସ-ଫୁଲ’ ଚିହ୍ନ ଥିବା ଦେଢ଼ ଲକ୍ଷ ପତାକା ନିର୍ମାଣ କରି ଗୋଦାମରେ ମହଜୁଦ ରଖିଥିଲେ । ଏଥିପାଇଁ କପଡ଼ା କିଣିବା, ରଙ୍ଗ ଦେବା, ଛପା କାମ ଏବଂ ଶ୍ରମିକମାନଙ୍କ ମଜୁରୀ ବାବଦରେ ତାଙ୍କର ଲକ୍ଷାଧିକ ଟଙ୍କା ବିନିଯୋଗ ହୋଇଛି । ମାତ୍ର ବର୍ତ୍ତମାନ ଟିଏମସିର ଏହି ପ୍ରସିଦ୍ଧ ଦଳୀୟ ଚିହ୍ନ ଉପରେ ନିର୍ବାଚନ କମିଶନଙ୍କ ତରଫରୁ ପ୍ରତିବନ୍ଧକ ଲାଗିବା ନେଇ ଆଶଙ୍କା ସୃଷ୍ଟି ହୋଇଥିବାରୁ ଏତେ ବଡ଼ ସଂଖ୍ୟକ ପତାକା ଏବେ ସମ୍ପୂର୍ଣ୍ଣ ଅଦରକାରୀ ହୋଇପଡ଼ିବାର ଭୟ ଦେଖାଦେଇଛି ।

ରାଜନୈତିକ ଦଳଗୁଡ଼ିକ ମଧ୍ୟରେ ଚାଲିଥିବା ଆଭ୍ୟନ୍ତରୀଣ ବିବାଦ କିମ୍ବା ନିର୍ବାଚନ କମିଶନଙ୍କ କଡ଼ା ନିୟମାବଳୀ ଯୋଗୁଁ ଯଦି ଟିଏମସିକୁ ଏହି ଚିହ୍ନ ବ୍ୟବହାର କରିବାରୁ ବଞ୍ଚିତ କରାଯାଏ, ତେବେ ବଜାରରେ ଏହି ପୁରୁଣା ପତାକାର କୌଣସି ଚାହିଦା ରହିବ ନାହିଁ ।

ବ୍ୟବସାୟୀଙ୍କ କହିବା ଅନୁଯାୟୀ, ଯଦି ନିର୍ବାଚନରେ ଲଢ଼ିବା ପାଇଁ ଦଳକୁ ଏକ ନୂଆ ଚିହ୍ନ ଦିଆଯାଏ, ତେବେ ଦଳୀୟ କର୍ମୀମାନେ ନୂଆ ଚିହ୍ନ ଥିବା ପତାକା ଖୋଜିବେ। ଫଳରେ ପୂର୍ବରୁ ତିଆରି ହୋଇଥିବା ପୁରୁଣା ପତାକାଗୁଡ଼ିକୁ କେହି କିଣିବେ ନାହିଁ ଏବଂ ତାହା କେବଳ କପଡ଼ା ଖଣ୍ଡରେ ପରିଣତ ହେବ। ଏପରି ସ୍ଥିତିରେ ବ୍ୟାଙ୍କରୁ ଆଣିଥିବା ଋଣ ଏବଂ ନିଜର ସଞ୍ଚିତ ଅର୍ଥ ବୁଡ଼ିଯିବା ଆଶଙ୍କାରେ ବ୍ୟବସାୟୀ ନୈରାଶ୍ୟ ଭିତରେ ଦିନ କାଟୁଛନ୍ତି ।