Asian Games 2026:୪୪ ବର୍ଷର ଅପେକ୍ଷାର ଅନ୍ତ:ଐତିହାସିକ ସ୍ୱର୍ଣ୍ଣ ପଦକ ଜିତିଲେ ମହିଳା ହକି ଦଳ,୨୦୨୮ ଅଲିମ୍ପିକ୍ସ ପାଇଁ ଯୋଗ୍ୟତା ଅର୍ଜନ
ନୂଆଦିଲ୍ଲୀ:୨୦୨୬ ଏସୀୟ କ୍ରୀଡ଼ାରେ ଭାରତୀୟ ମହିଳା ହକି ଦଳ ଇତିହାସ ପୃଷ୍ଠାରେ ସୁନେଲି ଅକ୍ଷରରେ ନିଜ ନାମ ଲିପିବଦ୍ଧ କରିଛି। ୨୦୨୬ ଏସୀୟ କ୍ରୀଡ଼ାର ଫାଇନାଲ୍ ମ୍ୟାଚ୍ ଭାରତୀୟ ଏବଂ ଚୀନ୍ ମହିଳା ହକି ଦଳ ମଧ୍ୟରେ ଅନୁଷ୍ଠିତ ହୋଇଥିଲା। ଫାଇନାଲ୍ ମ୍ୟାଚରେ ଚୀନ୍କୁ ୧-୦ ଗୋଲ୍ରେ ପରାସ୍ତ କରି ଭାରତୀୟ ଦଳ ସ୍ୱର୍ଣ୍ଣ ପଦକ ହାସଲ କରିଥିଲା। ଏହି ବିଜୟ ସହିତ ଭାରତୀୟ ଦଳ ୨୦୨୮ ଲସ୍ ଆଞ୍ଜେଲସ୍ ଅଲିମ୍ପିକ୍ସ ପାଇଁ ମଧ୍ୟ ଯୋଗ୍ୟତା ଅର୍ଜନ କରିବାରେ ସଫଳ ହୋଇଥିଲା। ଭାରତୀୟ ଦଳ ମ୍ୟାଚର ୧୦ମ ମିନିଟରେ ଏକମାତ୍ର ଗୋଲ୍ ସ୍କୋର କରିଥିଲା; ଏହା ପରେ କୌଣସି ଦଳ ଆଉ ଗୋଲ୍ କରିପାରି ନଥିଲେ। ଏସୀୟ କ୍ରୀଡ଼ାରେ ମହିଳା ହକିରେ ଭାରତର ଏହା ଦ୍ୱିତୀୟ ସ୍ୱର୍ଣ୍ଣ ପଦକ ଏବଂ ଏହା ସହିତ ୪୪ ବର୍ଷର ଅପେକ୍ଷାର ଅନ୍ତ ଘଟିଛି।
ଭାରତୀୟ ମହିଳା ହକି ଦଳ ମ୍ୟାଚ୍ର ଆରମ୍ଭରୁ ହିଁ ଚୀନ୍ ଉପରେ ନିଜର ପ୍ରାଧାନ୍ୟ ବଜାୟ ରଖିଥିଲା। ଖେଳର ଷଷ୍ଠ ମିନିଟରେ ବଲଜିତ୍ କୌରଙ୍କୁ ‘ଗ୍ରୀନ୍ କାର୍ଡ’ ମିଳିଥିଲା, ତଥାପି ଦଳ ନିଜର ଆକ୍ଟ ମୁଡ୍ ଜାରି ରଖିଥିଲା। ୧୦ମ ମିନିଟରେ ଲାଲରେମସିଆମି ଏକ ଚମତ୍କାର ‘ଫିଲ୍ଡ ଗୋଲ୍’ ସ୍କୋର କରି ଭାରତକୁ ୧-୦ରେ ଅଗ୍ରଣୀ କରାଇଥିଲେ; ଏହା ତାଙ୍କର ୨୦୦ତମ ଆନ୍ତର୍ଜାତୀୟ ମ୍ୟାଚ୍ ଥିଲା। ଏହା ପରେ ଭାରତକୁ ‘ପେନାଲ୍ଟି କର୍ଣ୍ଣର’ ମାଧ୍ୟମରେ ସ୍କୋର କରିବାର ଆଉ ଏକ ସୁଯୋଗ ମିଳିଥିଲା, କିନ୍ତୁ ଦଳ ଏହାକୁ ଗୋଲରେ ପରିଣତ କରିବାରେ ବିଫଳ ହୋଇଥିଲା। ଏହା ସତ୍ତ୍ୱେଭାରତୀୟ ଦଳ ପ୍ରଥମ କ୍ୱାର୍ଟର ଶେଷ ପର୍ଯ୍ୟନ୍ତ ନିଜର ୧-୦ ଅଗ୍ରଣୀ ସ୍ଥିତି ବଜାୟ ରଖିଥିଲା।
𝗖𝗛𝗔𝗠𝗣𝗜𝗢𝗡, 𝗖𝗛𝗔𝗠𝗣𝗜𝗢𝗡! 🥇🇮🇳
Everybody knows say the Indian Women’s Team are CHAMPIONS! 😎🏆
The gold is ours, and the celebrations are only getting started! 💃🏑🔥#HockeyIndia #IndiaKaGame #AsianGames2026 #AichiNagoya2026 pic.twitter.com/bwjLi9EhA6
— Hockey India (@TheHockeyIndia) October 2, 2026
ମ୍ୟାଚ୍ର ଦ୍ୱିତୀୟ କ୍ୱାର୍ଟରରେ ଚୀନ୍ ଅତ୍ୟନ୍ତ ଆକ୍ରମଣାତ୍ମକ ଖେଳ ପ୍ରଦର୍ଶନ କରି ଭାରତୀୟ ଦଳ ଉପରେ କ୍ରମାଗତ ଚାପ ସୃଷ୍ଟି କରିଥିଲା। ସ୍କୋର ବରାବର କରିବା ପାଇଁ ଚୀନ୍କୁ ଏକ ପେନାଲ୍ଟି ଷ୍ଟ୍ରୋକ୍ ମିଳିଥିଲା, ଯାହା ସେମାନଙ୍କ ପାଇଁ ସର୍ବୋତ୍ତମ ସୁଯୋଗ ଥିଲା; ତଥାପି, ଭାରତର ଅଭିଜ୍ଞ ଗୋଲ୍କିପର ସବିତା ପୁନିଆ ଏକ ଚମତ୍କାର ସେଭ୍ କରି ସେମାନଙ୍କୁ ଗୋଲ୍ କରିବାରୁ ବଞ୍ଚିତ କରିଥିଲେ।
ଚୀନ୍ କ୍ରମାଗତ ଭାବେ ଆକ୍ରମଣ ଜାରି ରଖିଥିଲା, କିନ୍ତୁ ଭାରତୀୟ ରକ୍ଷଣଭାଗର ଖେଳାଳିମାନେ ଚମତ୍କାର ପ୍ରଦର୍ଶନ କରି ସେମାନଙ୍କର ପ୍ରତ୍ୟେକ ପ୍ରୟାସକୁ ବିଫଳ କରିଦେଇଥିଲେ। ଏହି ସମୟ ମଧ୍ୟରେ ଭାରତୀୟ ଦଳ ମୁଖ୍ୟତଃ ରକ୍ଷଣାତ୍ମକ ଖେଳ ଉପରେ ଧ୍ୟାନ କେନ୍ଦ୍ରିତ କରିଥିଲା ଏବଂ ହାଫ୍-ଟାଇମ୍ ସୁଦ୍ଧା ୧-୦ ଗୋଲ୍ର ଅଗ୍ରଣୀ ବଜାୟ ରଖିଥିଲା। ଏହି ସମୟରେ, ୨୮ତମ ମିନିଟରେ ଏକ ‘ଫାଉଲ୍’ ପାଇଁ ଚୀନ୍ ଖେଳାଳି ୱେନ୍ ଡାନ୍ଙ୍କୁ ‘ଗ୍ରୀନ୍ କାର୍ଡ’ ଦିଆଯାଇଥିଲା।
ତୃତୀୟ କ୍ୱାର୍ଟର ଆରମ୍ଭରେ, ଚୀନ୍ ଗୋଲ୍ ସ୍କୋର କରିବା ଲକ୍ଷ୍ୟରେ ବାରମ୍ବାର ଆକ୍ରମଣ କରିଥିଲା ଏବଂ ଦୁଇଟି ପେନାଲ୍ଟି କର୍ଣ୍ଣର ହାସଲ କରିଥିଲା। ତଥାପି, ଭାରତୀୟ ଅଧିନାୟିକା ସଲିମା ଟେଟେ ଏବଂ ଡିଫେଣ୍ଡରମାନେ ଚମତ୍କାର ପ୍ରତିରକ୍ଷା ପ୍ରଦର୍ଶନ କରି ଚୀନର ପ୍ରତ୍ୟେକ ଆକ୍ରମଣକୁ ବିଫଳ କରିଦେଇଥିଲେ। ଏହା ପରେ, ଭାରତୀୟ ଖେଳାଳିମାନେ ବଲ୍ ନିଜ ନିୟନ୍ତ୍ରଣରେ ରଖି ସମୟ ଅତିବାହିତ କରିବା ସହ ଖେଳର ଗତିକୁ ନିୟନ୍ତ୍ରଣ କରିଥିଲେ, ଯାହା ଫଳରେ ତୃତୀୟ କ୍ୱାର୍ଟର ଶେଷ ସୁଦ୍ଧା ଭାରତ ନିଜର ୧-୦ ଅଗ୍ରଣୀ ସ୍ଥିତି ବଜାୟ ରଖିପାରିଥିଲା।
ଶେଷ କ୍ୱାର୍ଟରରେ ସ୍କୋର ବରାବର କରିବା ଲକ୍ଷ୍ୟରେ ଚୀନ୍ ମ୍ୟାଚ୍ରେ ନିଜର ସର୍ବସ୍ବ ଲଗାଇ ଦେଇଥିଲା। ତଥାପି, ଭାରତୀୟ ଡିଫେଣ୍ଡରମାନେ ଉଲ୍ଲେଖନୀୟ ସଂଯମତା ଓ ଦକ୍ଷତା ପ୍ରଦର୍ଶନ କରିଥିଲେ। ୫୨ତମ ମିନିଟରେ, ଚୀନର ଆଉ ଏକ ଆକ୍ରମଣକୁ ପ୍ରତିହତ କରିବା ସହ ସମୟ ନଷ୍ଟ କରିବା ପାଇଁ ରୁତୁଜା ପିସାଲ ଚତୁରତାର ସହ ବଲ୍କୁ ନିଜ ନିୟନ୍ତ୍ରଣରେ ରଖିଥିଲେ। ଭାରତୀୟ ମହିଳା ଦଳ ଶେଷ ପର୍ଯ୍ୟନ୍ତ ନିଜର ୧-୦ ଅଗ୍ରଣୀ ସ୍ଥିତି ବଜାୟ ରଖିଥିଲା ଏବଂ ସ୍ୱର୍ଣ୍ଣ ପଦକ ହାସଲ କରିଥିଲା। ଏହା ସହିତ ଭାରତ ବର୍ତ୍ତମାନ ୨୦୨୬ ଏସୀୟ କ୍ରୀଡ଼ାରେ ମୋଟ ୧୬ଟି ସ୍ୱର୍ଣ୍ଣ ପଦକ ଜିତି ସାରିଛି ।