ଅନିୟନ୍ତ୍ରିତ ଭାବେ ଫେରିଆସୁଛି ନାସା ଟେଲିସ୍କୋପ: ଭାରତରେ ହେବ ମାଡ଼, କଟକ ଯାଏଁ ସମ୍ଭାବ୍ୟ ଜୋନ
ମୁମ୍ବାଇ: ନାସା (NASA) ର ‘ନିଲ୍ ଗେହ୍ରେଲ୍ସ ସ୍ୱିଫ୍ଟ ଅବଜରଭେଟୋରୀ’ (Neil Gehrels Swift Observatory) ନାମକ ଏକ ୧.୫ ଟନ୍ (୧୪୫୦ କିଲୋଗ୍ରାମ) ଓଜନର ପୁରୁଣା ମହାକାଶ ଟେଲିସ୍କୋପ୍ ପୃଥିବୀର ବାୟୁମଣ୍ଡଳକୁ ଅନିୟନ୍ତ୍ରିତ ଭାବେ ଫେରିଆସୁଛି, ଯାହାର ଭଗ୍ନାବଶେଷ ବା ମଲବା ଭାରତର କିଛି ଅଞ୍ଚଳରେ ପଡ଼ିବାର ଏକ ସମ୍ଭାବନା ରହିଛି। ତେବେ ଏହାକୁ ନେଇ ଆତଙ୍କିତ ହେବାର କୌଣସି ଆବଶ୍ୟକତା ନାହିଁ, କାରଣ ଏହା ଦ୍ଵାରା କ୍ଷୟକ୍ଷତି ହେବାର ଆଶଙ୍କା ନଗଣ୍ୟ।
କୁହାଯାଉଛି NASAର ଏହି ୨୨ ବର୍ଷର ପୁରୁଣା ସ୍ପେସ୍ ଟେଲିସ୍କୋପ୍ ପୃଥିବୀର ବିଷୁବ ରେଖା ନିକଟବର୍ତ୍ତୀ ୨୦.୬ ଡିଗ୍ରୀ ଉତ୍ତର ଓ ୨୦.୬ ଡିଗ୍ରୀ ଦକ୍ଷିଣ ଅକ୍ଷାଂଶ ମଧ୍ୟରେ ଥିବା କୌଣସି ବି ଅଞ୍ଚଳରେ ପଡ଼ିପାରେ। ନାସା ଏହି ସ୍ୱିଫ୍ଟ ଟେଲିସ୍କୋପକୁ ୨୦୦୪ ମସିହା ନଭେମ୍ବର ୨୦ ରେ ମାତ୍ର ୨ ବର୍ଷର ମିଶନ ପାଇଁ ଲଞ୍ଚ କରିଥିଲା। କିନ୍ତୁ ଏହା ଦୀର୍ଘ ୨୨ ବର୍ଷ ଧରି ମହାକାଶରେ ବ୍ଲାକ୍ ହୋଲ୍ ଓ ସୁପରନୋଭା ଭଳି ଶକ୍ତିଶାଳୀ ବିସ୍ଫୋରଣ ଉପରେ ଗବେଷଣା କରି ସଫଳତାର ସହ କାମ କରିଆସିଛି।
ସୂର୍ଯ୍ୟଙ୍କ ଅତ୍ୟଧିକ ସକ୍ରିୟତା ଯୋଗୁଁ ପୃଥିବୀର ବାୟୁମଣ୍ଡଳର ଉପର ଭାଗ ପ୍ରସାରିତ ହୋଇଥିଲା, ଯାହାଫଳରେ ଏହି ଟେଲିସ୍କୋପ୍ ଉପରେ ବାୟୁର ଚାପ (drag) ବଢ଼ିଗଲା ଏବଂ ଏହା ନିଜର କକ୍ଷପଥରୁ ତଳକୁ ଖସିବାକୁ ଲାଗିଲା। ଏହାକୁ ବଞ୍ଚାଇବା ପାଇଁ ନାସା କରିଥିବା ଏକ ରୋବୋଟିକ୍ ରେସ୍କ୍ୟୁ ମିଶନ ମଧ୍ୟ ବିଫଳ ହୋଇଥିଲା। ଆମେରିକା ମିଲିଟାରୀର ସ୍ପେସ୍ ଫୋର୍ସ ଅନୁଯାୟୀ, ଏହି ଟେଲିସ୍କୋପର ରି-ଏଣ୍ଟ୍ରି ଜୋନ୍ (ପୃଥିବୀକୁ ଫେରିବା ସୀମା) ପୃଥିବୀର ୨୦.୬ ଡିଗ୍ରୀ ଉତ୍ତର ଏବଂ ୨୦.୬ ଡିଗ୍ରୀ ଦକ୍ଷିଣ ଅକ୍ଷାଂଶ ମଧ୍ୟରେ ରହିଛି। ଭାରତ ମାନଚିତ୍ର ଅନୁସାରେ, ପଶ୍ଚିମ ଉପକୂଳର ଦମନଠାରୁ ଆରମ୍ଭ କରି ଓଡ଼ିଶାର କଟକ ସହର ପର୍ଯ୍ୟନ୍ତ ଟଣାଯାଇଥିବା ଏକ କାଳ୍ପନିକ ରେଖାର ଦକ୍ଷିଣ ଭାଗ ଏହି ଜୋନ୍ରେ ଆସୁଛି। ଏହି କାରଣରୁ ମୁମ୍ବାଇ, ହାଇଦ୍ରାବାଦ, ବେଙ୍ଗାଲୁରୁ, ଭୁବନେଶ୍ୱର ଏବଂ ଚେନ୍ନାଇ ଭଳି ସହରଗୁଡ଼ିକ ଏହି ସମ୍ଭାବ୍ୟ ସୀମା ମଧ୍ୟରେ ରହିଛନ୍ତି।
ବିଶେଷଜ୍ଞ ଏବଂ ନାସା ବୈଜ୍ଞାନିକମାନଙ୍କ ମତରେ, ଟେଲିସ୍କୋପଟି ପୃଥିବୀର ବାୟୁମଣ୍ଡଳରେ ପ୍ରବେଶ କରିବା ମାତ୍ରେ ପ୍ରବଳ ଘର୍ଷଣ ଓ ନିଆଁ ଯୋଗୁଁ ଏହାର ୯୦% ରୁ ଅଧିକ ଭାଗ ଜଳି ପାଉଁଶ ହୋଇଯିବ। କେବଳ କିଛି ଶକ୍ତ ଧାତୁ (ଟଙ୍ଗଷ୍ଟନ୍) କିମ୍ବା ଆଇନା ନିର୍ମିତ ଛୋଟ ଛୋଟ ଖଣ୍ଡ ହିଁ ପୃଥିବୀ ପୃଷ୍ଠକୁ ଆସିପାରେ। ପୃଥିବୀର ୭୦ ପ୍ରତିଶତ ଭାଗ ସମୁଦ୍ର ହୋଇଥିବାରୁ ଏହାର ଅବଶିଷ୍ଟାଂଶ ଭାରତ ମହାସାଗର କିମ୍ବା ପ୍ରଶାନ୍ତ ମହାସାଗରର ଗଭୀର ଜଳରାଶିରେ ପଡ଼ିବାର ସମ୍ଭାବନା ସବୁଠାରୁ ଅଧିକ। କୌଣସି ଜନବସତି ଉପରେ ଏହା ପଡ଼ି ମଣିଷର କ୍ଷତି କରିବାର ଆଶଙ୍କା ପ୍ରାୟ ୧୦,୦୦୦ ରୁ ୧ ଭାଗ ଅଟେ।