ହମିଦ ଅନସାରୀଙ୍କ ବୟାନ ଉପରେ ବର୍ଷିଲା ବିଜେପି; କହିଲା, ‘କଂଗ୍ରେସର ହିନ୍ଦୁ ବିରୋଧୀ ନୀତି ପଦାରେ ପଡ଼ିଲା’
ନୂଆଦିଲ୍ଲୀ: ଭାରତର ପୂର୍ବତନ ଉପରାଷ୍ଟ୍ରପତି ମହମ୍ମଦ ହମିଦ ଅନସାରୀଙ୍କ ଏକ ମନ୍ତବ୍ୟକୁ ନେଇ ଏବେ ଦେଶର ରାଜନୀତି ସରଗରମ ହୋଇପଡ଼ିଛି । ନୂଆଦିଲ୍ଲୀ ସ୍ଥିତ ଇଣ୍ଡିଆ ଇସଲାମିକ୍ କଲଚରାଲ୍ ସେଣ୍ଟରଠାରେ ଆୟୋଜିତ ଏକ ସ୍ମୃତିଚାରଣ କାର୍ଯ୍ୟକ୍ରମରେ ଯୋଗଦେଇ ଅନସାରୀ ଦେଶର ସାମ୍ପ୍ରତିକ ରାଜନୈତିକ ଏବଂ ସାମାଜିକ ସ୍ଥିତି ଉପରେ ଗଭୀର ଉଦବେଗ ପ୍ରକାଶ କରିଛନ୍ତି । ପୂର୍ବତନ ପ୍ରଧାନମନ୍ତ୍ରୀ ପଣ୍ଡିତ ଜବାହରଲାଲ ନେହେରୁଙ୍କ ଏକ ବୟାନକୁ ଆଧାର କରି ସେ କହିଛନ୍ତି ଯେ, ଭାରତ ପାଇଁ କମ୍ୟୁନିଜମ୍ ବା ସାମ୍ୟବାଦ ପ୍ରକୃତ ବିପଦ ନୁହେଁ, ବରଂ ‘ହିନ୍ଦୁ ଦକ୍ଷିଣପନ୍ଥୀ ସାମ୍ପ୍ରଦାୟିକତା’ ହେଉଛି ଦେଶ ପାଇଁ ସବୁଠାରୁ ବଡ଼ ବିପଦ ।
ଦେଶର ବିଶିଷ୍ଟ ସମ୍ବିଧାନ ବିଶେଷଜ୍ଞ, ବରିଷ୍ଠ ଆଇନଜୀବୀ ତଥା ଲେଖକ ପ୍ରୟାତ ଏ.ଜି. ନୂରାନୀଙ୍କ ସ୍ମୃତିରେ ଆୟୋଜିତ ‘ରିମେମ୍ବରିଙ୍ଗ୍ ଏ ପଲିମାଥ: ଦି ଲାଇଫ୍ ଆଣ୍ଡ ଟାଇମ୍ସ ଅଫ୍ ଅବଦୁଲ ଗଫୁର ନୂରାନୀ’ ଶୀର୍ଷକ କାର୍ଯ୍ୟକ୍ରମରେ ଅନସାରୀ ଏହି ମନ୍ତବ୍ୟ ଦେଇଛନ୍ତି । ନୂରାନୀଙ୍କ ଦ୍ୱାରା ୨୦୧୯ ମସିହାରେ ରଚିତ ବହୁଚର୍ଚ୍ଚିତ ପୁସ୍ତକ ‘ଦି ଆରଏସଏସ: ଏ ମେନେସ୍ ଟୁ ଇଣ୍ଡିଆ’ର ପ୍ରସ୍ତାବନା ବିଷୟରେ ଉଲ୍ଲେଖ କରି ସେ ନେହେରୁଙ୍କ ଏହି ଐତିହାସିକ ଟିପ୍ପଣୀ ବାବଦରେ ଆଲୋଚନା କରିଥିଲେ । ଅନସାରୀଙ୍କ କହିବା ମୁତାବକ, ତତ୍କାଳୀନ ବିଦେଶ ସଚିବ ଜଗତ ସିଂହ ଗୁଣ୍ଡେଭିଆ ଏକ ବିଭାଗୀୟ ବୈଠକ ସମୟରେ ନେହେରୁଙ୍କ ଏହି ବୟାନକୁ ଲିପିବଦ୍ଧ କରିଥିଲେ, ଯାହାକି ଆଜି ମଧ୍ୟ ଦେଶର ଅନେକ ସଂଖ୍ୟାଲଘୁ ତଥା ମୁସଲମାନ ସମ୍ପ୍ରଦାୟର ଆଶଙ୍କା ଏବଂ ଭାବନାକୁ ପ୍ରତିଫଳିତ କରୁଛି ।
ସାମ୍ପ୍ରତିକ ରାଜନୈତିକ ଦୃଶ୍ୟପଟ୍ଟକୁ ସମାଲୋଚନା କରି ପୂର୍ବତନ ଉପରାଷ୍ଟ୍ରପତି କହିଛନ୍ତି ଯେ, ବର୍ତ୍ତମାନ ଦେଶରେ ‘ନାଗରିକ ଜାତୀୟତାବାଦ ର ମୂଳ ସିଦ୍ଧାନ୍ତକୁ ଉଦ୍ଦେଶ୍ୟମୂଳକ ଭାବେ ଆହ୍ୱାନ ଦିଆଯାଉଛି । ଏହା ବଦଳରେ କେବଳ ‘ସାଂସ୍କୃତିକ ଜାତୀୟତାବାଦ’ର ଧାରଣାକୁ ଆଗକୁ ବଢ଼ାଯାଉଛି । ନିର୍ବାଚନୀ ଗଣତନ୍ତ୍ରରେ ମିଳିଥିବା ସଂଖ୍ୟାଗରିଷ୍ଠତାକୁ ଧାର୍ମିକ ବହୁମତ ଭାବେ ଉପସ୍ଥାପନ କରି ରାଜନୈତିକ କ୍ଷମତା ଉପରେ ସମ୍ପୂର୍ଣ୍ଣ ଏକାଧିକାର ସାବ୍ୟସ୍ତ କରିବାକୁ ନିରନ୍ତର ଉଦ୍ୟମ ହେଉଥିବା ସେ ଅଭିଯୋଗ କରିଛନ୍ତି । ତାଙ୍କ ମତରେ, ଏଭଳି ପ୍ରବୃତ୍ତି ଯୋଗୁଁ ନାଗରିକମାନଙ୍କ ମଧ୍ୟରେ ଧର୍ମ ଆଧାରରେ ଭେଦଭାବ ସୃଷ୍ଟି ହେବା ସହ ସମାଜରେ ଅସହିଷ୍ଣୁତା ଓ ଅସୁରକ୍ଷା ବୃଦ୍ଧି ପାଉଛି, ଯାହା ଆଇନର ଶାସନକୁ ମଧ୍ୟ ଦୁର୍ବଳ କରୁଛି ।
ହମିଦ ଅନସାରୀଙ୍କ ଏହି ବୟାନ ସାମ୍ନାକୁ ଆସିବା କ୍ଷଣି ଭାରତୀୟ ଜନତା ପାର୍ଟି ପକ୍ଷରୁ ଏହାର କଡ଼ା ନିନ୍ଦା କରାଯାଇଛି । ବିଜେପି ଅନୁସୂଚିତ ଜନଜାତି ମୋର୍ଚ୍ଚା ପକ୍ଷରୁ ପ୍ରତିକ୍ରିୟା ଦିଆଯାଇ କୁହାଯାଇଛି ଯେ, ଅନସାରୀଙ୍କ ଏହି ମନ୍ତବ୍ୟ କଂଗ୍ରେସ ଏବଂ ତାଙ୍କ ସମର୍ଥକଙ୍କର ‘ହିନ୍ଦୁ ବିରୋଧୀ ରାଜନୀତି’କୁ ପଦାରେ ପକାଇଛି । ବିରୋଧୀ ଦଳ ନେତା ରାହୁଲ ଗାନ୍ଧୀଙ୍କ ପୂର୍ବ ବୟାନଗୁଡ଼ିକୁ ସ୍ମରଣ କରାଇ ଦଳ ଅଭିଯୋଗ କରିଛି ଯେ, ହିନ୍ଦୁମାନଙ୍କୁ ନିରନ୍ତର ବଦନାମ କରିବା ଏକ ନିର୍ଦ୍ଦିଷ୍ଟ ରାଜନୈତିକ ଷଡ଼ଯନ୍ତ୍ର ଏବଂ ନୈରେଟିଭ୍ର ଅଂଶବିଶେଷ ।
ଏ.ଜି. ନୂରାନୀଙ୍କ ଭଳି ଜଣେ ପ୍ରଖ୍ୟାତ ଆଇନଜୀବୀ ତଥା ସାମ୍ବିଧାନିକ ବିଶେଷଜ୍ଞଙ୍କ ବୌଦ୍ଧିକ ଅବଦାନକୁ ସ୍ମରଣ କରିବା ପାଇଁ ଆୟୋଜିତ ଏହି କାର୍ଯ୍ୟକ୍ରମ ଏବେ ଦେଶରେ ଏକ ବୃହତ୍ତର ରାଜନୈତିକ ବିବାଦର କେନ୍ଦ୍ରବିନ୍ଦୁ ପାଲଟିଯାଇଛି ।
