ଚିନ୍ତା ବଢାଉଛି ବାୟୁ ପ୍ରଦୂଷଣ; ରାଜ୍ୟର ପ୍ରମୁଖ ସ୍ଥାନରେ ଲାଗିବ ପରିବେଶ ପ୍ରଦୂଷଣ ମନିଟରିଂ ସିଷ୍ଟମ୍
ଭୁବନେଶ୍ୱର: ରାଜ୍ୟରେ ବାୟୁ ପ୍ରଦୂଷଣ ଏବେ ଏକ ବଡ଼ ପରିବେଶଗତ ସମସ୍ୟା ଭାବେ ଉଭା ହୋଇଛି । ବିଶେଷକରି ଖଣି ଓ ଶିଳ୍ପାଞ୍ଚଳରେ ବାୟୁର ଗୁଣବତ୍ତାକୁ ନେଇ ଚିନ୍ତା ବଢ଼ୁଥିବା ବେଳେ ଆଗାମୀ ଶୀତଋତୁର ୩ ମାସ ଅଧିକ ଗୁରୁତ୍ୱପୂର୍ଣ୍ଣ ହୋଇପଡ଼ିଛି । ଏହି ସମୟରେ ବାୟୁମଣ୍ଡଳର ପରିବର୍ତ୍ତନ ଯୋଗୁଁ ପ୍ରଦୂଷକ କଣିକା ଭୂପୃଷ୍ଠ ନିକଟରେ ଜମା ହୋଇ ରହିବାର ଆଶଙ୍କା ଥାଏ । ଏଭଳି ସ୍ଥିତିରେ ଲୋକଙ୍କୁ ନିଜ ଅଞ୍ଚଳର ବାୟୁର ଗୁଣବତ୍ତା ସମ୍ପର୍କରେ ତତ୍କାଳ ସୂଚନା ଦେବା ପାଇଁ ରାଜ୍ୟର ପ୍ରମୁଖ ସ୍ଥାନଗୁଡ଼ିକରେ ପରିବେଶ ପ୍ରଦୂଷଣ ମନିଟରିଂ ସିଷ୍ଟମ୍ ସ୍ଥାପନ ଉପରେ ଗୁରୁତ୍ୱ ଦିଆଯାଉଛି।
ପ୍ରଦୂଷଣ ନିୟନ୍ତ୍ରଣ ବୋର୍ଡର ମୁଖ୍ୟ ପରିବେଶ ବିଜ୍ଞାନୀ ନିରଞ୍ଜନ ମଲ୍ଲିକଙ୍କ ସୂଚନା ଅନୁଯାୟୀ, ସହରର ପ୍ରମୁଖ ସ୍ଥାନ ଓ ଜନଗହଳିପୂର୍ଣ୍ଣ ଅଞ୍ଚଳରେ ଏଭଳି ମନିଟରିଂ ବ୍ୟବସ୍ଥା ଲଗାଯିବ। ଏହାଦ୍ୱାରା ଲୋକମାନେ ନିଜ ଅଞ୍ଚଳର ପ୍ରଦୂଷଣ ସ୍ଥିତି ବିଷୟରେ ଜାଣିବା ସହିତ ସଚେତନ ହୋଇପାରିବେ। ସେହିପରି କେନ୍ଦ୍ରୀୟ ପ୍ରଦୂଷଣ ନିୟନ୍ତ୍ରଣ ବୋର୍ଡର ସମୀର ଆପ୍ ଓ ୱେବ୍ ପୋର୍ଟାଲ୍ ମାଧ୍ୟମରେ ମଧ୍ୟ ବାୟୁର ଗୁଣବତ୍ତା ସମ୍ପର୍କିତ ତଥ୍ୟ ଉପଲବ୍ଧ ହେବ।
ତାଳଚେରରେ ପିଏମ୍ ୧୦ ଚିନ୍ତାଜନକ
ରାଜ୍ୟର ଖଣି ଓ ଶିଳ୍ପାଞ୍ଚଳ ମଧ୍ୟରୁ ତାଳଚେରର ବାୟୁ ପ୍ରଦୂଷଣ ସ୍ଥିତି ଅଧିକ ଚର୍ଚ୍ଚାରେ ରହିଛି । ଇଟି କ୍ଲାଇମେଟ୍ରେ ଅଗଷ୍ଟ ୧୮, ୨୦୨୬ରେ ପ୍ରକାଶିତ ଏକ ରିପୋର୍ଟରେ ଓଡ଼ିଶା ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡର ତଥ୍ୟ ଆଧାରରେ କୁହାଯାଇଛି ଯେ, ୨୦୨୫ ନଭେମ୍ବରରୁ ୨୦୨୬ ଫେବୃଆରୀ ମଧ୍ୟରେ ତାଳଚେରରେ ହାରାହାରି ପିଏମ ୧୦ ମାତ୍ରା ୨୧୭ ମାଇକ୍ରୋଗ୍ରାମ୍ ପ୍ରତି ଘନମିଟର ରହିଥିଲା। ସେହି ସମୟରେ ଅନୁଗୁଳରେ ୧୭୯, କଟକରେ ୧୮୬ ଓ ଭୁବନେଶ୍ୱରରେ ୧୭୧ ମାଇକ୍ରୋଗ୍ରାମ୍ ପ୍ରତି ଘନମିଟର ପିଏମ ୧୦ ରେକର୍ଡ ହୋଇଥିଲା।
ସେହିପରି ୨୦୨୫-୨୬ ଆର୍ଥିକ ବର୍ଷରେ ତାଳଚେରର ବାର୍ଷିକ ହାରାହାରି ପିଏମ ୧୦ ମାତ୍ରା ୧୨୦ ମାଇକ୍ରୋଗ୍ରାମ୍ ପ୍ରତି ଘନମିଟର ରହିଥିବା ରିପୋର୍ଟରେ ଉଲ୍ଲେଖ ହୋଇଛି। ଏହା ଜାତୀୟ ବାର୍ଷିକ ମାନକ ୬୦ ମାଇକ୍ରୋଗ୍ରାମ୍ର ଦୁଇଗୁଣ। ଏହି ତଥ୍ୟ ତାଳଚେରରେ ବାୟୁ ପ୍ରଦୂଷଣର ଗମ୍ଭୀରତାକୁ ସ୍ପଷ୍ଟ କରୁଛି।
କେବଳ କୋଇଲା ଖଣି ନା ଶିଳ୍ପ ମଧ୍ୟ ଦାୟୀ?
ତାଳଚେର ଅଞ୍ଚଳରେ ବାୟୁ ପ୍ରଦୂଷଣର କାରଣ ଭାବେ କେବଳ କୋଇଲା ଖଣିକୁ ଦାୟୀ କରିବା ଠିକ୍ ହେବ ନାହିଁ। ଖଣିରୁ ଉତ୍ପନ୍ନ ଧୂଳି, କୋଇଲା ପରିବହନ ସମୟରେ ଉଡ଼ୁଥିବା ଧୂଳିକଣା, ଶିଳ୍ପାନୁଷ୍ଠାନରୁ ନିର୍ଗତ ଧୂଆଁ, ଯାନବାହନର ଧୂଆଁ ଏବଂ ନିର୍ମାଣ କାର୍ଯ୍ୟ ମଧ୍ୟ ବାୟୁ ପ୍ରଦୂଷଣର ଅନ୍ୟତମ ଉତ୍ସ।
ରାଜ୍ୟରେ ରହିଛି ୩୭ଟି ବାୟୁ ମନିଟରିଂ ଷ୍ଟେସନ୍
ଓଡ଼ିଶା ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡର ଅଫିସିଆଲ୍ ୱେବସାଇଟ୍ ଅନୁଯାୟୀ, ଜାତୀୟ ଓ ରାଜ୍ୟସ୍ତରୀୟ ବାୟୁ ଗୁଣବତ୍ତା ନିରୀକ୍ଷଣ କାର୍ଯ୍ୟକ୍ରମ ଅଧୀନରେ ରାଜ୍ୟର ୧୬ଟି ଅଞ୍ଚଳରେ ମୋଟ ୩୭ଟି ମନିଟରିଂ ଷ୍ଟେସନ୍ ରହିଛି। ଏଥିରେ ଶିଳ୍ପାଞ୍ଚଳ ଓ ଆବାସିକ ଅଞ୍ଚଳ ଉଭୟକୁ ସାମିଲ କରାଯାଇଛି।
ଅନୁଗୁଳର ଇଣ୍ଡଷ୍ଟ୍ରିଆଲ୍ ଇଷ୍ଟେଟ୍, ନାଲକୋ ନଗର, ତାଳଚେରର TTPS ଓ ଏମସିଏଲ ଅଞ୍ଚଳରେ ମନିଟରିଂ ଷ୍ଟେସନ୍ ରହିଛି। ସେହିପରି ଭୁବନେଶ୍ୱରର ୟୁନିଟ୍-୮, ନୟାପଲ୍ଲୀ, କ୍ୟାପିଟାଲ୍ ପୋଲିସ ଷ୍ଟେସନ୍, ପାତ୍ରପଡ଼ା ଓ ଚନ୍ଦ୍ରଶେଖରପୁରରେ ମଧ୍ୟ ନିରୀକ୍ଷଣ ବ୍ୟବସ୍ଥା ରହିଛି।
ଏହାବ୍ୟତୀତ ଝାରସୁଗୁଡ଼ା, କଳିଙ୍ଗନଗର, କେନ୍ଦୁଝର, ପାରାଦୀପ, ପୁରୀ, ରାଉରକେଲା, ସମ୍ବଲପୁର ଓ ଅନ୍ୟାନ୍ୟ ଅଞ୍ଚଳରେ ମଧ୍ୟ ଷ୍ଟେସନ୍ ରହିଛି। ତେଣୁ ନୂଆ ଡିଜିଟାଲ୍ ଡିସପ୍ଲେ ଓ ମନିଟରିଂ ବ୍ୟବସ୍ଥା ପୂର୍ବରୁ ଥିବା ଷ୍ଟେସନ୍ଗୁଡ଼ିକର କାର୍ଯ୍ୟକୁ ଆହୁରି ଲୋକାଭିମୁଖୀ କରିବାରେ ସହାୟକ ହୋଇପାରିବ।
ସମୀର ଆପ୍ରେ ମିଳିବ ତତ୍କାଳ ସୂଚନା
କେନ୍ଦ୍ର ସରକାରଙ୍କ ସୂଚନା ଅନୁଯାୟୀ ୨୦୨୬ ମାର୍ଚ୍ଚ ସୁଦ୍ଧା ଦେଶର ୨୮ଟି ରାଜ୍ୟ ଓ ୭ଟି କେନ୍ଦ୍ରଶାସିତ ଅଞ୍ଚଳର ୬୦୩ଟି ସହରରେ ମୋଟ ୧,୬୪୬ଟି ବାୟୁ ଗୁଣବତ୍ତା ମନିଟରିଂ ଷ୍ଟେସନ୍ କାର୍ଯ୍ୟକ୍ଷମ ଥିଲା। ସେହିପରି sameer ମୋବାଇଲ୍ ଆପ୍ ଓ ୱେବ୍ ପୋର୍ଟାଲ୍ ମାଧ୍ୟମରେ ୨୯୨ରୁ ଅଧିକ ସହରର ଏକ୍ୟୁଆଇ ସମ୍ପର୍କିତ ପ୍ରାୟ ବର୍ତ୍ତମାନ ସମୟର ତଥ୍ୟ ମିଳୁଛି।
ଏହି ବ୍ୟବସ୍ଥାରେ ପିଏମ ୧୦, ପିଏମ ୨. ୫, ସଲଫର ଡାଇଅକ୍ସାଇଡ୍, ନାଇଟ୍ରୋଜେନ୍ ଅକ୍ସାଇଡ୍, କାର୍ବନ ମନୋକ୍ସାଇଡ୍ ଓ ଅନ୍ୟାନ୍ୟ ପ୍ରଦୂଷକର ମାତ୍ରା ନିରୀକ୍ଷଣ କରାଯାଇପାରେ।
ସେପ୍ଟେମ୍ବର ୨୪ରେ ଭୁବନେଶ୍ୱରସ୍ଥିତ ରିଜିଓନାଲ୍ ସାଇନ୍ସ ସେଣ୍ଟରରେ ମଧ୍ୟ ଓଡ଼ିଶା ପ୍ରଦୂଷଣ ନିୟନ୍ତ୍ରଣ ବୋର୍ଡ ପକ୍ଷରୁ ଏକ ଏୟାର କ୍ୱାଲିଟି ଡିଜିଟାଲ୍ ଡିସପ୍ଲେ ସ୍ଥାପନ କରାଯାଇଥିଲା। ଏଥିରେ ଏକ୍ୟୁଆଇ, ପିଏମ ୨. ୫, ପିଏମ ୧୦ ସହିତ ପବନର ବେଗ ଓ ତାପମାତ୍ରା ସମ୍ପର୍କିତ ତଥ୍ୟ ପ୍ରଦର୍ଶିତ ହେଉଛି।
ବାୟୁ ପ୍ରଦୂଷଣର ଏହି ସ୍ଥିତିରେ କେବଳ ମନିଟରିଂ ସିଷ୍ଟମ୍ ସ୍ଥାପନ ଯଥେଷ୍ଟ ନୁହେଁ। ପ୍ରଦୂଷଣର ମୂଳ ଉତ୍ସ ଚିହ୍ନଟ, ନିୟମିତ ଯାଞ୍ଚ, ଶିଳ୍ପାନୁଷ୍ଠାନର ନିର୍ଗମନ ନିୟନ୍ତ୍ରଣ ଓ ଖଣି ଅଞ୍ଚଳରେ ଧୂଳି ନିୟନ୍ତ୍ରଣ ଉପରେ ମଧ୍ୟ ସମାନ ଗୁରୁତ୍ୱ ଦେବାକୁ ପଡ଼ିବ ବୋଲି ଶ୍ରୀ ମଲ୍ଲିକ କହିଛନ୍ତି ।