ନୂଆଦିଲ୍ଲୀ: ବଦଳିଛି ସମୟ, ବଦଳିଛି ବିଜ୍ଞାନ । ଆଧୁନିକ ଜ୍ଞାନ କୌଶଳକୁ ନେଇ ଚାଷ କାର୍ଯ୍ୟରେ ବେଶ୍ ଉନ୍ନତି ହେଉଛି । କୃଷି କ୍ଷେତ୍ରରେ ବିଜ୍ଞାନର ଉପଯୋଗ କରିବା ପାଇଁ କେନ୍ଦ୍ର ସରକାର ମଧ୍ୟ ସମସ୍ତ ପ୍ରକାର ଉଦ୍ୟମ କରୁଛନ୍ତି। ଏବେ ପୁଣି ପାଦେ ଆଗେଇଛି ବିଜ୍ଞାନ । ଚାଷ କ୍ଷେତ୍ରରେ ଡ୍ରୋନ୍ ହେଉଛି ଏପରି ଏକ ପ୍ରଯୁକ୍ତିବିଦ୍ୟା, ଯାହା ବହୁ ପରିମାଣରେ ଚାଷ ପ୍ରଣାଳୀକୁ ବଦଳାଇ ଦେଇଛି । ଡ୍ରୋନ୍ ବ୍ୟବହାର ଦ୍ୱାରା ଚାଷୀଙ୍କ ଆୟ ବୃଦ୍ଧି ପାଇବା ସହିତ ସମୟ ମଧ୍ୟ ବଞ୍ଚୁଛି। ।
ବନାରସ ହିନ୍ଦୁ ବିଶ୍ୱବିଦ୍ୟାଳୟର କୃଷି ବିଜ୍ଞାନ ବିଭାଗର ବୈଜ୍ଞାନିକମାନେ ଏପରି ଡ୍ରୋନ୍ ତିଆରି କରିଛନ୍ତି, ଯାହା ଚାଷ କ୍ଷେତ୍ରରେ କୃଷକମାନଙ୍କୁ ସାହାଯ୍ୟ କରିବ। ମାତ୍ର ୧୫ ମିନିଟରେ ଏହା ଏକ ଏକର ଫସଲରେ କୀଟନାଶକ ଓ ୟୁରିଆ ସ୍ପ୍ରେ କରିପାରିବ । ଏହି ଡ୍ରୋନ୍ ତିଆରିରେ ପ୍ରାୟ ୧୦ ଲକ୍ଷ ଟଙ୍କା ଖର୍ଚ୍ଚ ହୋଇଛି। ଏଥିରେ ମଲ୍ଟି ସେନ୍ସର ସହିତ ଅନେକ କ୍ୟାମେରା ମଧ୍ୟ ଲଗାଯାଇଛି । ବୈଜ୍ଞାନିକମାନେ କହିଛନ୍ତି ଯେ, ଦେଶର ଅଧିକାଂଶ ଅଞ୍ଚଳରେ ବର୍ତ୍ତମାନ ପର୍ଯ୍ୟନ୍ତ ପାରମ୍ପରିକ ଉପାୟରେ କୀଟନାଶକ ସ୍ପ୍ରେ କରାଯାଉଛି। ଏହା ଯୋଗୁଁ ଖର୍ଚ୍ଚ ବଢିବା ସହ ସମୟ ମଧ୍ୟ ଯାଉଛି । କୃଷକମାନେ କୀଟନାଶକ ସଂସ୍ପର୍ଶରେ ଆସି ଚର୍ମ ସମ୍ବନ୍ଧୀୟ ରୋଗରେ ପଡିଥାନ୍ତି। କିନ୍ତୁ ଡ୍ରୋନ୍ ବ୍ୟବହାର ପରେ ଏସବୁ ସମସ୍ୟା ରହିବ ନାହିଁ ।
ବନାରସ ହିନ୍ଦୁ ବିଶ୍ୱବିଦ୍ୟାଳୟର ବୈଜ୍ଞାନିକମାନେ ମଧ୍ୟ ଏହି ଡ୍ରୋନକୁ କ୍ଷେତରେ ପରୀକ୍ଷା କରିଛନ୍ତି । ଜମାଲପୁର ବ୍ଲକର ଚାଷୀଙ୍କ କ୍ଷେତରେ ଏହା ପରୀକ୍ଷା କରାଯାଇଛି। ଅଧିକାରୀମାନେ କହିଛନ୍ତି ଯେ, ଏକ ଏକର ଗହମ ଫସଲରେ ନାନୋ ସାର ସ୍ପ୍ରେ କରିବାରେ ଏହା ପରୀକ୍ଷା କରାଯାଇଥିଲା। ସ୍ପ୍ରେ କରିବା ପାଇଁ କେବଳ ୧୫ ମିନିଟ୍ ସମୟ ରେକର୍ଡ କରାଯାଇଥିଲା।
