ମୁମ୍ବାଇ: ଆଇପିଏଲ୍ ଫ୍ରାଞ୍ଚାଇଜ୍ ମୁମ୍ବାଇ ଇଣ୍ଡିଆନ୍ସ ପକ୍ଷରୁ ଏକ ବଡ଼ ଖବର ସାମ୍ନାକୁ ଆସିଛି। ଦଳର କୋଚିଂ କ୍ୟାମ୍ପରୁ ଦୁଇ ଜଣ ପ୍ରମୁଖ ଲସିଥ ମାଲିଙ୍ଗା ଏବଂ ପାରସ ମାମ୍ବ୍ରେ ବିଦା ହୋଇଛନ୍ତି। ମୁମ୍ବାଇ ଇଣ୍ଡିଆନ୍ସ ସେମାନଙ୍କ ସହିତ ସମ୍ପର୍କ ଛିନ୍ନ କରିଥିବା ନେଇ ସ୍ପଷ୍ଟ କରିଛି।
ଶ୍ରୀଲଙ୍କାର କିମ୍ବଦନ୍ତୀ ଦ୍ରୁତ ବୋଲର ଲସିଥ ମାଲିଙ୍ଗା ଏବଂ ଭାରତର ପୂର୍ବତନ ବୋଲିଂ କୋଚ୍ ପାରସ ମାମ୍ବ୍ରେ ଦଳର ବୋଲିଂ ବିଭାଗକୁ ମଜବୁତ କରିବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲେ। ମାତ୍ର ଆଗାମୀ ସିଜିନ୍ ପାଇଁ ଫ୍ରାଞ୍ଚାଇଜ୍ ନିଜର ସପୋର୍ଟ ଷ୍ଟାଫ୍ କିମ୍ବା କୋଚିଂ ସେଟଅପ୍ରେ ବଡ଼ଧରଣର ପରିବର୍ତ୍ତନ ଆଣୁଥିବାରୁ ଏଭଳି ନିଷ୍ପତ୍ତି ନିଆଯାଇଛି।
ଏହି ଦୁଇ ଦକ୍ଷ ପ୍ରଶିକ୍ଷକଙ୍କ ପ୍ରସ୍ଥାନ ପରେ ମୁମ୍ବାଇ ଇଣ୍ଡିଆନ୍ସର ଆଗାମୀ ରଣନୀତି କିପରି ରହିବ ଏବଂ ସେମାନଙ୍କ ସ୍ଥାନରେ କାହାକୁ ଦାୟିତ୍ୱ ମିଳିବ, ତାହା ବର୍ତ୍ତମାନ କ୍ରିକେଟ୍ ପ୍ରଶଂସକଙ୍କ ମଧ୍ୟରେ ଚର୍ଚ୍ଚାର ବିଷୟ ପାଲଟିଛି। ଫ୍ରାଞ୍ଚାଇଜ୍ ପକ୍ଷରୁ କୋଚିଂ ଷ୍ଟାଫ୍ରେ ଆଉ କେତେକ ଅଦଳବଦଳ ମଧ୍ୟ କରାଯାଇଛି।
ଆଇପିଏଲ୍ ଇତିହାସରେ ମୁମ୍ବାଇ ଇଣ୍ଡିଆନ୍ସ ଏକ ସବୁଠାରୁ ସଫଳ ତଥା ଶକ୍ତିଶାଳୀ ଦଳ ଭାବେ ପରିଚିତ। ହେଲେ ଗତ କିଛି ସିଜିନ୍ ହେବ ଦଳର ପ୍ରଦର୍ଶନ ଆଶାନୁରୂପକ ହୋଇପାରିନାହିଁ, ଯାହାକି ଫ୍ରାଞ୍ଚାଇଜ୍ ମାଲିକ ଓ ମ୍ୟାନେଜମେଣ୍ଟକୁ ଚିନ୍ତାରେ ପକାଇଥିଲା। ଏହି କାରଣରୁ ଦଳର ପ୍ରଦର୍ଶନରେ ସୁଧାର ଆଣିବା ଏବଂ ରଣନୀତିକୁ ଅଧିକ ଶାଣିତ କରିବା ଉଦ୍ଦେଶ୍ୟରେ ମ୍ୟାନେଜମେଣ୍ଟ ଏହି କଠିନ ନିଷ୍ପତ୍ତି ନେଇଛି।
ଲସିଥ ମାଲିଙ୍ଗାଙ୍କ ଅଭିଜ୍ଞତା ଯୁବ ବୋଲରମାନଙ୍କ ପାଇଁ ଅତ୍ୟନ୍ତ ଫଳପ୍ରଦ ହୋଇଥିଲା। ସେହିପରି ପାରସ ମାମ୍ବ୍ରେ ମଧ୍ୟ ଭାରତୀୟ କ୍ରିକେଟ୍ ଓ ଆଇପିଏଲ୍ରେ ନିଜର ଦକ୍ଷତା ପ୍ରମାଣିତ କରିସାରିଛନ୍ତି। ତେଣୁ ଏହି ଦୁଇ ଦକ୍ଷ ବ୍ୟକ୍ତିଙ୍କ ବିଦାୟ ପରେ ଦଳର ବୋଲିଂ ଆକ୍ରମଣ ଓ ପ୍ରଶିକ୍ଷଣ ବିଭାଗକୁ ପରିଚାଳନା କରିବା ପାଇଁ ମୁମ୍ବାଇ ଇଣ୍ଡିଆନ୍ସ କାହାକୁ ଦାୟିତ୍ୱ ଦେବ, ତାହା ଉପରେ ଏବେ ସମସ୍ତଙ୍କ ନଜର ରହିଛି।