କମ୍ପାନୀ ହେବ ତ ଏମିତି : ୪୦ କର୍ମଚାରୀଙ୍କୁ ମାଲିକ ବାଣ୍ଟିଲେ ୭୦ କୋଟିର ବୋନସ

ସାଧାରଣତଃ ଯେତେବେଳେ ଏକ କମ୍ପାନୀର ଆୟ ଭଲ ରୁହେ ସେତେବେଳେ କମ୍ପାନୀ ପକ୍ଷରୁ କର୍ମଚାରୀଙ୍କୁ ଭଲ ବୋନସ ମିଳିଥାଏ । ଅନେକ କ୍ଷେତ୍ରରେ ବୋନସର ପରିମାଣ କିଛି ହଜାର କିମ୍ବା ଲକ୍ଷ ଭିତରେ ସୀମିତ ଥାଏ । କେତେକ କ୍ଷେତ୍ରରେ କମ୍ପାନୀର ପରିଚାଳକ ଘର କିମ୍ବା ଗାଡ଼ି ଆକାରରେ ବୋନସ ଦେଇଥାନ୍ତି । ହେଲେ ଚୀନର ଏକ ଘରୋଇ କମ୍ପାନୀ ନିଜ କର୍ମଚାରୀଙ୍କୁ ଏକାଥରକେ ଜଣକୁ ପ୍ରାୟ ୨ କୋଟିରୁ ଅଧିକ ବୋନସ ପ୍ରଦାନ କରିଛନ୍ତି । ମୋଟ ୭୦ କୋଟିର ବୋନସ ରାଶିକୁ ୪୦ ଜଣ କର୍ମଚାରୀଙ୍କ ଭିତରେ ବାଣ୍ଟି ଦେଇଛନ୍ତି ।
ଦେଖାଯାଏ ବୋନସ ଦେବା ସମୟରେ ବିଭିନ୍ନ କମ୍ପାନୀ ବୋନସ ରାଶିକୁ ସିଧାସଳଖ କର୍ମଚାରୀଙ୍କ ବ୍ୟାଙ୍କ ଆକାଉଣ୍ଟକୁ ପଠାଇବା କିମ୍ବା ଚେକ୍ ଆକାରରେ ଦେଇଥାନ୍ତି । ହେଲେ କ୍ରେନ ତିଆର କରୁଥିବା ଚାଇନିଜ୍ କମ୍ପାନୀ ହେନାନ୍ ମାଇନ୍‌ର ମାଲିକ ନଗଦ ରାଶି ହିସାବରେ ନିଜ କର୍ମଚାରୀଙ୍କୁ ବୋନସ ପ୍ରଦାନ କରିଛନ୍ତି । କରୋନା ମହାମାରୀ ସମୟରେ ଏହି ଚାଇନିଜ୍ କମ୍ପାନୀ ନିଜ ଆଶାଠାରୁ ଅଧିକ ଆୟ କରିଥିଲା । ତେଣୁ ସେ ଚିନ୍ତା କଲେ ନିଜ କର୍ମଚାରୀଙ୍କୁ ବୋନସ ବାଣ୍ଟିବେ । ସେଥିଲାଗି କମ୍ପାନୀ ପରିସରରେ ଏକ ସ୍ୱତନ୍ତ୍ର କାର୍ଯ୍ୟକ୍ରମ ରଖାଗଲା । ପ୍ରତ୍ୟେକ କର୍ମଚାରୀ ନିଜ ପରିବାର ସହ ଉପସ୍ଥିତ ରହିବାକୁ କୁହାଗଲା । କାର୍ଯ୍ୟକ୍ରମ ଆରମ୍ଭ ପୂର୍ବରୁ ନଗଦ ଆକାରରେ ଥିବା ୭୦ କୋଟି ଟଙ୍କା ମଞ୍ଚ ଉପରେ ଗଦା କରାଗଲା । ପରେ ୩ କର୍ମଚାରଙ୍କୁ ମଞ୍ଚ ଉପରକୁ ଡ଼କାଯାଇ ବେଷ୍ଟ କର୍ମଚାରୀ ଭାବେ ୧୮ କୋଟି ଲେଖାଏଁ ପ୍ରଦାନ କରାଗଲା । ପରେ ଜଣ ଜଣ କରି ଅନ୍ୟ କର୍ମଚାରୀଙ୍କ ନାମ ଡ଼କାଗଲା ଓ ବୋନସ ରାଶି ପ୍ରଦାନ କରାଗଲା । ଏହାର ଏକ ଭିଡ଼ିଓ ଏବେ ସୋସିଆଲ ମିଡିଆରେ ଭାଇରାଲ ହୋଇଛି । ଏହି ଅବସରରେ କର୍ମଚାରୀଙ୍କ ପରିବାର ସଦସ୍ୟଙ୍କ ପାଇଁ ଏକ ପ୍ରତିଯୋଗିତା ମଧ୍ୟ ଅନୁଷ୍ଠିତ ହୋଇଥିଲା ପରେ ସମସ୍ତ କୃତୀ ପ୍ରତିଯୋଗୀଙ୍କୁ ୧୪ କୋଟି ଟଙ୍କା ପୁରସ୍କାର ରାଶି ପ୍ରଦାନ କରାଯାଇଥିଲା । ୨୦୦୨ ମସିହାରେ ପ୍ରତିଷ୍ଠା ହୋଇଥିବା ଏହି ହେନାନ୍ ମାଇନ୍ କମ୍ପାନୀ କରୋନା ମହାମାରୀ ପରେ ମଧ୍ୟ ୨୩ ପ୍ରତିଶତରୁ ଅଧିକ ଲାଭ କରିଛି । ଏହି କମ୍ପାନୀରେ ୫୦୦୦ କର୍ମଚାରୀ କାମ କରୁଛନ୍ତି ।